1. (a) Aha do na masa tu si Petrus tingki masa alogo na gogo di Laut Galilea? (Ida gombar di mula ni parsiajaran.) (b) Boasa naeng lonong si Petrus?

TINGKI manaripar Laut Galilea si Petrus dohot angka sisean na asing masa ma alogo na gogo. Diida nasida ma Jesus mardalan di ginjang ni aek. Alani i, didok si Petrus ma asa mardalan ibana di ginjang ni aek mandapothon Jesus. Tingki disuru Jesus asa didapothon ibana, ruar ma si Petrus sian bagas ni parau i, jala mardalan ma ibana di ginjang ni aek. Alai lam leleng, naeng lonong ma si Petrus. Boasa? Ala diida alogo na gogo dohot galumbang gabe mabiar ma ibana. Dipangido si Petrus ma pangurupion sian Jesus jala ditogu ma ibana huhut didok, ”Ho, siotik haporseaon; aha ma pola ganggu roham?”—Mateus 14:24-32.

2. Aha do na taulas di artikel on?

² Parrohahon ma tolu na boi taparsiajari sian si Petrus: (1) songon dia do si Petrus patuduhon haporseaonna tu Jahowa, (2) boasa gale haporseaon ni si Petrus, (3) aha do na mangurupi si Petrus patoguhon haporseaonna. Parrohahon  ma songon dia on mangurupi hita asa ”marsihohot marhaporseaon.”—1 Korint 16:13.

3. Boasa hatop si Petrus ro mandapothon Jesus, jala songon dia do on dos tu hita?

³ Togu do haporseaon ni si Petrus. Boasa tadok songon i? Tingki Jesus manuru si Petrus ro mandapothon ibana, hatop do ruar si Petrus sian parau jala mardalan di ginjang ni aek. Pos do rohana, lehonon ni Jahowa gogo tu ibana dos songon na dilehon tu Jesus. Songon i ma nang hita, tingki dipillit Jesus hita mangihuthon ibana, talehon do dirinta tu Jahowa jala tardidi. Boasa? Ala holong rohanta tu Jahowa dohot tu Jesus jala pos rohanta na diurupi do hita.—Johannes 14:1; jaha 1 Petrus 2:21.

4, 5. Boasa arga di hita haporseaon?

⁴ Arga do haporseaon. Haporseaon ni si Petrus mambahen ibana boi mardalan di ginjang ni aek, na so boi ulahonon ni jolma. (Mateus 21:21, 22) Songon i ma nang hita, haporseaon mangurupi hita mangulahon ulaon na so tolap gogo ni jolma. Godang do sian hita naung muba pangalahona. Olo hita muba, ala holong do rohanta tu Jahowa, jala diurupi Ibana hita mangulahon i. (Jaha Kolosse 3:5-10.) Haporseaon manjujui hita mangalehon diri tu Jahowa, gabe alealeNa, jala boi ma taulahon na so tolap gogo ni jolma.—Epesus 2:8.

⁵ Haporseaon mambahen hita togu. Umpamana, haporseaon mangurupi hita mangalo Sibolis, musunta na gogo. (Epesus 6:16) Ala porsea hita tu Jahowa, ndang marsak be hita tingki adong sitaonon. Molo pos rohanta tu Jahowa jala tajumolohon HarajaonNa, lehononNa do na tahaporluhon. (Mateus 6:30-34) Na rumingkot, molo porsea tu Jahowa, mangolu ma hita salelenglelengna.—Johannes 3:16.

6, 7. (a) Tu aha do dipatudos alogo na gogo dohot galumbang na mambahen mabiar si Petrus? (b) Boasa boi mago haporseaonta?

⁶ Dung mardalan si Petrus di ginjang ni aek, mabiar ma ibana. Boasa? Ala diida ibana alogo na gogo dohot galumbang. Dos ma songon sitaonon na diadopi halak Kristen saonari. Nang pe borat sitaonon i, dilehon Jahowa do pangurupion tu hita. Taingot ma aha na masa tu si Petrus. Ndang alani alogo na gogo dohot galumbang umbahen lonong si Petrus. Bibel paboahon, ”Alai mamereng alogo na gogo i, mabiar ma ibana.” (Mateus 14:30) Ndang ditangihon ibana be Jesus, mabiar ma ibana tu alogo na gogo i, gale ma haporseaonna. Songon i ma nang hita, molo sai tu sitaonon do pingkiranta, ganggu ma rohanta tu Jahowa.

⁷ Taboto do, boi do mago haporseaonta. Boasa? Ala didok di Bibel ”dosa na girgir mangkaliangi” hita. (Heber 12:1) Songon si Petrus, molo holan tu sitaonon pingkiranta, hatop do gale haporseaonta. Antong, sian dia do taboto na gale haporseaonta? Sungkunsungkun na adong di angka paragraf na mangihut boi mangurupi hita.

