Mulai sian dakdanak, lomo hian do rohakku tu alam. Jotjot do hami sekeluarga mardalani tu hutan dohot tu tao na bagak di hutanami di Jyväskylä, Finlandia Tengah. Lomo do tong rohakku tu binatang. Tikki dakdanak au, molo huida huting dohot biang, pittor naeng huhaol do i! Dung magodang au, jut do rohakku mangida akka halak na jahat tu binatang. Ujungna, bergabung ma au tu sada organisasi punguan ni akka halak na melindungi binatang.

Jotjot do hami paboahon informasi taringot melindungi binatang. Demon do tong hami lao mangalo akka toko na manggadis barang sian bulu ni binatang. Jala dialo hami do akka laboratorium na mamakke binatang gabe uji coba ni nasida. Asing ni i, dibahen hami do muse sada organisasi na baru lao melindungi binatang. Ala jotjot do hami mamakke tindakan kekerasan, gabe marbadai ma hami tu akka pamaretta. Nungnga piga-piga hali au ditakkup jala diboan tu pengadilan.

Asing ni i, marsak do rohakku mamikkiri akka masalah na adong di portibi on. Ujungna, masuk ma au tu piga-piga organisasi, termasuk ma i organisasi Amnesty International dohot Greenpeace. Hulehon do nasa gogokku lao mangurupi ulaon ni akka organisasi i. Berjuang do au lao mangurupi akka halak na pogos, na so mangan, dohot sude halak na susa.

Ujungna sadar ma au, dang boi hupadenggan hape portibi on. Nang pe boi akka organisasi i pasaehon piga-piga masalah, alai godang dope masalah na umbalga sian i na so boi dipasae nasida. Hira adong ma sada kekuatan na jahat na mangarajai portibi on, jala dang adong na parduli tusi. Dang tarbahen au manang aha.

Lungun do rohakku ala dang tarbahen au manang aha. Alani i, mulai ma hupikkiri taringot Debata dohot taringot Bibel. Najolo, hea do au marsiajar Bibel rap dohot Saksi Jahowa. Nang pe burju nasida jala parduli tu au, dang siap dope au muba tikki i. Alai asing do sahali on.

Mulai ma hujahai Bibelhu. Songon ubat do i na mangubati lukka di rohakku. Gabe huboto ma, godang do hape akka ayat ni Bibel na mangajari hita asa burju tu binatang. Contohna, Poda 12:10 mandok, “Diparrohahon halak na tigor marroha do binatang na dipiaro ibana.” Huboto ma muse, dang Debata hape na mambahen masalah di portibi on. Alai ala dialo jolma do paretta ni Debata, gabe susa ma nasida. Jala las hian do rohakku tikki huboto na parholong do Jahowa jala sabar.​—Psalmen 103:​8-​14.

Dung i, hukirim ma kupon lao mangido bukku Apa yang Sebenarnya Alkitab Ajarkan? Dang leleng dukkon i, ro ma sepasang suami istri Saksi Jahowa tu jabukku, jala ditogihon nasida do au marsiajar Bibel. Dung i, ro do tong au marpungu tu Bale Harajaon ni nasida. Hasilna, gabe lomo do rohakku tu akka naung huparsiajari sian Bibel.

Ala marsiajar Bibel, gabe godang ma au muba. Dang marisap jala dang minum-minum be au. Hupadenggan ma penampilanku jala dang kasar be au makkatai. Dung i, dang sogo be rohakku tu akka pamaretta. (Rom 13:1) Jala dang huulahon be gaya hidup bebas, songon mangulahon seks na so patut.

Alai na paling maol huulahon, i ma kaluar sian organisasi na melindungi jolma dohot binatang. Dang boi hatop hutinggalhon i. Di mulana, hira na berkhianat do au huhilala molo kaluar sian organisasi i. Alai huboto ma, holan Harajaon ni Debata do na boi padenggatton portibi on. Ujungna, huputusson ma mangalehon sude ngolukku lao mangurupi akka halak marsiajar taringot Harajaon ni Debata.​—Mateus 6:​33.

Tikki gabe aktivis sosial dope au, holan dua macam do jolma di au, jolma na burju dohot jolma na jahat. Pittor hualo do molo adong huida jolma na jahat. Alai dung marsiajar Bibel, dang sogo be rohakku tu akka halak. Gariada, hubahen do sian nasa gogokku lao makkaholongi sude halak. (Mateus 5:​44) Sada cara au patuduhon holong, i ma paboahon barita na uli taringot tu Harajaon ni Debata. Las hian do rohakku alana ulaon on boi mangurupi nasida asa marlas ni roha, asa marpos ni roha tu janji ni Debata, jala makkilala dame ni roha.

Gabe tenang ma pikkiranku ala hupasahat sude tu Jahowa. Ala Ibana na manoppa saluhutna, pos do rohakku dang pasombuonna susa jolma dohot binatang salelengna. Jala dang pasombuonna sega tano na uli on. Alai lao padengganonna do i satokkin nai marhite Harajaonna. (Jesaya 11:​1-9) Las hian do rohakku boi mamboto taringot janji i, jala las do tong rohakku paboahon janji i tu akka halak. Dang hudok be ikkon padengganokku do portibi on.