1. Aha do na somal di pingkiran ni angka jolma godangan?

HITA mangolu di tongatonga ni jolma na mangulahon angka ulaon na rorang. Umpamana, di godangan halak ndang sala molo adong baoa marjolmahon baoa, manang sampur tu sasahalak na so saut dope gabe dongan saripena. Film, ende, buku dohot iklan godang pataridahon angka ulaon na rorang. (Psalmen 12:8) Alai diurupi Jahowa do hita asa manghilala hangoluan na sonang jala pasonangkon rohaNa. Boi do hita ias di tongatonga ni jolma na mangulahon ulaon na rorang.—Jaha 1 Tessalonik 4:3-5.

2, 3. (a) Boasa ingkon tatundalhon giotgiot ni roha na sala? (b) Aha do na laho taulas di parsiajaran on?

² Asa boi mambahen las roha ni Jahowa, ingkon tatundalhon ma angka na mambahen sogo rohaNa. Ala so tipak hita, boi do hita tarelaela laho mangulahon angka na rorang songon dengke na manjonok tu umpan. Molo tubu di pingkiranta angka na rorang, pintor tatundalhon ma i. Molo ndang pintor tatundalhon i, giotgiot ni roha tu na rorang boi lam balga jala molo adong tingki laho mangulahon dosa, gabe taulahon ma i. Songon na didok di Bibel: ”Jadi dung manjangkon  sangkapsangkap ni roha i, ditubuhon ma dosa.”—Jaha Jakobus 1:14, 15.

³ Boi do gabe lam balga giotgiot na sala di rohanta. I do alana, porlu manat hita tu giotgiot na adong di bagasan rohanta. Molo boi tatundalhon giotgiot na sala, dao ma hita sian ulaon na rorang dohot panghorhonna na roa. (Galatia 5:16) Di parsiajaran on, taparsiajari ma tolu na boi mangurupi hita mangalo giotgiot ni roha na sala: Paralealeonta tu Jahowa, poda sian hata ni Debata jala pangurupion sian donganta naung toras partondionna.

4. Aha do na ringkot ulahonon ni aleale ni Jahowa?

⁴ Dipaboa Bibel do tu angka jolma na laho manjonok tu Debata asa: ”Paias ma tangan muna,” jala ”pabontor ma roha muna.” (Jakobus 4:8) Asa gabe aleale ni Jahowa hita, ndang holan parniulaonta alai dohot do pingkiranta ingkon pasonangkon rohaNa. Molo ias pingkiranta dohot ma ias rohanta. (Psalmen 24:3, 4; 51:8; Pilippi 4:8) Diantusi Jahowa jolma na so tipak do hita jala boi do ra tubu di pingkiranta angka ulaon na rorang. Ala ndang lomo rohanta mambahen hansit roha ni Jahowa, taulahon ma angka na boi taulahon asa boi manundalhon angka pingkiran na sala. (1 Musa 6:5, 6) Na mambahen ias pingkiranta ma na sai taulahon.

5, 6. Songon dia do tangiang boi mangurupi hita laho manundalhon giotgiot ni daging na rorang?

⁵ Urupan ni Jahowa do hita laho manundalhon pingkiran na rorang molo sai martangiang hita mangido pangurupion tu Ibana. Diparade Jahowa do tondi parbadia asa boi mangurupi hita tongtong ias. Di bagasan ganup tangiangnta, tapasahat ma tu Jahowa asa pingkiranta sai mamingkirhon na pasonangkon Ibana. (Psalmen 19:14) Di bagasan serep ni roha, tapangido ma tu Ibana asa diurupi hita laho mamareso pingkiran na boi mambahen hita mangulahon dosa. (Psalmen 139:23, 24) Sai pangido ma pangurupion sian Jahowa asa boi hita margogo laho manundalhon ulaon parmainanon jala mangulahon na sintong nang pe maol.—Mateus 6:13.

⁶ Andorang so maraleale hita tu Jahowa, olo do ra hita jotjot mangulahon ulaon na so dihalomohon rohaNa. Boi do ra borat dope hita manadingkon giotgiot ni roha na sala. Alai boi do urupan ni Jahowa hita asa mangulahon angka ulaon na pasonangkon rohaNa. Songon, dung mangalangkup si Daud raphon si Batseba, manolsoli situtu ibana di parniulaonna i, jala martangiang ibana mangido ”roha na ias” jala mangido pangurupion sian Jahowa asa sai marsihohot. (Psalmen 51:12, 14) Jadi, molo adong dope di hita giotgiot na roa na hea taulahon najolo jala saonari marsitutu dope hita laho manundalhon i, boi do urupan ni Jahowa hita asa mangoloi Ibana jala mangulahon na sintong. Boi do urupanNa hita asa mangarajai pingkiranta na so tipak i.—Psalmen 119:133.

