Godang do halak na mandok ajaran Tritunggal ma “ajaran utama ni halak Kristen”. Menurut ajaran Tritunggal i, sada do Ama, Anak, dohot tondi parbadia. Songon on ma na didok sahalak Cardinal na margoar si Jhon O’Connor taringot ajaran Tritunggal, “Sada rahasia do i di hami, haru hami pe dang diattusi hami i.” Boasa ma maol taattusi ajaran Tritunggal i?

Dipaboa The Illustrated Bible Dictionary do alasanna. Songon on ma didok bukku i taringot ajaran Tritunggal, “Dang ajaran sian Bibel Tritunggal i, artina dang adong ayat na boi patorakkon taringot ajaran i.” Jadi ala “dang sian Bibel” ajaran Tritunggal i, berusaha do akka halak na porsea tu ajaran i mangalului ayat na mendukung ajaran i. Bahkan gabe ditukkang-tukkangi nasida do ayat ni Bibel, asa songon na toho ajaran i sian Bibel.

Ayat na di Johannes 1:1 i ma na sering dipakke lao mangajarhon Tritunggal i. Molo di terjemahan Bibel King James Version, songon on ma didok di ayat i, “Di mulana i nungnga adong Hata i, jala rap do Hata i dohot Debata [Junani, ton the·onʹ], jala Debata [the·osʹ] do Hata i.” Molo di bahasa Junani adong dua hata the·osʹ (debata) di ayat i. Molo hata the·osʹ na parjolo mamakke kata sandang ton, na lapatanna Debata na Tumimbul. Alai hata the·osʹ na paduahon dang mamakke kata sandang. Na sengaja do dibahen hata the·osʹ na paduahon i dang mamakke kata sandang?

Mamakke bahasa Koine do disurat bukku Johannes, i ma bahasa na godang dipakke akka halak di tikki i. Adong do aturan mamakke kata sandang di bahasa on. Sahalak pakar ni Bibel na margoar si A.  T. Robertson mandok, “Molo mamakke kata sandang do subjek dohot predikatna, berarti sebanding do subjek dohot predikatna i. Mateus 13:38 ma dibahen si Robertson contohna. Didok di ayat i, “Ladang [bahasa Junani, ho a·grosʹ], i ma portibi on [bahasa Junani ho koʹsmos].” Jadi boi dokkonon sebanding do ladang dohot portibi on di ayat on, ala rap mamakke kata sandang.

Alai boha molo subjekna mamakke kata sandang predikatna daong, songon na didok di Johannes 1:1 i? Songon on ma na didok cendekiawan na margoar si James Allen Hewett taringot ayat i, “Ala holan subjekna do na mamakke kata sandang, berarti dang sebanding manang dang sarupa subjek dohot predikatna.”

Dibahen si Hewett ma muse contoh na asing, i ma 1 Johannes 1:5. Didok di ayat i, “Hatiuron do Debata.” Mamakke kata sandang do hata “Debata” di ayat on, i ma ho the·osʹ. Alai hata “hatiuron” i ma phos dang mamakke kata sandang. Jadi didok si Hewett ma, “Dang sebanding manang dang sarupa hata hatiuron i tu Debata di ayat on.” Contoh na asing muse i ma di Johannes 4:​24. Molo di Bibel terjemahan Lembaga Alkitab Indonesia, ayat i mandok, “Tondi do anggo Debata”, jala di Johannes 4:​16, didok “Holong do Debata”. Sarupa mamakke kata sandang do hata Debata di dua ayat i. Alai molo hata “Tondi” dohot “holong” dang mamakke kata sandang. Jadi dang boi dokkonon di dua ayat i sebanding do Tondi i tu Debata, manang sebanding do holong i tu Debata. Jala ala dang sebanding, dang boi diputar ayat i gabe “Debata do Tondi” dohot “Debata do holong”.

Godang pakar ni bahasa Junani dohot akka penerjemah Bibel mandok na dipaboa di Johannes 1:1 i dang na lao paboahon ise sasittongna “Hata” i. Sahalak penerjemah Bibel na margoar si William Barclay mandok, “Ala dang adong dibahen [si Johannes] kata sandang sebelum hata theos na paduahon i, jadi boi dokkonon dang sebanding manang dang sarupa Debata tu Hata i. Lapatanna dang Debata Jesus i.” Sahalak cendekiawan na margoar si Jason David BeDuhn pe mandok songon i, “Di bahasa Junani molo dang adong kata sandang sebelum hata theos songon na didok di Johannes 1:1c, pittor boi do diboto halak na didok disi i ma ‘songon debata’. . . . Jadi dang sarupa lapatan ni hata theos dohot ho theos. Molo hata theos lapatanna ‘songon debata’ alai molo ho theos lapatanna “Debata”. Didok si BeDuhn do muse, “Na didok di Johannes 1:1 i dang Debata Hata i, alai songon debata do. Songon i do tong na didok si Joseph Henry Thayer, sahalak peneliti Bibel American Standard Version. Didok ibana, “Songon debata do Logos [manang, Hata] i, alai dang Debata ibana.”

Toho do sada “rahasia” taringot ise do sasittongna Debata? Dang songon i didok Jesus. Justru tikki martangiang Jesus tu Bapakna, takkas do dipatuduhon ibana dang sarupa ibana tu Bapakna. Didok ibana do, “On do hangoluan na saleleng ni lelengna, ikkon tandaon ni nasida do Ho Debata na Sasada i, na sittong i dohot Jesus Kristus na sinurum.” (Johannes 17:3) Jadi molo porsea do hita tu Jesus jala taattusi akka ajaran ni Bibel, pasti taakkui do Anak ni Debata do Jesus i. Jala holan Jahowa, “Debata na Sasada i” do na ikkon tasomba.