Ikkon Sai Adong do Peraturan na Tarsurat di Bibel Siihuttononmu?

TIKKI dakdanak hamu, godang do ra peraturan na dibahen natua-tuamuna tu hamu. Alai dung balga hamu boi ma diattusi hamu, dilehon natua-tuamuna pe peraturan i asa denggan do ngolumuna. Nang pe dang diatur-atur natua-tuamuna be hamu, olo dope ra diihutton hamu peraturan na disuatton nasida tu rohamuna.

Songon i ma tong na dibahen Jahowa tu hita. Dipaboa Ibana do di Bibel piga-piga paretta. Misalna, diorai Ibana do hita manomba patung, mangulahon seks na so patut, dohot manakko. (2 Mus. 20:1-17; Ul. 15:28, 29) Alai dung ‘lam togu hita di saluhutna’, boi ma taattusi dilehon Jahowa pe paretta i, asa denggan do ngolutta. Jala dang na lao membatasi hita akka parettana i.—Eps. 4:15; Jes. 48:17, 18; 54:13.

Alai godang do situasi na so adong tarsurat peraturanna di Bibel. Alani i ma adong halak na marpikkir, saleleng so adong peraturan dipaboa di Bibel taringot i, boi do nasida mangulahon i. Didok nasida, molo porlu i dirasa Debata pasti disuru do asa disuratton i di Bibel.

Akka halak na marpikkir songon i sering do gabe mambahen keputusan na so denggan jala gabe disolsoli nasida. Dang boi diattusi nasida, dang holan peraturan na tarsurat di Bibel. Alai adong do disi akka petunjuk na patuduhon cara marpikkir ni Debata. Molo taparsiajari Bibel jala taboto cara marpikkir ni Debata, boi ma gabe dilatik Bibel hati nuranitta. Jala boi ma i mangurupi hita mambahen keputusan na sadalan tu lomo ni rohana. Molo taulahon i, boi ma tabahen las roha ni Debata jala boi ma tabahen keputusan na bermanfaat tu hita.—Eps. 5:1.

Sitiruon na Tarsurat di Bibel

Molo tajaha di Bibel taringot naposo ni Debata najolo, boi ma taida sai dipikkirhon nasida do lomo ni roha ni Debata, nang pe dang adong dope di tikki i peraturan na sian Debata. Contohna, si Josep. Tikki dirayu istri ni si Potifar ibana asa mangulahon seks, sebenarna dang adong dope tikki i peraturan na sian Debata na mangorai mangalakkup. Nang pe songon i diboto si Josep do, boi do gabe sega hati nuranina molo mangalakkup ibana. Jala boi do i mambahen ibana gabe ‘mardosa tu Debata’. (1 Mus. 39:9) Jala diboto si Josep do molo mangalakkup ibana, dang sadalan i tu lomo ni roha ni Jahowa songon na dipaboa Ibana di Taman Eden.—1 Mus. 2:24.

Taida ma contoh na asing. Molo taida di Ulaon ni Apostel 16:3, sebelum diajak si Paulus si Timoteus marbarita tu akka luat na asing, disuru ibana do asa disunat si Timoteus. Hape molo tajaha di ayat 4, tikki lao nasida tu akka kota na asing dipaboa nasida do “aturan naung ditottuhon akka apostel dohot akka sintua na di Jerusalem”. Termasuk ma i aturan na mandok dang porlu be halak Kristen disunat! (Ul. 15:5, 6, 28, 29) Attong boasa ma disuru si Paulus asa disunat si Timoteus? Alana “sude do halak Jahudi na di inganan i mamboto na halak Junani bapak ni [si Timoteus]”. Dang olo si Paulus mambahen halak na asing gabe tartuktuk. Alai lomo rohana asa sude halak Kristen patuduhon “tu panggora ni roha ni halak”, na sittong na diulahon nasida di jolo ni Debata.—2 Kor. 4:2; 1 Kor. 9:19-23.

Songon i ma cara marpikkir ni si Paulus dohot si Timoteus. Jaha ma akka ayat di Rom 14:15, 20, 21 dohot 1 Kor 8:9-13; 10:23-33, jala ida ma dijaga si Paulus do perasaan ni halak na asing. So tung gabe tartuktuk nasida alani akka na so maralo tu Hata ni Debata. Jala songon on ma na didok si Paulus taringot si Timoteus, “Dang adong na songon ibana burjuna, na sian ias ni roha mamparrohahon hamu. Molo na asing i, holan mamparrohahon na rikkot di dirina do nasida, dang na rikkot tu Jesus Kristus. Alai diboto hamu do songon dia si Timoteus. Songon anak dohot ama, marsitutu do ibana rap dohot au lao mambahen asa lam denggan ulaon marbarita na uli.” (Plp. 2:20-22) Sitiruon na denggan do nasida na dua tu hita saonari! Tikki dang adong peraturan na dipaboa taringot manang aha pe, dang olo nasida holan na mamikkiri dirina sandiri manang selerana sandiri. Alai ditiru nasida do Jahowa dohot Jesus. Dipikkirhon nasida do aha pengaruh ni keputusan ni nasida tu halak na asing.

