1. Apostel Johannes manjujui hita mangarimangi aha, jala boasa?

DI 1 Johannes 3:1, apostel Johannes manjujui asa bagas tarimangi holong ni Jahowa. Si Johannes mandok, ”Ida hamu ma godang ni haholongon na binasabasahon ni Ama i tu hita!” Molo tarimangi songon dia Jahowa patuduhon holongNa, lam solhot jala lam holong ma rohanta tu Ibana.

2. Boasa maol halak mangkilala holong ni Debata?

² Pigapiga halak ndang mangantusi songon dia Jahowa mangkaholongi nasida. Didok do Debata ndang mamparrohahon jolma, holan mambahen patik jala manguhum halak na sala do Ibana. Pangajarion na sala on, mambahen nasida mandok Debata kejam. Alani i, gabe maol ma nasida mangkaholongi Ibana. Na asing mandok, dihaholongi Debata do sude jolma manang aha pe na diulahon nasida. Alai, dung marsiajar Bibel, taboto ma hasintongan taringot Jahowa. Taboto ma haholongon do Debata. Dilehon Debata do anakNa gabe tobusan. (Johannes 3:16; 1 Johannes 4:8) Ala taadopi hasusaan di parngoluon on,  maol ma hita mangkilala holong ni Debata.

3. Aha do na mangurupi hita asa mangantusi holong ni Jahowa?

³ Asa taantusi holong ni Debata, ingkon tatanda do na manompa hita, i ma Jahowa. Dilehon do tu hita hangoluan. (Jaha Psalmen 100:3-5.) Digombarhon ma di Bibel jolma na parjolo i, ”anak ni Debata.” (Lukas 3:38, Bibel siganup ari) Jesus mangajar hita asa manjou Jahowa ”Amanami na di banua ginjang!” (Mateus 6:9) Jahowa do Ama di hita, jala dihaholongi do hita songon sada ama na mangkaholongi ianakhonna.

4. (a) Ama songon dia do Jahowa? (b) Aha do na taulas di artikel on dohot artikel na mangihut?

⁴ Maol do diantusi pigapiga halak songon dia ama na parholong. Ala ndang diparrohahon amana nasida sian dakdanak, hansit do dihilala na marbapa. Alai, ndang hea Jahowa mangulahon sisongon i. Ibana do Ama na umburju di hita. (Psalmen 27:10) Dihaholongi jala diparrohahon Debata do hita. Alani i, lam tahilala holong ni Debata, lam holong ma rohanta tu Ibana. (Jakobus 4:8) Di artikel on, taulas ma opat isara ni Jahowa patuduhon holongNa tu hita. Di artikel na mangihut, taulas ma opat isara songon dia hita patuduhon holong tu Debata.

5. Aha do dilehon Debata tu sude jolma?

⁵ Tingki di Junani si Paulus di huta Aten, diida ibana ma godang ganaganaan jala dihaporseai mangalehon hangoluan tu halak Aten. Alani i, didok si Paulus ma tu nasida, Debata do ”na tumompa hasiangan on ro di saluhut isina”. Didok si Paulus muse, Debata do ”mangalehon di sudena hangoluan dohot hosa ro di saluhutna”, jala ”di bagasan Ibana do hita mangolu, manggulmit jala humosa”. (Ul. 17:24, 25, 28) Dilehon Jahowa do sude na tahaporluhon asa las rohanta mangolu. Pingkirhon ma aha naung dilehon Jahowa tu hita marhite holongNa.

6. Inganan na songon dia do dilehon Debata tu hita? (Ida gombar di mula ni parsiajaran.)

⁶ Diparade Jahowa do inganan na denggan di hita. (Psalmen 115:15, 16) Sian sude planet na ditompa ni Debata, holan portibi do na asing. Nunga disulingkiti angka ilmuwan godang planet, alai, holan portibi do na boi diingani jolma. Ndang holan haporluanta na dilehon Jahowa. Dilehon do inganan na uli jala denggan asa las rohanta mangolu. (Jesaya 45:18) Molo tarimangi inganan na dilehon ni Jahowa tu hita, tahilala ma holongNa.—Jaha Job 38:4, 7; Psalmen 8:4-6.

