Tubu di Santo Domingo di Republik Dominika do au. Siappudan do au sian opat tubu ni omak. Parsikkola na timbo do natua-tuakku, jala lomo do roha ni nasida asa mardongan hami dohot halak na burju jala na jujur. Opat taon sebelum tubu au, pajuppang ma natua-tuakku dohot misionaris sian gareja Mormon. Lomo do roha ni natua-tuakku mangida nasida alana rapi do nasida jala sopan makkatai. Ujungna diputusson natua-tuakku ma bergabung tu gareja i. Termasuk do keluarganami na parjolo di pulo i na bergabung tu Gareja Mormon, manang Gereja Yesus Kristus dari Orang-Orang Suci Zaman Akhir.

Dung remaja au, lomo do rohakku dohot tu akka kegiatan ni gareja Mormon. Jala lomo do rohakku tu gareja i ala diajarhon nasida songon dia asa bahagia akka keluarga jala asa denggan pangalahotta. Bangga do au gabe jemaat ni gareja Mormon, jala marcita-cita do au gabe misionaris.

Tikki marumur 18 taon au, pinda ma hami sekeluarga tu Amerika Serikat asa boi au kuliah di universitas na jago. Sataon dukkon i, ro ma inang udakku dohot bapa udakku tu jabunami di Florida. Saksi Jahowa do nasida. Diundang nasida do hami dohot tu kebaktian ni nasida. Las do rohakku mangida akka halak na ro tu kebaktian i. Alana hubereng sude do nasida mambukka Bibelna be jala mambahen catatan. Jadi hupangido do tong pulpen dohot harotas asa boi dohot au mambahen catatan.

Dung sae kebaktian i, ditawarhon bapa uda dohot inang uda ma tu au asa marsiajar Bibel. Alana dibege nasida naeng gabe misionaris do cita-citakku. Setuju do au, alana dang pola godang na huboto taringot isi ni Bibel. Holan taringot Kitab ni Gareja Mormon do na huboto.

Marhite telepon do hami marsiajar Bibel. Jadi tikki i, didok bapa uda dohot inang udakku asa hubandikkon ajaran ni garejakku tu isi ni Bibel. Didok nasida, ikkon hupastihon do dia na sittong.

Godang do ajaran ni Mormon na huhaporseai. Alai dang huboto atik na sadalan akka ajaran i tu isi ni Bibel. Jadi dikkirim inang udakku ma majalah Awake! 8 November 1995. Dipaboa do di majalah i taringot akka ajaran ni gareja Mormon. Tarsonggot do rohakku alana dipaboa do di majalah i taringot akka ajaran ni gareja Mormon na so huboto dope. Jadi hubukka ma situs web resmi ni gareja Mormon lao memastihon toho do na dipaboa di majalah i manang na dang. Dung hupareso toho do hape. Jala dung lao au tu akka museum ni gareja Mormon di Utah, gabe lam pos ma rohakku toho do na dipaboa di majalah i.

Saleleng on, hurippu do sadalan Kitab ni Gareja Mormon tu isi ni Bibel. Alai dung hujaha sude isi ni Bibel, gabe huboto ma godang do hape ajaran ni Bibel na maralo tu isi ni Bibel. Contohna di Kitab ni Gareja Mormon di Alma 42:9 didok mangolu dope tondi ni halak na mate. Hape dang songon i na didok di Hesekiel 18:4.

Asing ni i, hurang lomo do rohakku tu ajaran ni Mormon na pasangappu tu negara. Contohna porsea do halak Mormon di Jackson County, Missouri, Amerika Serikat do Taman Eden. Jala didok akka pamimpin ni gareja Mormon do, di sada tikki “lao mamaretta ma Debata marhite pamarettaon ni Amerika Serikat jala dang adong na boi manaluhon i”.

Gabe bingung ma au mamikkirhon, boha do annon akka negara na asing, termasuk ma hutakku. Di sada tikki, ditelepon sahalak doli-doli ma au. Lagi dilatih do ibana asa boi gabe misionaris di gareja Mormon. Jadi husukkun ma ibana, olo do ibana marporang tu halak Mormon na sian negara na asing molo marporang negarana tu negara ni nasida. Dialusi ibana ma olo! Gabe tarsonggot do au mambege i. Jadi hupareso ma muse ajaran ni gareja Mormon, jala husukkun ma tu akka pamimpin ni gareja i. Alai didok nasida, rahasia do sude alusna jala ikkon sabar do au paimahon i.

Gabe kecewa do au mambege alus ni nasida i. Gabe hupikkiri ma muse boasa marcita-cita au gabe misionaris. Dung i, sadar ma au. Sebenarna tujuanku naeng mangurupi akka halak do. Asing ni i, hira sada hasangapon do huhilala molo gabe misionaris. Alai sebenarna dang takkas dope hutanda Debata. Nang pe sering hujaha isi ni Bibel, alai dang huargai i. Jala dang huboto aha tujuan ni Debata manoppa jolma dohot tano on.

Dung marsiajar Bibel au dohot Saksi Jahowa, gabe huboto ma goar ni Debata. Gabe huboto ma boha do keadaan ni halak na mate, aha do na diulahon Jesus lao pasautton lomo ni roha ni Debata, jala godang dope na huboto. Ujungna, gabe boi ma huattusi isi ni Bibel jala las rohakku paboahon i tu halak na asing. Najolo huboto do memang adong Debata. Alai saonari tikki martangiang au, hira na makkatai tu dongan kompakku do au. Tardidi ma au tanggal 12 Juli 2004, jala onom bulan dukkon i merintis ma au.

Saleleng lima taon, karejo do au di kantor pusat ni Saksi Jahowa di Brooklyn, New York. Las do rohakku karejo disi ala boi au mangurupi mambahen Bibel dohot akka sijahaon na bermanfaat tu marjuta halak. Saonari pe tong do huurupi akka halak mananda Debata.