1, 2. Aha do na pinaboa ni angka Sintua kaliling asa diulahon di huria?

DI HARORO ni sintua kaliling marrapot ma nasida dohot angka sintua na adong di huria, huhut diida sintua kaliling i ma sude dongan sintua na adong disi. Las rohana mangida angka sintua na ringgas mangula di huria i. Deba sian nasida nunga matua, nunga dos songon natuatuana. Alai adong dope na ringkot na laho sihatahononna. Disungkun ibana, ”Brur, aha do naung dibahen hamu mangurupi angka donganta baoa asa adong tanggung jawabna di huria?” Songon naung diboto nasida, tingki di haroro ni sintua kaliling na parpudi nunga dijujui nasida asa mangurupi angka donganta baoa. Ujungna, sahalak sian sintua i mangalusi, ”saotik dope na boi diulahon hami.” Satolop do sude angka sintua i di hata i.

² Molo hamu sahalak sintua, hea do ra dihilala hamu songon i. Angka sintua kaliling mangida porlu angka sintua  mangarohahon angka donganta baoa na poso nang na matua asa boi dipangke gogona laho manarihon na porlu di huria. Alai, sipata ndang mura laho mangulahon songon on. Boasa?

3. (a) Songon dia do Bibel paboahon na ringkot do mangajarajari donganta baoa, jala boasa hita sude porlu mangarohahon on? (Ida surat na di toru.) (b) Boasa deba sintua sipata maol laho mangajarajari angka donganta baoa na asing?

³ Songon sahalak sintua, diboto hamu ringkot do mangajarajari angka donganta baoa na asing. * Diboto hamu do diharingkothon huria do angka baoa, laho mangaradoti huria asa tongtong togu jala boi mangurupi huria na jongjong di pudian ni ari. (Jaha Jesaya 60:22.) Bibel mandok hamu ingkon ”mangajari na asing.” (Jaha 2 Timoteus 2:2.) Ndang sai mura mangulahon on, hamu ingkon manarihon na porlu di parsaripeon, di parkarejoan. Sarihononmu muse ulaon di huria dohot ulaon na asing na ringkot. Saonari boi ma taulas boasa tutu ringkot mangarohahon angka donganta baoa di huria jala mangajarajari nasida.

4. Boasa sipata dipalelengleng angka sintua mangajari donganta baoa na asing?

⁴ Boasa songon na maol laho mangajarajari donganta baoa na asing? Ninna roha ni na deba: ’Adong dope ulaon na rumingkot di huria, molo parpudi pe mangajarajari donganta baoa ndang pola lola ulaon di huria.’ Toho do i? Tutu do adong ulaon na ingkon jalo diulahon, alai molo dipalelengleleng hamu do laho mangajarajari donganta baoa, huria do na gabe susa.

5, 6. Aha do na boi taparsiajari sian sahalak supir? Songon dia do boi on tapatudos tu pangajarajarion di huria?

⁵ Songon tudosan. Ingkon paresoon ni supir do miak dohot oli ni motorna asa boi mardalan. Alai olo do rumingkot di rohana mangisi miak sian mangganti oli. Alai molo torus diboan motor on, sada tingki gabe sega ma motor i. Ujungna lola ma ibana, habis ma tingki dohot hepengna padengganhon motor i. Aha do parsiajaranna?

⁶ Ingkon sarihonon ni sintua aha na ringkot di huria. Molo so i, susa do huria i. Songon supir na ingkon mangisi miak, angka sintua ingkon ”manangkasi na rumingkot”. (Pilippi 1:10) Deba sintua godang ulaonna gabe ndang sanga be nasida mangajarajari donganta baoa na asing, sarupa ma i songon supir na lalap gabe lupa molo oli ni motor ndang diganti. Molo ndang gira sintua mangajarajari donganta baoa di huria, ndang pola sadia leleng nai ndang adong be baoa na malo laho mangulahon ulaon na adong di huria.

7. Songon dia do panghilalaanta mangida angka sintua na rade mangajarajari?

⁷ Jadi unang dirimpu hamu pangajarajarion i ndang pola porlu. Sintua na manarihon huria asa tongtong denggan jala na mangajarajarai angka donganta baoa, i do sintua na marbisuk na arga di sude donganta na di huria. (Jaha 1 Petrus 4:10.) Boha do huria asa mandapot laba?

8. (a) Boasa ingkon diajarajari sintua sude donganta baoa na asing? (b) Angka sintua mangaradoti angka na ringkot di huria, alai aha dope na ringkot na ingkon ulahonon ni nasida? (Ida ma kotak ” Ulaon na Rumingkot”.)