7. Songon dia do isara ni Jahowa manompa hita patuduhon holongNa?

⁷ Isara ni Jahowa na asing patuduhon holongNa, i ma ditompa hita tumiru rupaNa. (1 Musa 1:27) Lapatanna, tahilala ma holongNa, jala boi tapatudu holong tu Ibana. Diboto Jahowa do, molo taulahon on, las ma rohanta. Sahalak dakdanak marlas ni roha molo diboto na dihaholongi natuatuana ibana. Jesus mangajarhon, martua ma hita molo maraleale tu Jahowa. (Mateus 5:3) Dilehon Debata do ”saluhut sihalashononta.” Tangkas ma, parholong jala pardenggan  basa do Jahowa.—1 Timoteus 6:17; Psalmen 145:16.

8. Boasa lomo rohanta diajari Jahowa?

⁸ Ndang lomo roha ni sada ama parholong molo ianakhonna mangulahon na sala jala gabe susa. Godang do natuatua ndang mangkalomohon aturan ni Bibel taringot na sala dohot na sintong. Alani i, ndang diboto nasida mangajari ianakhonna, on parohon arsak ni roha. (Poda 14:12) Alai, Jahowa mangalehon pangajarion na dumenggan tu ianakhonNa ala Ibana do ”Debata ni hasintongan.” (Psalmen 31:6) Las do roha ni Jahowa mangajarhon hasintongan taringot diriNa dohot isara manomba Ibana. Diajari do hita asa denggan ngolunta. (Jaha Psalmen 43:3.) Aha do naung diajarhon Jahowa tu hita na patuduhon holongNa?

9, 10. (a) Boasa dipaboa Jahowa tu hita taringot diriNa? (b) Aha do na diajarhon Jahowa taringot sangkapNa?

⁹ Na parjolo, diajari Jahowa do hita taringot diriNa. Lomo do rohaNa asa tatanda Ibana. (Jakobus 4:8) Alani i, dipaboa Ibana do tu hita ise goarNa. Sian sude goar na asing di Bibel, goar ni Debata do na gumodang disurat. Dipaboa Jahowa do tu hita songon dia hadirionNa. Molo taparrohahon angka na tinompaNa, taboto ma huaso dohot bisuk ni Debata. (Rom 1:20) Molo tajaha Bibel, taparsiajari ma hatigoranNa dohot holongNa tu hita. Molo taparsiajari parange ni Jahowa, lam solhot ma hita tu Ibana.

¹⁰ Dipaboa Jahowa do tu hita taringot sangkapNa. Didok do hita keluargaNa, jala dipaboa do songon dia hita asa marsada jala mardame dohot na asing. Tangkas do dipatudu di Bibel, ndang boi tatontuhon aha na denggan dohot na sala tu dirinta. (Jeremia 10:23) Diboto Jahowa do na dumenggan tu hita. Jala holan mangoloi Ibana do boi dame jala las rohanta. Diajari Jahowa hita hasintongan on, alani holongNa do tu hita.

11. Aha do dipaboa Jahowa taringot ari na naeng ro?

¹¹ Ama parholong mamingkiri hangoluan ni ianakhonna tu ari sogot. Dihalomohon do asa marlas ni roha nasida. Saonari, godang jolma holsoan taringot ari na naeng ro. Alani i, marsitutu ma nasida mangalului arta na holan parsatongkinan. (Psalmen 90:10) Mandok mauliate ma hita tu Jahowa, ala diajari asa denggan ngolunta saonari. Jala dijanjihon do ngolu na dumenggan tu ari sogot!

12. Songon dia do Jahowa mangurupi si Kain dohot si Baruk?

¹² Tingki diida Jahowa si Kain mangulahon na sala, diurupi Jahowa do ibana, jala disungkun ma, ”Boasa muruk ho? Boasa murhing bohim? Molo diula ho na denggan, minar ma bohim.” (1 Musa 4:6, 7, Bibel siganup ari) Alai, si Kain ndang manangihon Jahowa, gabe susa ma ngoluna. (1 Musa 4:11-13) Di tingki na asing, dipasingot Jahowa ma si Baruk ala marmetmet ni roha dibahen  hasalaanna sandiri. Didok Jahowa ma tu si Baruk ingkon marhamubaon do ibana. Ditangihon si Baruk do Jahowa jala parohon haluaon ma tu dirina.—Jeremia 45:2-5.

13. Aha do labana molo marsihohot naposo ni Jahowa mangadopi sitaonon?

¹³ Ditogu jala dipinsang Jahowa do hita alani holongNa. Ndang holan tingki na tahaporluhon hita dipasingot, di tingki na asing pe diajari Ibana do hita. (Heber 12:6) Dipaboa do di Bibel angka naposo ni Jahowa, na diajari asa lam denggan parangena. Umpamana si Josep, si Musa dohot si Daud mangadopi sitaonon na borat. Saleleng mangadopi hasusaan i, didongani Jahowa do nasida. Ala marsihohot mangadopi sitaonon i, rade ma nasida mangulahon tanggung jawab na umbalga na dilehon Jahowa. Di Bibel, tajaha ma songon dia Jahowa mangurupi jala mangajari naposoNa, on mambahen hita mangkilala holong ni Jahowa.—Jaha Poda 3:11, 12.

