Marlina: Horas, eda. Las rohangku ala ro eda tu ulaon Parningotan ari hamamate ni Jesus Minggu naung salpu i. * Denggan do diida eda ulaon i?

Serli: Denggan do nian. Alai ndang sude huantusi jamita i. Na huboto, godangan do halak marningot ari hatutubu ni Jesus sian ari hamamatena. Alai, boi do patorangon ni eda boasa ringkot taulahon ari hamamate ni Jesus?

Marlina: Toho do na nidok ni eda i, gumodangan do halak marningot ari hatutubu ni Jesus, alai molo di Sitindangi Ni Jahowa ari hamamatena do na rumingkot. Adong dope tingki ni eda asa hupatorang?

Serli: Adong, patorang eda ma.

Marlina: Hami, Sitindangi Ni Jahowa mangulahon parningotan tu ari hamamate ni Jesus ala ibana sandiri do na mamarentahon, andorang so mate ibana. Diingot eda do na rap mangan i Jesus dohot angka siseanna i?

Serli: Marulaon na badia i do tahe?

Marlina: I do. Adong do na mandok i Borngin Parningotan ni Tuan. Tingki i, dilehon Jesus parenta tu angka siseanna jala disurat do parenta i di Lukas 22:19 olo do eda manjahahon?

Serli: Olo. ”Jala dihindat ma roti, dipasupasu ma, diponggoli jala diparlehon ma tu nasida, huhut ma didok: daginghu do on, na nilehon humongkop hamu ula hamu ma i, bahen parningotan di ahu.’”

Marlina: Mauliate da. Taida ma hata parpudi na didok Jesus di ayat i, ”ula hamu ma i, bahen parningotan di ahu.” Jala molo taparateatehon hata andorang so parenta i adong do disi dipaboa Jesus boasa ingkon taulahon i. Didok ibana lehononna do hosana humongkop angka jolma na mangihuthon ibana. Hata na sarupa didok ibana di Mateus 20:28, didok di ayat i ”Songon anak ni jolma i pe ndada asa dioloi halak ibana, umbahen na ro, ibana balik pangoloi jala mangalehon hosana bahen tobus ni torop jolma.” Jadi Sitindangi Ni Jahowa mangulahon parningotan hamamate ni Jesus—marningot pelean tobusan naung dilehon ibana. Jala hamateanna boi paluahon hangoluan ni angka jolma na mangoloi ibana.

Serli: Hea do hubege halak mandok Jesus i mate laho humongkop hita, alai ndang huantusi aha do lapatan ni i.

 Marlina: Ndang holan eda na maol mangantusi i. Toho do ndang mura mangantusi tobusan i. Alai, on ma hasintongan na ringkot na disurat di Bibel. Adong dope tahe tingki ni eda?

Serli: Adong

Marlina: Ndang leleng dope, adong hujaha taringot tobusan, boi do hupatorang saotik?

Serli: Boi

Marlina: Asa boi taantusi boasa ringkot tobusan i, parjolo ingkon taboto do panghorhon ni dosa ni si Adam dohot si Hawa tu nasida. Tabungka ma jo sada ayat di Rom 6:23 boi do jahaon ni eda?

Serli: Boi, ”Ai upa tinuhor ni dosa do hamatean, alai basabasa ni Debata do hangoluan salelenglelengna marhitehite Kristus Jesus Tuhanta i.”

Marlina: Mauliate da. Taulas ma jo ayat on. Ayat i dipungka dohot hata ”upa tinuhor ni dosa do hamatean.” On ma uhum na parjolo dilehon Debata tu jolma. Panghorhon ni dosa i ma hamatean. Di mulana ndang mardosa dope jolma i, tipak do hangoluan ni si Adam dohot si Hawa jala pinomparna na ditubuhon nasida pe na laho tipak do. Jadi ndang adong sangkap ni Jahowa na laho mate nasida. Si Adam dohot si Hawa ro di angka pinomparna boi marlas ni roha mangolu salelenglelengna. Alai, mangolu salelenglelengna do nasida?

Serli: Daong, dipangan si Adam dohot si Hawa do parbue ni hau na nioraan ni Debata i.

Marlina: I do, tingki dipangan parbue ni hau i, na mangalo tu Debata—do nasida. Gabe mardosa ma nasida. Boi ma dohonon, nasida sandiri do mambahen dirina gabe so tipak, parohon jea ma on tu nasida dohot tu pinomparna.

Serli: Hurang huantusi, aha do lapatanna?

Marlina: Antar songonon. Hea do eda mambahen kambang loyang?

