Sahalak tunggani doli jala ama ni dua dakdanak na margoar si Paul mandok: ”Tingki masa krisis parhepengon di negaranami, arga jala maol ma luluan sipanganon. Marjom hami jongjong laho paimahon pambagian ni sipanganon. Alai, disi sahat hami di jolo nunga habis be sipanganon i. Lam marniang ma angka halak alani haraparon jala na deba pingsan di dalan alani malena. Sipanganon dohot haporluan na asing pe lam arga, adong na marjuta gariada adong na marmiliar argana. Ujungna, ndang mararga be hepeng. Habis ma hepeng na husimpan di bank, di asuransi, dohot hepeng pensiunku.”

Diantusi si Paul do asa boi malua keluargana sian haraparon i, ingkon pangkeonna do ”habisuhon dohot pangantusion.” (Poda 3:21, Bibel Siganup ari) ”Tungkang listrik hian do ahu, alai dung masa haraparon, huulahon do manang aha nang pe otik gajina. Pigapiga mangalehon sipanganon dohot haporluan di jabu gabe gajingku. Molo adong na mangalehon opat batang sabun di ahu, hupangke ma dua jala hugadis ma na dua nai. Boi ma hutuhor 40 ekor anak ni manuk. Dung balga manuk i, hugadis ma dung i hutuhor ma 300 ekor anak ni manuk. Dung balga sude manuk i, hutungkar ma 50 ekor tu 50 kilo jagung sipanganonnami. Ala adong jagung on, boi ma martahan mangan keluargangku dohot pigapiga sisolhothu.”

Diboto si Paul do na rumingkot di tingki i, marpos ni roha tu Debata. Molo taulahon na nidok ni Debata, urupanNa ma hita. Jala taringot haporluan di parngoluonta didok Jesus do: ”Unang pola susa jala holsoan hamu mamingkiri aha sipanganonmuna dohot siinumonmuna . . . Diboto Amamuna i do na porlu angka i di hamu.”—Lukas 12:29-31.

Asing ni i, musu ni Debata i ma Sibolis mangotootoi halak di liat portibi on asa holan mangkaringkothon hepeng. Olo do marsak angka halak taringot haporluan ni nasida. Alai haporluan na so apala ringkot do dilului nasida. Alani i, gabe godang  ma halak na marutang jala dihilala nasida ma hata na mandok: ”Gabe hatoban ni parsingir do parutang.”—Poda 22:7 Bibel Siganup ari.

Pigapiga halak mambahen haputusan na parohon jea. Songon na nidok ni si Paul: ”Torop halak manadingkon keluarga dohot sisolhotna laho mangalului parngoluon na dumenggan di luar negeri. Pigapiga ndang boi mangalului karejo ala ndang adong pasportna. Jotjot nasida martabuni sian polisi jala modom di dalan ma nasida. Ndang diasahon nasida Debata laho mangurupi. Alai anggo ahu dohot keluargangku boi mangadopi krisis ni parhepengon on alani pangurupion ni Debata do.”

Satolop do si Paul tu hata ni Jesus na mandok: ”Unang ma holsohon hamu ari marsogot, ai sarihonon ni ari marsogot do na ringkot disi. Sae do, molo masiporsan hasusaanna be angka ari.” Dung i, dipatorang ibana ma muse ndang pola godang na hupangido sian Debata di tangiangku, holan asa dilehon ma ’di hami sadari on hangoluan siap ari.’ Jala diurupi Debata do hami songon na nidok ni Jesus. Ndang sai boi dapot na di rohanami. Hea do ahu jongjong paimahon pambagian ni sipanganon, alai disi sahat ahu di jolo, holan yogurt do na adong. Ndang lomo rohangku mangallang i. Alai, i ma diallang hami di borngin i. Mandok mauliate do ahu tu Debata ala ndang hea hami dipasombu saleleng masa haraparon on. *

”Pintor tu hepeng do rohanta molo masa sisongon on. Alai sian pengalamannami, marsihohot tu Debata do na rumingkot. Sai na urupan ni Jahowa * do hita molo taulahon lomo ni rohaNa. Nunga huhilala hami na nidok ni Psalmen 34:9: ’Dai jala ida hamu denggan basa ni Jahowa, martua ma baoa na marhaposan tu Ibana.’ Alani i, ndang mabiar be hami molo adong krisis di parhepengon muse.”

”Huparhatutu do, ndang na parkarejoan manang hepeng na dihaporluhon jolma asa malua sian haraparon, alai sipanganon do. Maimaima do hami tingki digohi Debata janjiNa na mandok: ’Jadi gabe situtu ma eme di tano on.’ Di tingki i, ’molo adong di hita sipanganon dohot parabiton, sae ma i di hita.’ Jala lam togu ma hami alani hata ni Bibel on: ’Unang ma marholong ni roha di hepeng pangalahomuna; hasabamhon hamu ma na adong! Ibana sandiri do mandok: ”Sandok na so tadingkononku do ho; sandok na so pasombuonku do ho!” Asa tung pos rohanta mandok: ”Tuhan i do pangurupi di ahu, ndang mabiar ahu.”’” *

Si Paul dohot keluargana patuduhon haporseaon na togu laho mardalan ”mardonganhon Debata”. (1 Musa 6:9) Taadopi manang na daong krisis di parhepengon saonari, pengalaman ni si Paul on patuduhon ringkot ni marpos ni roha, habisuhon dohot pangantusion.

Alai songon dia do molo adong na marsak alani na masa di keluarga?