Taparrohahon ma Jesus Kristus na gabe sitiruon di hita. Dipatorang ibana do di jamitana na di dolok, molo diattusi sasahalak do prinsip ni sada hukum na dilehon Debata, pasti boi do ibana mambahen keputusan nang pe dang adong petunjuk na jelas taringot sada situasi. (Mat. 5:21, 22, 27, 28) Gabe sitiruon do Jesus, si Paulus, si Timoteus, dohot si Josep. Alana dang hea didok roha ni nasida, molo dang adong petunjuk na jelas manang hukum dilehon Debata, boi nasida mambahen lomo-lomona. Alai diihutton nasida do cara marpikkir ni Debata. Jala diihutton nasida do dua paretta na umbalga na dilehon Jesus, i ma makkaholongi Debata dohot makkaholongi dongan jolma.—Mat. 22:36-40.

Songon dia Halak Kristen di Jaman Saonari?

Unang ma taanggap Bibel i songon sada dokumen hukum na paboahon sude na ikkon taulahon. Manang ikkon sai dipaboa-boa Debata aha na ikkon taulahon. Alai berusaha ma hita “mangalului lomo ni roha ni Jahowa” jala mamboto pikkiranna, nang pe dang adong petunjuk na jelas taringot sada situasi. Alana boi do i mambahen las roha ni Jahowa. (Eps. 5:17; Rom 12:2) Boasa songon i? Alana molo tabahen songon i, on patuduhon na rumikkot do di hita perasaan ni Jahowa sian perasaatta sandiri. Jala on pe patuduhon na taargai do holong ni roha na dipatudu Debata. Ala holong roha ni Debata tu hita, gabe berusaha ma hita naeng maniru sifatna. (Poda 23:15; 27:11) Asing ni i molo taihutton petunjuk ni Bibel tikki mambahen keputusan, boi do on mambahen lam jonok hubungatta tu Jahowa jala mambahen hita gabe lam sehat.

Saonari taida ma akka prinsip na adong hubunganna tu urusan pribaditta.

Mamillit Hiburan

Taida ma sada contoh. Adong sahalak bawa na naeng manuhor sada album musik. Menurutna tabo do musik ni akka lagu na di album i. Alai curiga do ibana tu album i. Alana dijaha ibana di sampul belakang ni album i, adong do akka hata na so denggan di lirik ni akka lagu i. Asing ni i, godangan lagu na diendehon di album i patuduhon na muruk jala na agresif do. Ala holong roha ni bawa i tu Jahowa, dipikkirhon ibana do boha perasaan ni Jahowa tu album i. Boasa ma boi diboto ibana aha lomo ni roha ni Jahowa taringot album i?

Di surat ni Apostel Paulus tu huria di Galatia, dipatorang ibana do disi akka aha na termasuk parniulaon ni daging dohot parbue ni tondi parbadia. Pasti diboto hamu do akka aha parbue ni tondi parbadia, i ma holong, las ni roha, dame, sabar, haburjuon, pangalaho na denggan, haporseaon, lambok ni roha, dohot mangarajai diri. Alai akka aha ma na termasuk tu parniulaon ni daging? Didok si Paulus, “Takkas do tarida parniulaon ni daging, i ma seks na so patut, ulaon na ramun, ulaon ni halak na so umboto ila, manomba akka patung, mardatu, marmusu, marbada, mangiburu, muruk-muruk, marsalisi, mamola-mola, sekte-sekte, late ni roha, mabuk, marpestai sahat tu na mabuk, dohot akka ulaon na songon i. Songon naung hupasingot tu hamu, pasingotokku ma hamu muse, dang parsidohot tu Harajaon ni Debata halak na mangulahon sisongon i.”—Gal. 5:19-23.

Parrohahon ma kalimat parpudi sian daftar i na mandok “mangulahon sisongon i”. On patuduhon dang sude dope dipaboa si Paulus akka aha na termasuk tu parniulaon ni daging. Alai unang ma sappe didok roha ni sasahalak, boi diulahon ibana manang aha pe na so adong di daftar i. Justru ikkon berusaha do ibana mamikkirhon akka aha dope na termasuk tu ‘ulaon sisongon i’. Alana molo diulahon nasida akka ulaon na termasuk tu ‘ulaon sisongon i’ jala dang olo nasida muba, dang parsidohot nasida tu Harajaon ni Debata.

Alani i ikkon talului, manang taattusi do lomo ni roha ni Debata. Maol do mangulahon i? Contohna, disuru dokter ma hita asa godang mangallang buah dohot sayur. Jala diorai ma hita mangallang cemilan, es krim, dohot na songon i. Menurut hamu, maol do manottuhon masuk tu daftar sipanganon na songon dia do kue? Tu sipanganon na diorai do, manang tu sipanganon na disuru asa taallang? Saonari mulak ma hita muse tu parbue ni tondi parbadia dohot akka parniulaon ni daging. Menurut hamu, masuk tudia ma album musik nakkin? Akka musik na di album i dang patuduhon holong, haburjuon, na mangarajai diri, dohot akka sifat na asing na gabe bagian ni parbue ni tondi parbadia. Jadi dang ikkon adong hukum manang peraturan, baru pe asa taboto sadalan do album i tu lomo ni roha ni Debata manang na daong. Songon i ma muse tu akka sijahaon, film, game, situs Web, dohot na asing.