Serli: Hea

Marlina: Adong ma dituhor eda tuangan ni kambang loyang na baru, hape dabu gabe matopik ma tuangan i. Molo tapangke tuangan i gabe dohot ma topik sude kambang loyang i kan?

Serli: I do tutu!

Marlina: Suang songon i ma si Adam dohot si Hawa tingki mangalo tu Debata, gabe ”matopik” manang mardosa ma nasida. Ala so tubuan anak dope nasida andorang so mardosa, jadi sude pinomparna i mardosa ma. Di Bibel hata dosa lapatanna ndang holan tu pangalaosion na taulahon, alai dohot do dosa na tatean. Jadi—dung mardosa si Adam dohot si Hawa—sude angka pinomparna dohot do manean dosa i na manghorhon tu hamatean. Ingkon taae do i nang pe ndang adong dosa na taulahon. Gariada boi dohonon andorang so tubu dope hita nunga mardosa. Songon na didok di Rom 6:23, upa tinuhor ni dosa do hamatean.

Serli: Boasa songon i ate, si Adam dohot si Hawa do na mardosa, boasa gabe sude jolma manaon hasusaon?

Marlina: Ala ni i ma diuhum Debata si Adam dohot si Hawa gabe mate nasida. Alai ala partigor Ibana ndang pasombuon ni Debata sude pinomparna songon i. Dilehon do panghirimon i ma tobusan marhite Jesus. Tajaha ma muse Rom 6:23. Dunghon hata ”Ai upa tinuhor ni dosa do hamatean.” Didok ayat i muse, ”Alai basabasa ni Debata do hangoluan salelenglelengna marhitehite Kristus Jesus Tuhanta i.”  Jadi hamatean ni Jesus mangalehon dalan tu hita asa malua sian dosa dohot hamatean. *

TOBUSAN SILEHONLEHON NI DEBATA NA UMMARGA

Marlina: Adong do muse na denggan na boi taida sian ayat on.

Serli: Aha ma i?

Marlina: Parrohahon ma muse ayat on, didok dison ”Basabasa ni Debata do hangoluan salelenglelengna marhitehite Kristus Jesus Tuhanta i.” Jesus do na mate laho humongkop hita, alai boasa ma didok ayat on tobusan i ”Basabasa ni Debata”? Boasa ma ndang didok ”Basabasa ni Jesus”? *

Serli: I do ate boasa songon i?

Marlina: Debata do na manompa si Adam dohot si Hawa. Tingki mardosa nasida di porlak Eden, tu Debata do nasida mardosa. Mansai lungun do roha ni Debata tingki i, alai jalo do dipatuduhon Jahowa dalan. * Marsangkap do Ibana asa ro tu tano on sada surusuruan na tinompaNa, asa mangolu gabe sada jolma na tipak na boi mangalehon tobusan tu jolma. Jadi basabasa ni Debata do tobusan i. Jala hea do dirimangi eda songon dia panghilalaan ni Debata tingki mate Jesus?

Serli: Ndang hea dope daba.

Marlina: Piga do tahe gelleng ni eda?

Serli: Dua.

Marlina: Songon sada natuatua, hilala ma jo songon dia do panghilalaan ni Jahowa tingki mate anak na i? Songon dia ma panghilalaanNa tingki ditangkup, direhei dung i dilinsingi anak hinaholonganNa i? Songon dia do panghilalaanNa tingki dilabang di sada hau dung i marsiak jala mate anakNa i?

Serli: Hansit nai roha ni Debata ate, ndang hea tarpingkir ahu sahat tusi.

Marlina: I do eda. Nang pe ndang boi tabayanghon songon dia hansit ni roha ni Jahowa tingki i, alai taboto do dihilala Ibana do i jala taboto boasa dipasombu Ibana masa sisongon i. Dipaboa ma i di Johannes 3:16. Olo do eda manjahahon?

Serli: ”Ai songon on do holong ni roha ni Debata di portibi on, pola do anakNa na sasada i dilehon, asa unang mago ganup na porsea di Ibana, asa hangoluan salelenglelengna di Ibana.”

Marlina: Mauliate da. Parrohahonma hata na parjolo di ayat on ”Ai songon on do holong ni roha ni Debata di portibi on.” Jadi ala holong do Debata tu hita umbahen dilehon anakNa i. Alani i marhite pelean tobusan ni Jesus tangkas ma holong ni Debata tu hita, jala ala ni i ma Sitindangi Ni Jahowa marpungu ganup taon laho marningot hamatean ni Jesus. Boi do antusan ni eda hatorangan nangkin?

Serli: Boi mauliate da.