⁸ Nang pe naung leleng gabe sintua, ingkon tongtong do serep marroha jala porlu ingotonna molo lam matua ndang boi be bahenonna sogot songon sisaonari. (Mika 6:8) Jala, porlu botoon nasida, molo ”tingki dohot parsorion” so panagaman boi gabe mambahen sintua ndang boi be mangaradoti ulaon di huria. (Parjamita 9:11, 12; Jakobus 4:13, 14) Jadi molo dihaholongi jala disarihon sintua do sude ruas ni Jahowa, ingkon marsitutu do nasida asa mangajarajari angka donganta baoa na poso, sude naung pinarsiajaran ni nasida hian.

9. Aha do na masa na laho ro na mambahen pangajarajarion mansai ringkot?

⁹ Arga do tutu angka sintua na rade mangajarajari angka donganta baoa ala on sude mangkorhon na denggan jala boi lam patoguhon huria. Dung i muse pangajarajarion on mambahen godang donganta baoa boi mangurupi huria marsada ni roha jala asa sai marsihohot tu Debata. Nasida tahaporluhon tarlumobi ala mangolu hita di ariari parpudi, nasida pe tongtong dihaporluhon tingki haporsuhon bolon haduan. (Hesekiel 38:10-12; Mika 5:5, 6) Di bahen i angka sintua na hinaholongan, parhaseang hamu ma tingki laho mangajarajari angka donganta baoa sian saonari.

10. Asa adong tingki mangajarajari donganta baoa, aha do na porlu bahenon ni angka sintua?

¹⁰ Huboto hami do, tontu godang do ulaonmu ala ingkon mangaradoti ulaon na ringkot di huria. Alani i, pangke hamu ma deba tingki muna laho mangaradoti ulaon di huria huhut mangajarajari. (Parjamita 3:1) Denggan ma molo songon i diulahon hamu jala manghorhon na denggan do i tu huria tu joloan ni ari.

11. (a) Aha do na denggan taida sian pandapot ni angka sintua na mambahen pangajarajarion di angka inganan di luat na marasingasing? (b) Songon na didok di Poda 15:22, boasa porlu mangulas angka pandapot ni sintua na asing?

¹¹ Ndang leleng dope, angka sintua na marhasil disungkun: Songon dia dibahen nasida boi denggan mangajarajari. * Dos do sude alus na pinaboa ni nasida nang pe asingasing be situasina. Aha do na boi taida sian on? On patuduhon molo pangajarion marhite Bibel marlapatan tu sude angka na diajarajari ”Di nasa Huria.” (1 Korint 4:17) Parsiajaran on dohot parsiajaran na mangihut, mangulas poda ni angka sintua on (Poda 15:22) Didok ma na mangajarajari i guru, na diajarajari i parsiajar.

12. Aha do na porlu siparadeon ni sahalak guru, jala boasa songon i?

¹² Parjolo, sahalak guru porlu mangida tingki na pas. Boasa songon i? Doshon songon sahalak pangula, parjolo ingkon paradeonna tano inganan panuanan, dung i pe asa disuan boni. Suang songon i do sahalak guru porlu paradeonna parjolo roha ni halak siajaranna, dung i pe asa diajarhon parbinotoan laho mangajarajari ulaon na baru. Boha do bahenon ni sintua mangida tingki na pas laho mangajarajari? Boi do ihuthononna tiruan na binahen ni sahalak guru na malo i ma panurirang Samuel.

13-15. (a) Aha do didok Jahowa ulahonon ni si Samuel? (b) Songon dia do si Samuel paradehon roha ni si Saul tu sada ulaon? (Ida gombar di mula ni parsiajaran.) (c) Boasa na disurat di Bibel taringot si Samuel denggan tu angka sintua saonarion?

 ¹³ Di sada tingki hirahira 3.000 taon naung salpu, dipaboa Jahowa tu panurirang naung matua i ma si Samuel: ”Marsogot songon on, suruhononku tu ho sada halak sian tano Benjamin, asa miahanmu ibana bahen partogi ni bangsongku Israel.” (1 Samuel 9:15, 16) Diboto si Samuel ma ndang be ibana manguluhon bangso Israel, i do alana disuru Jahowa ibana mamiahi sada panggomgom. Asa paradehon baoa i tu ulaon on, dilului si Samuel ma dalan dohot tingki laho patulushon sangkapna.

¹⁴ Marsogotna i diida si Samuel ma si Saul jala didok Jahowa tu si Samuel: ”I ma baoa i”. Laos satongkin i diulahon ibana ma songon naung sinangkapna hian. Dilului ibana ma tingki na pas asa boi ibana manghatai tu si Saul. Dijou si Samuel ma si Saul dohot naposona rap mangan jala dipahundul ma ibana di halang ulu, diparade ma jagal naung dipapulik tu jolo ni si Saul. Didok si Samuel ma: ”Antong pangan ma! Ai nunga sinimpan hian di ho tu ari raja on.” Dung sae mangan, ditogihon si Samuel ma si Saul tu jabuna. Tingki di pardalanan tusi rap manghatahatai ma nasida na dua. Dung sahat nasida di jabu ni si Samuel, nangkok ma nasida tu loteng, jala diuduti ma ’manghatai dohot si Saul di atas tarup’ sahat tu na laho modom nasida. Marsogot na i, dimiahi si Samuel ma si Saul, dihaol, jala dilehon godang tudutudu. Dung i, laho ma si Saul jala pos rohana tu ulaon naung dipasahat tu ibana.—1 Samuel 9:17-27; 10:1.