8. Aha do na mambahen ganggu rohanta tu janji ni Jahowa?

⁸ Tongtong do huingot janji ni Jahowa? Umpamana, marjanji do Jahowa mangaripashon portibi na dirajai ni  Sibolis. Alai, tarelaela do hita tu portibi on? Molo i na masa, ganggu ma rohanta tu ajal ni hasiangan na laho ro. (Habakuk 2:3) Na asing muse, diparade Jahowa do tobusan jala rade do Ibana manalpuhon hasalaanta. Alani i, molo sai taingot hasalaanta najolo, gabe ganggu ma rohanta tu Jahowa. (Ul. 3:19) Ujungna, hurang ma hiras ni rohanta manomba Debata dohot marbarita na uli.

9. Aha do na masa molo holan ulaonta sandiri na taharingkothon?

⁹ Nunga hulehon na dumenggan tu Jahowa? Molo marsitutu hita mangulahon lomo ni roha ni Debata, sai tapingkirhon ma janji ni Jahowa. Alai, songon dia do molo holan ulaonta sandiri na taharingkothon? Umpamana, tatambai ma karejonta asa lam godang hepeng, alai, ndang godang be tingkinta marhobas tu Jahowa. On mambahen gale haporseaon manang ”losok” rohanta mangulahon lomo ni roha ni Jahowa.—Heber 6:10-12.

10. Songon dia do hita patuduhon haporseaon na togu tu Jahowa tingki adong na mambahen hansit rohanta?

¹⁰ Maol do ahu manalpuhon hasalaan ni dongan? Molo adong na mambahen hansit rohanta, hatop do hita muruk jala ndang taantoi be nasida? Molo songon i, unang ma holan pangkilalaanta sandiri na taharingkothon. Molo tasalpuhon hasalaan ni dongan, on patuduhon na togu haporseaonta tu Jahowa. Boasa songon i? Molo adong halak na mambahen hansit rohanta, songon na marutang ma ibana tu hita. Molo tabahen hansit roha ni Jahowa, hita marutang tu Ibana. (Lukas 11:4) Alani i, molo tasalpuhon hasalaan ni dongan,  on patuduhon marpos ni roha hita tu Jahowa. Pos rohanta na pasupasuonNa hita. Jala ummarga do pasupasuNa i sian utang na digarar halak tu hita. Jesus mangajarhon tu siseanna asa manalpuhon hasalaan ni na asing nang pe marulakulak dibahen tu nasida. Alani i, dipangido siseanna ma tu Jesus, ”Tambai ma haporseaonnami!”—Lukas 17:1-5.

11. Boasa ingkon tajangkon sipasingot na dilehon tu hita?

¹¹ Jut do rohangku tingki dipasingot? Parrohahon ma sipasingot i, unang hasalaan dohot hahurangan ni halak na pasingothon i. (Poda 19:20) On patuduhon hita marsiajar maniru Jahowa!

12. Aha do na dipatudu molo ndang taoloi sintua di huria?

¹² Huoloi do angka sintua di huria? Tingki diparrohahon halak Israel hata ni sampulu matamata, gabe dialo nasida ma si Musa dohot si Aron. Alani i, disungkun Jahowa ma tu si Musa, ”Sadia lelengna i ndang olo nasida porsea di Ahu?” (4 Musa 14:2-4, 11) Ala mangalo halak Israel tu si Musa dohot si Aron, diboto Jahowa ma ndang porsea be halak Israel tu Ibana. Molo ndang taoloi halak na pinillit ni Jahowa, on patuduhon nunga gale haporseaonta tu Debata.

13. Boasa ndang pola metmet rohanta molo taboto gale haporseaonta?

¹³ Dung taulas sungkunsungkun on, unang ma metmet rohanta molo taboto gale haporseaonta. Ingot ma, hea do si Petrus mabiar jala ganggu rohana. Di tingki i, dipasingot Jesus do sude siseanna, ala ”parhaporseaon na otik” do nasida. (Mateus 16:8) Tadapot ma parsiajaran na denggan sian si Petrus. Parrohahon ma aha na diulahon si Petrus dung ganggu rohana jala naeng lonong ibana.

14, 15. (a) Aha do diulahon si Petrus dung naeng lonong ibana? (b) Songon dia do hita boi mangida Jesus?

¹⁴ Aha do diulahon si Petrus dung naeng lonong ibana? Diboto si Petrus do marlange, boi do ibana hatop mulak tu parau i. (Johannes 21:7) Alai boasa ndang diulahon ibana i? Ala ndang mangasahon dirina sandiri. Diasahon ibana do pangurupion ni Jesus. Molo taboto na gale haporseaonta, tatiru ma si Petrus. Songon dia do mangulahon i?