14. Molo taulahon na sala songon dia do Jahowa patuduhon holongNa?

¹⁴ Nang pe hea taulahon na sala, sai dihaholongi Jahowa do hita. Molo tasolsoli jala muba rohanta, ”buas do rohana” manesa dosanta. (Jesaya 55:7) Aha do lapatanna? Si Daud mandok sai marpangulahi do roha ni Jahowa, on patuduhon Ama parasi roha do Ibana, ”Ibana do manesa dosam sudena, Ibana pamalum angka sahitmu sudena. Ibana paluahon ngolum sian hamagoan, Ibana martumpalhon tu  ho denggan basa dohot asi ni roha. Songon dao ni habinsaran sian hasundutan dipadao Ibana sian hita angka pangalaosintai.” (Psalmen 103:3, 4, 12) Marragam do isara ni Jahowa maminsang dohot manogu hita. Olo do hamu marhamubaon? Taingot ma, dipinsang Jahowa hita alani holongNa do.—Psalmen 30:6.

15. Aha do isara ni Jahowa na asing patuduhon holongNa tu hita?

¹⁵ Diondingi ama parholong do keluargana sian mara. Songon i ma nang Jahowa tu hita. Di Psalmen didok, ”Ibana do siramoti tondi ni angka na niasianna, sai paluaonna do nasida sian tangan ni parjahat.” (Psalmen 97:10) Rimangi ma: Ala arga do di hita simalolongta, sai taondingi do i. Songon i ma nang Jahowa, ala arga do naposoNa di Ibana, sai diondingi do nasida.—Jaha Sakaria 2:12.

16, 17. Songon dia do Jahowa mangondingi naposoNa najolo dohot saonari?

¹⁶ Najolo dohot saonari, diondingi Jahowa do naposoNa marhite surusuruan. (Psalmen 91:11) Laho paluahon naposo ni Jahowa, dibunu surusuran do 185.000 tentara ni Assur di bagasan saborngin. (2 Rajaraja 19:35) Di abad na parjolo, dipalua surusuruan do si Petrus, si Paulus, dohot na asing sian hurungan. (Ul. 5:18-20; 12:6-11) Songon i ma nang saonari, masa ma porang di sada negara di Afrika. Susa jala marserak ma jolma alani parsalisian, panangko, pemerkosaan, dohot pamunuan. Nang pe ndang adong donganta na mate, godang do na agoan arta. Alai, dihilala do holong ni Jahowa jala diboto na diparrohahon Debata nasida. Nang pe susa, boi do nasida marlas ni roha. Tingki ro donganta sian kantor pusat, disungkun ma songon dia barita ni nasida, dialusi ma, ”Denggan do hami sude, mauliate ma tu Jahowa!”

¹⁷ Adong do naposo ni Jahowa na mate ala marsihohot, songon si Stepanus dohot na asing. Olo do masa sisongon i tu hita ganup marsadasada. Alai, sai diondingi Jahowa do punguan ni naposoNa sian jorat ni Sibolis. (Epesus 6:10-12) Dipasingot ma hita marhite Bibel, dohot angka buku sian organisasi. Umpamana, taparsiajari do jorat ni Sibolis marhite Internet, holongan di hepeng, parmainanon dohot angka buku, film manang game na patuduhon hajahaton. Tangkas ma dihaholongi jala diondingi Jahowa do hita sian jea.

18. Songon dia do pangkilalaanmuna ala dihaholongi Jahowa?

¹⁸ Tingki dirimangi si Musa aha naung dibahen ibana laho marhobas tu Jahowa, pos ma rohana dihaholongi Jahowa do ibana jala didok ma, ”Disi torang ari pasabam ma rohanami marhitehite asi ni roham, asa marolopolop jala marlas ni roha hami di saluhut ariarinami.” (Psalmen 90:14) Las ma rohanta ala taantusi jala tahilala holong ni Jahowa. Hak na sumurung do dihaholongi Jahowa! Tahilala ma songon na didok si Johannes, ”Ida hamu ma godang ni haholongon na binasabasahon ni Ama i tu hita!”—1 Johannes 3:1.