7. Songon dia do Bibel boi mangurupi hita manundalhon pingkiran na rorang?

⁷ Boi do alusan ni Jahowa tangiangnta marhite Bibel. Dapotnta ma bisuk ni Debata sian i. (Jakobus 3:17) Tingki tajaha Bibel ganup ari, na mangisi pingkiran dohot angka na ias ma hita disi. (Psalmen 19:8, 12; 119:9, 11) Jala di bagasan Bibel pe, godang angka tudosan dohot angka sipasingot na boi mangurupi hita  manundalhon pingkiran dohot giotgiot na rorang.

8, 9. (a) Aha do na mambahen sahalak dolidoli mangulahon parmainanon dohot boruboru na so hasea? (b) Songon disurat di Poda bindu 7, angka situasi sisongon dia do na ingkon tatundalhon?

⁸ Di Poda 5:8, dipasingot do hita asa manundalhon angka pingkiran na rorang. Di Poda bindu 7, tajaha ma adong sada dolidoli na laho mardalandalani tu jonok jabu ni boruboru na so hasea tingki borngin. Tindang ma boruboru i di parsimpangan dalan marpahean na so pantas. Dipajonok ibana ma tu baoa i, dihaol jala diumma, huhut dihatahon ibana ma hata na parohon giotgiot ni roha na rorang. Ndang ditundalhon baoa i giotgiot na sala i, na mambahen ibana gabe mangulahon parmainanon. Nang pe ndang marsangkap hian tusi roha ni dolidoli i, alai gabe diulahon ibana ma i jala diae ma hangoluan na paporsuk dirina. Molo dipingkiri ibana hian panghorhon na roa sian i, tontu tundalhononna do borua na so hasea i.—Poda 7:6-27.

⁹ Songon dolidoli i, hita pe boi mangulahon na sala molo so tapingkiri hian panghorhon ni parulaon na sala. Songon, tingki tonga borngin, pigapiga siaran tv patuduhon angka film na rorang. Marjea do molo sai tagantiganti siaran TV holan  laho mangida siaran. Jea na asing molo taketik link di Internet na so taboto aha isina. Dohot ma i mangida chat rooms na marisi iklan na rorang manang link pornografi. Molo masa sisongon on tu hita, aha na taida boi patubuhon roha laho mangulahon angka na rorang, ujungna ndang mangoloi tu Jahowa.

10. Boasa marjea molo marroharoha tu na so dongan saripena? (Ida gombar di mula ni parsiajaran.)

¹⁰ Dipatorang Bibel do songon dia sahalak baoa pantun maradophon sahalak borua. (Jaha 1 Timoteus 5:2.) Halak Kristen, boi patuduhon holong ni roha holan tu dongan saripena manang tu sasahalak na laho dongan saripena. Molo dipatudu nasida holong sisongon i, ndang na ulaon na rorang i. Pigapiga halak mandok ndang sala molo patuduhon holong sian pangeal ni dagingna, pardalanna, pangambe ni tanganna manang pangidaan na asing tu baoa manang borua, asal ma unang marsijamaan. Alai, molo rap mangelaela do baoa dohot borua, tubu ma pingkiran nasida tu angka ulaon na rorang, ujungna boi gabe mangulahon parmainanon nasida. Nunga hea masa sisongon i jala boi do on masa muse.

11. Aha do na boi taparsiajari sian si Josep?

¹¹ Si Josep ma na patut sitiruonta. Tunggani boru ni si Potifar mangelaela si Josep asa mangulahon parmainanon. Ndang olo si Josep, alai ndang marna so borua i mangelaela si Josep. Ganup ari borua i mangido tu si Josep asa ”sapodoman dohot ibana.” (1 Musa 39:7, 8, 10, Bibel Siganup Ari) Sahalak panulingkit Bibel patorangkon, hirim roha ni tunggani boru ni si Potifar molo holan nasida nadua di jabu i, gabe olo ma si Josep rap modom dohot ibana. Marsitutu do si Josep na so jadi gokhanna pangidoan tunggani boru ni si Potifar. Jala tung na so olo ibana marroharoha tu borua i. Ndang dipasombu si Josep tubu giotgiot na roa. Jala tingki diranggut borua i baju ni si Josep asa mangulahon parmainanon, ”mangarunta do ibana jala marlojong ma tu ruar.”—1 Musa 39:12, Bibel Siganup Ari.

12. Sian dia taboto na manghorhon do na taida tu rohanta?

¹² Nunga dipasingot Jesus hita, aha na taida manghorhon tu rohanta jala boi mambahen tubu giotgiot ni daging na sala. Didok ibana: ”Manang ise na mamereng boruboru huhut marsangkap na roa, nunga saut dilangkup i di bagasan rohana.” (Mateus 5:28) On ma na masa tu raja Daud. ”Hehe ma si Daud sian podomanna jala mardalandalan di atas tarup ni bagas ni raja i, gabe diida ma sian atas tarup i sada parompuan na maridi, uli situtu do rupa ni parompuan i” ndang mansohot ibana mangida borua i. (2 Samuel 11:2) Gariada lam dipingkiri ibana, nang pe borua i tunggani boru ni halak. Jala tubu ma giotgiot ni dagingna na roa jala diulahon ma parmainanon dohot borua i.