¹⁵ Songon si Petrus na mangasahon pangurupion ni Jesus, hita pe ”tabereng ma” Jesus. (Jaha Heber 12:2, 3.) Alai, ndang boi taida Jesus mamangke simalolongta songon si Petrus. Songon dia do hita boi mangida Jesus? Parrohahon ma ajaran dohot ulaonna jala tatiru ma ibana. Molo taulahon i, tadapot ma pangurupion na patoguhon haporseaonta. Parrohahon ma isara maniru Jesus.

16. Songon dia do Bibel patoguhon haporseaonta?

¹⁶ Patoguhon haporseaon tu Bibel. Dihaporseai Jesus do Bibel i Hata ni Debata, jala marlaba tu parngoluon. (Johannes 17:17) Laho maniru Jesus, ingkon tajaha, taparsiajari, jala tarimangi Bibel ganup ari. Talului ma alus ni sungkunsungkun on. Porsea do hita naung mangolu di tingki parpudi? Molo taparsiajari surirang ni Bibel taringot ari parpudi, lam togu ma haporseaonta naung jonok ari i. Songon dia do asa lam  togu haporseaonta taringot janji ni Debata? Taparsiajari ma angka surirang ni Bibel naung digohi. Tahaporseai do na marlaba Bibel sahat tu saonari? Tajaha ma pengalaman ni angka donganta na mambahen hamubaon ala marsiajar Bibel. *—1 Tessalonik 2:13.

17. Boasa Jesus boi martahan mangadopi sitaonon, jala songon dia do hita maniru ibana?

¹⁷ Manatap pasupasu ni Jahowa. Jesus manatap pasupasu na laho sijaloonna. On mangurupi ibana martahan mangadopi sitaonon. (Heber 12:2) Ndang hea ibana tarelaela tu portibi on. (Mateus 4:8-10) Songon dia do hita boi maniru Jesus? Rimangi ma janji ni Jahowa taringot tano na imbaru. Pingkiri ma na laho ulahononmu di Paradeiso. Bahen ma daftar ni angka halak na dipahehe na laho jumpanganmu. Songon Jesus, tahilala ma janji ni Debata masa tu dirinta sandiri ndang holan tu halak na asing.

18. Songon dia do tangiang mangurupi asa togu haporseaonta?

¹⁸ Martangiang ma asa togu haporseaonmu. Diajari Jesus do siseanna asa mangido tondi parbadia. (Lukas 11:9, 13) Molo dipangido hamu tondi parbadia sian Jahowa lam togu ma haporseaonmu. On sada sian parbue ni tondi. Tingki martangiang, tangkas ma paboa na solot di rohamu. Umpamana, molo maol hamu manalpuhon hasalaan ni dongan, pangido ma tu Jahowa asa dipatogu haporseaonmu jala boi manalpuhon hasalaan i. 

19. Songon dia do hita mamillit aleale na denggan?

¹⁹ Pillit ma aleale na togu haporseaonna. Manat do Jesus mamillit alealena. Aleale ni Jesus, i ma angka apostel na marsihohot jala na mangoloi ibana. (Jaha Johannes 15:14, 15.) Songon Jesus, manat ma hita mamillit aleale. Tapillit ma na togu haporseaonna, jala na mangoloi Jesus. Aleale na denggan, masipasingotan do dihasalaan ni donganna.—Poda 27:9.

20. Aha do labana molo taurupi na asing patoguhon haporseaonna?

²⁰ Urupi na asing patoguhon haporseaonna. Jesus patoguhon haporseaon ni siseanna marhite hata dohot ulaonna. (Markus 11:20-24) Tatiru ma Jesus. Molo taulahon i, tapatogu ma haporseaonta dohot haporseaon ni na asing. (Poda 11:25) Songon dia do hamu mangurupi halak di luatmu? Tingki taajarhon Bibel tu nasida, patudu ma adong do Debata, diparrohahon do nasida, jala Bibel ma Hata ni Debata. Songon dia do hita patoguhon haporseaon ni angka dongan? Unang ma tapasiding na so mangoloi angka sintua alai, taurupi ma nasida asa lam denggan. (Judas 22, 23) Tingki di singkola, molo diajarhon guru taringot evolusi, barani ma paboahon haporseaonmu taringot panompaon. Ra, las do rohamu, dung diboto guru dohot dongan di singkola haporseaonmu.

21. Aha do janji ni Jahowa tu hita?

²¹ Diurupi Jahowa dohot Jesus do si Petrus asa unang mabiar jala ganggu rohana. Gabe sitiruon ma si Petrus laho patoguhon haporseaon. Marjanji do Jahowa mangurupi hita sude asa togu haporseaonta. (Jaha 1 Petrus 5:9, 10.) Molo marsitutu hita patoguhon haporseaon, urupan ni Jahowa ma hita.