¹⁵ Si Saul dimiahi asa manguluhon sada bangso. Aha na dibahen si Samuel di tingki i ndang dos songon na laho sibahenon ni sintua saonari on laho mangajarajari angka donganta baoa asa gabe sintua manang gabe parhobas. Alai adong parsiajaran tadapot sian na binahen ni si Samuel laho paradehon roha ni si Saul. Taida ma dua parsiajaran sian i.

16. (a) Boha do alus ni si Samuel tingki mangido raja halak Israel? (b) Songon dia do panghilalaan ni si Samuel tingki disuru Jahowa ibana mamiahi si Saul?

¹⁶ Rade ma, unang mardua roha. Dung dibege si Samuel halak Israel mangido raja, jut ma rohana jala ndang dioloi. (1 Samuel 8:4-8) Pola tolu hali didok Jahowa tu ibana asa ditangihon nasida. (1 Samuel 8:7, 9, 22) Nang pe ndang olo, ndang na mangiburu si Samuel manang na muruk ala adong na naeng manggantihon ibana manguluhon halak Israel. Tingki didok Jahowa asa miahanna si Saul, ndang mardua roha ibana. Rade do ibana mangoloi, ndang na holan ala boi diulahon ibana, alai sasintongna ala dihaholongi do Jahowa.

17. Songon dia do sintua maniru si Samuel saonari, jala aha do las ni roha na dihilala nasida?

¹⁷ Godang do angka sintua naung mangihuthon sitiruon naung binahen ni si Samuel mardongan holong mangajarajari angka donganta baoa. (1 Petrus 5:2) Angka sintua on rade mangajarajari angka donganta baoa jala ndang mabiar nasida mangalehon deba ulaon di huria tu parsiajar i. Gariada, gabe ”dongan pangula” ma nasida na manarihon  na ringkot di huria. (2 Korint 1:24; Heber 13:16) Angka sintua on marlas ni roha mangida parsiajar na mamangke haboion nasida mangurupi ruas ni Jahowa.—Ulaon Ni Apostel 20:35.

18, 19. Aha do bahenon ni sintua paradehon roha ni parsiajar asa marpos ni roha tingki diajarajari, jala boasa ringkot on?

¹⁸ Ndang guru sambing, alai gabe aleale ma. Tingki jumpang dohot si Saul boi do tongkin i dimiahi si Samuel ibana gabe raja na baru. Alai ndang rade dope ibana manguluhon bangso ni Debata. Alai, dipangke si Samuel do tingkina laho paposhon roha ni si Saul asa boi mangulahon ulaon on. Tingki so dimiahi dope si Saul, rap mangan nasida, rap sadalanan, leleng manghatahatai, jala rap laho nasida modom. Dipaima si Samuel do tingki na pas asa dimiahi raja na baru i.

¹⁹ Songon i do na boi masa saonari on. Tagan so mangajarajari angka donganta baoa, parjolo ma sintua gabe aleale ni parsiajar. Aha na boi bahenon ni sintua asa pos roha ni parsiajarna on saguru tu tingki dohot hasomalan do. Di dia pe hamu maringanan, molo diparhaseang hamu do tingkimu asa gabe alealena, botoon ni parsiajar i ma molo na arga do nasida di hamu. (Jaha Rom 12:10.) Tutu do, hamuliatehonon ni parsajar i do holong dohot tingki naung nilehonmu tu nasida.

20, 21. (a) Songon dia do hita manggombarhon sada guru na marhasil? (b) Aha do na laho siulasonta di parsiajaran na mangihut?

²⁰ Sahalak guru na marhasil ingkon olo do mangajarajari donganna. Ndang holan i, ingkon tongtong do haholonganna halak na diajarina i. (Bandingkon tu Johannes 5:20.) Boasa on porlu? Alana molo diboto parsiajari na dihaholongi hamu nasida, nasida pe rade ma manjalo parsiajaran sian hamu. Alani i hamu angka sintua, denggan ma hamu ndang holan mangajar, alai tongtong ma gabe songon sada aleale na burju.—Poda 17:17; Johannes 15:15.

²¹ Dung rade roha ni sahalak parsiajar asa marpos ni roha, boi ma ajaranmu nasida. Songon dia do isara ni sintua laho mangajarajari? Ulasonta ma on di parsiajaran na mangihut.