13. Boasa ingkon tabahen ”parjanjian” dohot matanta, jala songon dia hita mangulahonsa?

¹³ Molo naeng tatundalhon pingkiran na rorang taringot parmainanon, taingot ma si Job. Didok ibana: ’Nunga marjanji ahu tu matangku.’ (Job 31:1, 7, 9) Songon si Job, boi do hita marsitutu asa ndang mamingkirhon parmainanon tu sasahalak na taida. Jala molo taida gombar na rorang di komputer, di iklan, majalah manang na aha pe, ingkon hatop ma tatundalhon matanta sian i.

14. Aha do na ingkon taulahon asa tongtong ias?

¹⁴ Molo tarimangi aha naung taulas,  olo do ra ringkot dihilala hamu manundalhon angka pingkiran dohot giotgiot ni daging na rorang. Molo ringkot dihilala hamu laho mambahen hamubaon, pintor ulahon ma! Molo dioloi hamu na didok Jahowa, boi ma pasidingonmu angka ulaon parmainanon jala tongtong ias.—Jaha Jakobus 1:21-25.

15. Molo maol tahilala manundalhon giotgiot na rorang, aha do labana molo tapangido pangurupion?

¹⁵ Molo hira na maol manundalhon giotgiot na rorang, patolhas ma tu sahalak donganta naung leleng manomba Jahowa jala na boi mangalehon poda na denggan sian Bibel tu hamu. Ndang sai mura paboahon i tu na asing, alai mansai ringkot do molo tapangido pangurupion. (Poda 18:1; Heber 3:12, 13) Donganta naung matoras di partondion boi mangurupi hamu asa boi mambahen hamubaon. Dung i, marsitutu ma asa muba hamu. Molo diulahon hamu i, tongtong ma hamu maraleale tu Jahowa.

16, 17. (a) Songon dia do angka sintua boi mangurupi angka dongan na bangkol manundalhon giotgiot na rorang? Bahen tudosan. (b) Molo adong na jotjot mangida pornografi boasa mansai ringkot mangido pangurupion?

¹⁶ Angka sintua do na dumenggan laho mangurupi hita. (Jaha Jakobus 5:13-15.) Saleleng pigapiga taon, sada dolidoli di Brasil borat situtu laho manundalhon giotgiot ni daging na sala, didok ibana: ”Huboto aha na hupingkirhon ndang mambahen las roha ni Debata, alai maila do ahu molo ingkon hupaboa tu na asing.” Sahalak sintua mamparrohahon dolidoli on manghaporluhon pangurupion jala manjujui ibana asa mangido pangurupion sian sintua. Donganta dolidoli i mandok: ”Tarsonggot situtu ahu, ndang hurimpu songon i burju ni angka sintua tu ahu, burju jala diantusi nasida aha na huhilala. Denggan ditangihon tingki hupasahat sude na di rohangki. Marhite Bibel diurupi nasida ma ahu laho paulakhon paralealeonhu tu Debata, ditangiangkon nasida ahu, rap martangiang hami. I do na mambahen ahu mura manjalo sipasingot sian nasida.” Dung lam togu paralealeonna tu Jahowa, didok ibana: ”Huparhatutu ma na porlu mangalului pangurupion ni na asing sian holan mamingkiri sandiri.”

¹⁷ Molo somal do hamu manonton pornografi, pintor hatop ma hamu mangido pangurupion. Lam tapaleleng mangido pangurupion, gabe lam mura ma mangulahon parmainanon. Ujungna gabe susa ma na asing tabahen jala boi do on parohon lea tu goar ni Jahowa. Godang do na mangido pangurupion sian angka sintua jala mangulahon poda ni nasida, asa pasonangkon roha ni Jahowa jala sai tongtong boi marsaor di huria.—Psalmen 141:5; Heber 12:5, 6; Jakobus 1:15.

18. Hita ingkon marsitutu laho mangulahon aha?

¹⁸ Portibi ni Sibolis nunga rorang jala lam tu rorangna. Alai naposo ni Jahowa ingkon marsitutu mampartahanhon pingkiran na ias. Mansai las roha ni Jahowa mangida halak Kristen sisongon i. Martahi ma hita asa sai jonok tu Jahowa jala mangihuthon angka sipasingot sian Bibel dohot huria. Molo taulahon on, marlas ni roha ma hita jala marpanggora ni roha na ias. (Psalmen 119:5, 6) Jala di ari na naeng ro, dung diripashon Sibolis, mangolu saleleng ni lelengna ma hita di portibi na imbaru na so adong be angka ulaon na rorang.