LOBI sian 200 taon naung salpu, ndang adong halak na porsea tu barita na disurat di koran. Hita pe saonari, ndang boi porsea tu sude na tajaha dohot na taida di Internet. Boi do hatop taboto godang informasi online ala nunga lam maju teknologi. Godang do barita na sintong, marlaba jala denggan tu hita, alai gumodang do na so denggan na parohon jea tu hita. Alani i, manat ma hita mamillit aha na tajaha. Tingki sasahalak na baru mamboto mamangke Internet, olo do porsea ibana tu sude barita na masuk tu emailna ala sian donganna do i. Porsea do nasida nang pe barita i, ndang masuk akal ni jolma. Dipaboa do di Bibel, ”Sude do diparhatutu halak na oto i; alai ianggo halak na bisuk diparrohahon do dalanna.”—Poda 14:15, Bibel siganup ari.

Alo ni hata na oto, i ma marbisuk. Halak na marbisuk manat jala holan tu hasintongan do porsea. Ndang olo nasida porsea tu barita na so tutu na adong di Internet, nang pe naung tarsar barita i. Aha do na taulahon asa marbisuk? Na parjolo, tasungkun ma dirinta, ”Sian situs web na resmi do barita on? Manang sian situs web na so tatanda? Adong do situs web resmi na pasarhon barita na so sintong?” * Na paduahon, tapangke ma bisuk. (Poda 7:7) Taulahon ma on molo adong tajaha barita na so tahaporseai. Molo dijaha hamu barita taringot hahurangan ni angka donganta pingkiri ma, ise do na marlas ni roha molo tapaboa barita on, jala boasa lomo rohana tapaboa on.

Adong do halak na paboahon barita tu sude donganna, alai ndang dipareso sintong manang ndang barita i. Jala ndang dipingkiri aha na masa molo dipaboa tu nasida. Olo do diulahon on, asa dipuji halak ala sai parjolo ibana dapotan barita. (2 Samuel 13:28-33) Alai, halak na pasahathon  barita, ingkon mamingkiri aha do pangkorhonna molo dipasahat barita i tu na asing. Umpamana, boi do roa goar ni sasahalak manang sada organisasi alani barita on.

Olo do sasahalak pasahathon barita, alai ndang jumolo dipareso sintong manang ndang barita i, ala godang tingki laho mamareso. Dirimpu ibana, halak na manjalo barita i do na ingkon mamareso. Hape halak na manjalo barita i pe, godang do siulahononna. (Epesus 5:15, 16) Antong, molo ndang pos rohanta tu sada barita, unang ma tapasahat i tu na asing jala tasesa ma sian emailta.

Molo adong barita na masuk tu emailta, tasungkun ma dirinta, ”Pintor hukirim do i tu na asing? Hea do ahu mangangku sala ala paboahon barita na so tutu? Hea do adong na pasingothon ahu asa unang sai mangkirim email?” Porlu do taingot, molo adong email ni donganta, on patuduhon boi do ibana mangalului sandiri aha na dihaporluhon sian Internet. Jala ndang porlu hita mangurupi nasida. Ra, ndang lomo roha ni nasida godang angka video, lawaklawak, manang gombar na takirim tu emailna. Songon i ma nang rekaman dohot catatan ni jamita, unang ma sai takirimi tu na asing. * Ingot ma gumodang do laba na dapot ni sasahalak molo ibana sandiri na mangariset dohot paradehon alus tu parpunguan, sian hita na mangalehon alusna.

Aha do na ingkon ulahononmu molo adong di Internet barita na so tutu taringot organisasi ni Jahowa? Unang ma jaha jala unang ma haporseai barita i! Ndang denggan molo tapaboa barita on tu na asing laho mangido pandapot ni nasida, ala on boi parohon jea. Molo adong diida hamu barita na so denggan di Internet, pangido ma bisuk sian Jahowa jala mangkatai ma hamu dohot halak na matoras partondionna di huria. (Jakobus 1:5, 6; Judas 22, 23) Unang ma longang rohanta molo adong halak na mandok hata na so tutu  taringot sitindangi. Godang do halak na mangkatahon gabus taringot Jesus. Jala dipasingot Jesus do angka siseanna, adong do musu na mangalele nasida jala sai ”dipatubutubu ragam ni hata na roa, na so tutu”. (Mateus 5:11; 11:19; Johannes 10:19-21) Antong, marbisuk ma hamu asa boi mananda dia barita na so sintong dohot barita na mangotootoi.—Poda 2:10-16.

Ingkon manat do hita paboahon barita taringot angka donganta, nang pe taboto tingkos barita i. (Mateus 7:12) Umpamana, ndang patuduhon holong, molo tapaboa hahurangan ni angka donganta. (2 Tessalonik 3:11; 1 Timoteus 5:13) Adong do barita na so boi tapaboa tu na asing (konfidensial), ala adong do tingkina botoon ni nasida i. Alani i, taargai ma haputusan ni nasida taringot tingki dohot songon dia barita on dipaboa. Sasintongna, molo parjolo hita paboahon barita on tu na asing, boi do on parohon jea.

Saonari, boi do hatop tarsar barita na denggan manang na roa dohot barita na marlaba manang na paro jea. Molo tapaboa sada barita tu sasahalak jala dipasahat ibana muse tu na asing, di bagasan pigapiga detik sude jolma na di liat portibi on boi mamboto. Alani i, taorom ma dirinta asa unang pajolojolohon paboahon barita tu na asing. Nang pe holong i ”saluhut do dihaporseai”. Unang ma tahaporseai sude barita na imbaru. (1 Korint 13:7) Jala, unang ma porsea hita tu hata na so tutu taringot organisasi ni Jahowa dohot angka donganta. Ingot ma, na mangalehon dohot na pasarhon hata na so tutu pasonangkon Sibolis, ”ama ni gapgap”. (Johannes 8:44) Alani i, ingkon marbisuk jala manat ma hita pasahathon barita na taida ganup ari. Songon na didok ni Bibel, ”Halak na oto martohap haotoon, alai martumpalhon parbinotoan do ianggo halak na bisuk.”—Poda 14:18.