Bibel Mambahen Denggan Ngolukku

AHA do na mambahen sahalak parjuji jala pangarampok boi pasohon kecanduanna jala muba? Jaha ma ceritana.

“Lomo Hian do Au Martaru di Balap Kuda.”​—RICHARD STEWART

TUBU TAON: 1965

NEGERI ASAL: JAMAIKA

RIWAYAT HIDUP: PARJUJI JALA PARJAHAT

NGOLUKKU NA UJU I: Magodang di Kingston do au, ibukota ni Jamaika. Godang do penduduk di kota i, jala pogos do akka halak disi. Godang do na so karejo, jala godang do kejahatan. Gabe mabiar do akka halak na disi ala godang geng parjahat. Hampir tiap ari do tarbege soara ni na manembak.

Kerja keras do omak asa boi au dohot akka adekku sikkola. Dang lomo rohakku sikkola, alai lomo hian do au martaru di balap kuda. Sering do au dang masuk sikkola, dung i lao ma au tu tempat balap kuda. Jala au sandiri pe boi do marhoda.

Mulai sian i, gabe kecanduan ma au martaru di balap kuda. Mangulahon seks na so patut do au, marboru-boru, jala marganja. Jala sering do au mangarampok asa adong hepengku. Godang do sinjatakku, alai uttung ma dang adong halak na hutembak tikki mangarampok au.

Ujungna ditakkup polisi do au jala dipenjarahon. Alai dung bebas, huulahon do muse kebiasaanku jala gabe lam parah do au. Nang pe hira na polos bohikku, alai sebenarna jugul do au, mura-mura muruk, jala kejam. Holan dirikku sandiri do na hupikkiri.

SONGON DIA BIBEL PAUBAHON NGOLUKKU: Tikki godang masalahku, marsiajar Bibel do omak jala gabe Saksi Jahowa ma ibana. Godang do huida perubahan na denggan na dibahen omak. Gabe penasaran do au. Jadi mulai ma dohot au marsiajar Bibel dohot Saksi Jahowa.

Asing do hape na diajarhon Saksi Jahowa sian na diajarhon agama na asing. Jala sian Bibel do sude na diajarhon nasida. Molo menuruthu, holan Saksi Jahowa do na songon halak Kristen di abad na parjolo, na marbarita na uli sian jabu tu jabu. (Mateus 28:19; Ulaon ni Apostel 20:20) Tikki huida na marsihaholongan do nasida sian ias ni roha, pos do rohakku nga juppangku be agama na sittong.—Johannes 13:35.

Dung marsiajar Bibel gabe sadar ma au, ikkon hubahen do perubahan. Gabe huboto ma, dang lomo roha ni Jahowa molo huulahon seks na so patut. Asa boi hubahen las roha ni Jahowa, ikkon hupaso do akka kebiasaan na boi manegai dagingku. (2 Korint 7:1; Heber 13:4) Las do rohakku dung mamboto adong do perasaan ni Jahowa. Boi do hape pangalahokku mambahen lungun rohana manang mambahen las rohana. (Poda 27:11) Jadi hupaso ma marganja, hubolokkon ma sinjatakku, jala hupadenggan ma sifathu. Na paling maol hupaso, i ma mangulahon seks na so patut dohot marjuji.

Mulana dang olo au paboahon tu akka dongan di genghu, na lagi marsiajar Bibel au dohot Saksi Jahowa. Alai sadar ma au dung hujaha hata ni Jesus di Mateus 10:33 na mandok, “Manang ise na maila mananda au di jolo ni jolma, au pe maila ma mananda ibana di jolo ni Damang na di banua ginjang i.” Jadi hupaboa ma tu akka donganku, na lagi marsiajar Bibel au dohot Saksi Jahowa. Tarsonggot do nasida. Dang porsea nasida halak na songon au naeng gabe halak Kristen. Alai hupaboa do tu nasida, dang olo be au songon najolo i ngolukku.

LABA NA HUDAPOT: Las hian do roha ni omak dung huihutton prinsip ni Bibel di ngolukku. Dang jantungan be ibana mambege barita taringot au. Saonari boi ma hami rap makkatai taringot holongnami tu Jahowa. Sipata huingot do songon dia ngolukku najolo. Jala mandok mauliate do au, ala diurupi Jahowa do au makana boi au muba. Dang olo be au songon najolo i ngolukku, na mangulahon seks na so patut jala holongan di hepeng.

Molo dang marsiajar Bibel hian au, pasti nga mate au saonari manang dipenjara. Alai saonari las do rohakku rap manomba Jahowa dohot istrikku na sai mangurupi au dohot borukku na burju. Mandok mauliate do au tu Jahowa ala diloas au gabe bagian ni organisasina na marsihaholongan. Mandok mauliate do tong au ala adong dope halak na olo mangajari au marsiajar Bibel. Alani i, gabe lomo ma rohakku mangurupi halak na asing marsiajar Bibel. Jala na paling penting, mandok mauliate do au tu Jahowa ala ditarik Ibana au.

[Kutipan]

“Gabe huboto ma adong do perasaan ni Jahowa. Boi do hape pangalahokku mambahen lungun rohana manang mambahen las rohana”

[Gambar]

Godang do huida perubahan na denggan na dibahen omak

[Gambar]

Rap dohot istri dohot borukku