Penampilan na Tama

Adong do tong prinsip taringot pakkean dohot penampilan di Bibel. Gabe boi ma diihutton halak Kristen i asa denggan jala tama penampilan ni nasida. Molo holong roha ni sasahalak tu Jahowa, pasti dang olo ibana mambahen lomo-lomona. Alai pasti berusaha do ibana mambahen las roha ni Jahowa. Songon naung tabahas nakkin, molo dang adong dipaboa Jahowa hukum na jelas taringot sada situasi, on dang patuduhon na so parduli Jahowa tu manang aha pe na diulahon naposona. Alana berbeda do gaya marpakkean di setiap daerah. Jala di sada daerah pe, olo do hatop muba gaya marpakkean. Nang pe songon i, dilehon Debata do akka prinsip na boi mangurupi naposona manang sadihari pe jala manang didia pe nasida.

Misalna, 1 Timoteus 2:9, 10 mandok, “Songon i ma nang akka borua, dipakke ma pakkean na tama mardongan toruk ni roha dohot bisuk. Unang ma dipabagak-bagak dirina marhite mandandani obuk, mamakke mas, mutiara, manang pakkean na massai arga. Alai dipatuduhon ma i marhite akka ulaon na denggan, ai i do na tama tu akka borua na manomba Debata.” Alani i ikkon dipikkirhon akka bawa dohot borua do, songon dia penampilan ni akka halak na “marhobas tu Debata”, na berterima di daerah ni nasida. Jala na paling penting ikkon dipikkirhon nasida do, aha pengaruh ni penampilan ni nasida tu barita na dipasahat nasida. (2 Kor. 6:3) Molo togu do haporseaon ni sasahalak, pasti dang olo ibana holan mamikkiri selerana sandiri. Justru pasti dipikkirhon ibana do boha carana asa dang gabe tartuktuk halak na asing alani penampilanna manang gabe holan ibana na diparrohahon.—Mat. 18:6; Plp. 1:10.

Molo diboto halak Kristen gabe terganggu manang gabe tartuktuk halak na asing alani penampilanna, ikkon ditiru ibana do Apostel Paulus. Dang holan selerana sandiri na dipikkirhon ibana, alai dipikkirhon ibana do perasaan ni na asing. Jala didok Apostel Paulus do, “Tiru hamu ma au, songon au na maniru Kristus.” (1 Kor. 11:1) Songon on ma muse na didok Apostel Paulus taringot Jesus, “Ai Kristus i pe, dang hasonanganna sandiri na dilului.” Jadi takkas do petunjuk na dipaboa si Paulus tu sude halak Kristen, “Halak na togu haporseaonna ikkon sabar do mangadopi halak na gale haporseaonna. Jala unang ma hasonangatta sandiri na talului. Alai ganup ma hita mambahen las roha ni donganta, jala mambahen na denggan lao patoguhon nasida.”—Rom 15:1-3.

Tarlatik Mamboto dia na Sittong dohot na Sala

Molo tarlatik hita mamboto dia na sittong dohot na sala, boi ma hita mambahen keputusan na denggan nang pe dang adong petunjuk na jelas taringot sada situasi. Boha do carana asa tarlatik hita mamboto dia na sittong dohot na sala? Dang boi otomatis pittor taboto i ala nungnga leleng hita gabe halak Kristen. Ikkon adong do na taulahon. Ikkon tajaha do Bibel ganup ari, taratur mamparsiajari i, jala tapikkirhon na tajaha i. Dung i boi ma gabe lam denggan cara berpikirta. Dang boi hatop gabe tarlatik hita mamboto dia na sittong dohot na sala. Sarupa ma i songon pertumbuhan ni sada dakdanak. Dang boi pittor hatop balga sada dakdanak. Ikkon palan-palan do i jala bertahap. Jadi molo dang boi hita hatop tarlatik mamboto dia na sittong dohot na sala, ikkon sabar do hita jala dang menyerah. Ikkon torus do hita taratur manjaha Bibel jala mangulahon i di ngolutta.—Heb. 5:14.

Marhite hukum ni Debata, boi ma tarida sipangoloi do hita manang na dang. Alai marhite akka prinsip ni Debata, boi ma tarida sadia balga holong ni rohatta tu Ibana dohot tu Hatana. Molo nungnga togu haporseaotta, pasti berusaha do hita lao maniru Ibana dohot Anakna. Jala pasti berusaha do hita lao maniru cara marpikkir ni Debata tikki mambahen keputusan. Molo torus hita berusaha mambahen las roha ni Jahowa manang na sadihari pe, pasti gabe tamba ma tong las ni rohatta.

[Gambar]

Berbeda do gaya marpakkean di setiap daerah, alai boi do prinsip ni Debata na adong di Bibel mangurupi hita mambahen keputusan