1, 2. Boasa holong roha ni Jesus tu si Marta, alai aha do hahurangan ni si Marta?

MOLO pandapotmu, halak na songon dia do si Marta? Dipaboa do di Bibel molo si Marta aleale na dihaholongi Jesus. Alai, ndang holan ibana borua na dihaholongi dohot na diargai Jesus. Umpamana, dihaholongi Jesus do si Maria anggi ni si Marta, dohot inongna sandiri na margoar si Maria. (Joh. 11:5; 19:25-27) Antong, boasa holong roha ni Jesus tu si Marta?

² Dihaholongi Jesus do si Marta ala burju, parasi roha, jala ringgas. Alai na rumingkot, ala marhaporseaon na togu do si Marta. Dihaporseai si Marta do ajaran ni Jesus, jala pos do rohana molo Jesus, Messias na dijanjihon. (Joh. 11:21-27) Nang pe songon i, dos songon hita, marhahurangan jala mangulahon na sala do si Marta. Umpamana, tingki martamue Jesus tu jabu ni nasida, sogo do roha ni si Marta tu si Maria, jala didok do tu Jesus asa dipinsang ibana. Didok si Marta ma, ”Tuhan, ndang diantoi roham,  na pinasombu ni anggingki ahu marhobasi sahalakku? Dokkon ibana antong mandongani ahu!” (Jaha Lukas 10:38-42.) Boasa didok si Marta songon i, jala aha do na taparsiajari sian alus ni Jesus?

3, 4. Boasa Jesus mamuji si Maria, jala aha do na boi diparsiajari si Marta sian i? (Ida gombar di mula ni parsiajaran.)

³ Las do roha ni Jesus ala si Marta dohot si Maria manamue ibana tu jabu ni nasida. Jala las do rohana mangajari nasida taringot hasintongan. Pintor hundul do si Maria ”tumangihon hatana”. Lomo do rohana manangihon Jesus, alani i dipuji ma ibana. Sasintongna, si Marta pe lomo do rohana manangihon Jesus.

⁴ Alai, ganggu do roha ni si Marta. Lalap do ibana paradehon marragam sipanganon tu Jesus. Ala ndang dohot si Maria mangurupi ibana, sogo ma rohana jala dipaboa ma tu Jesus. Alai lambok do Jesus mandok, ”O Marta, Marta! Lan do disarihon jala dihasusahon ho!” Didok Jesus ma asa unang pola godang diparade sipanganon. Dung i, dipuji Jesus ma si Maria ala ditangihon ibana. Didok ma, ”Sada do na ringkot! Dipillit si Maria do tohap na uli i; ndang sibuaton i sian ibana.” Ra, olo do ndang diingot si Maria aha ragam ni sipanganon na dipatupa di tingki i, alai ndang lupa ibana tu hata dohot poda ni Jesus. Dung 60 taon lelengna, disurat apostel Johannes ma, ”Holong do roha ni Jesus di si Marta dohot di anggina i.” (Joh. 11:5) Porsea do si Marta tu hata ni Jesus, jala marsihohot do ibana manomba Jahowa saleleng ngoluna.

5. Boasa maol saonari manjumolohon ulaon na ringkot, jala aha do sungkunsungkun na laho taulas?

⁵ Tangkas do taboto gumodang do saonari na mangambati hita manomba Jahowa. The Watchtower 15 September 1958, paingothon angka donganta asa unang ganggu roha ni nasida manomba Jahowa alani teknologi. Di tingki i, lam godang do teknologi na imbaru. Songon majalah, radio, film, dohot acara TV. Majalah on paboahon molo hita nunga lam jonok tu ajal ni hasiangan on, alani i ”lam tu godangna ma na mambahen ganggu rohanta”. Tangkas ma, lam godang do na mambahen ganggu rohanta saonari. Aha do na ingkon taulahon asa tongtong marsihohot manomba Jahowa songon si Maria?

6. Songon dia do naposo ni Jahowa mamangke teknologi?

⁶ Naposo ni Jahowa mamangke teknologi laho marbarita na uli. Umpamana, andorang dohot saleleng porang dunia na parjolo, dipangke nasida do ”Drama-Foto Penciptaan”. Dipangke ma slide dohot video na jempek na marwarna dohot marsoara. Boi ma nasida marbarita tu marjuta halak di godang negara. Di ujung ni ”Drama-Foto Penciptaan”, dipatudu ma masa hadameon dung mamarenta Jesus di tano on. Dungkon i, naposo ni Jahowa mamangke radio laho pasarhon barita Harajaon tu marjuta halak di liat portibi on. Saonari, tapangke ma komputer dohot Internet laho marbarita tu sude halak nang di inganan na pinjil.

7. (a) Boasa paro jea molo taihuthon sude na di portibi on? (b) Aha do na ingkon manat taparrohahon? (Ida surat na di toru.)

 ⁷ Dipasingot Bibel do hita asa unang mangalehon godang tingki mangihuthon sude na di portibi on. (Jaha 1 Korint 7:29-31.) Adong do na denggan sian portibi on na boi taulahon, alai molo ndang manat hita mamangke boi do godang habis tingkinta. Umpamana, marsonangsonang, manonton TV, mardalani, manuhori alat elektronik na baru, mar-chatting, mar-sms, mangkirim email dohot mangida barita olahraga na imbaru. Godang halak mambahen on gabe ulaon na rumingkot di ngoluna. * (Pjm. 3:1, 6) Molo talehon godang tingki tu ulaon na so ringkot, ndang adong be tingkinta mangulahon ulaon di partondion.—Jaha Epesus 5:15-17.

8. Boasa ndang boi tahaholongi na adong di portibi on?

⁸ Sian abad na parjolo sahat tu saonari, dipangke Sibolis do sude na adong di portibi on laho mambahen ganggu rohanta manomba Jahowa. (2 Tim. 4:10) Alani i, dipaboa do di Bibel asa unang tahaholongi na adong di portibi on. Denggan ma asa tapareso songon dia hita mamangke na adong di portibi on dung i, tabahen ma aturan na dihaporluhon. Marsitutu ma hita asa tongtong mangkaholongi Jahowa. Molo taulahon on, mura ma hita mangoloi Jahowa jala lam solhot ma hita tu Ibana.—1 Joh. 2:15-17.

9. Aha do diajarhon Jesus tu siseanna, jala songon dia do ibana gabe sitiruon?

⁹ Dos songon na didok Jesus tu si Marta, didok do tu siseanna asa unang ganggu roha ni nasida manomba Jahowa. Dijujui do nasida asa sai manjumolohon Jahowa dohot HarajaonNa. (Jaha Mateus 6:22, 33.) Jesus mambahen tiruan na denggan taringot on. Ndang adong arta na laho radotan ni Jesus songon jabuna manang tanona.—Luk. 9:58; 19:33-35.

10. Aha do tiruan na dibahen Jesus tu hita?

¹⁰ Ndang adong na boi mambahen ganggu roha ni Jesus laho marbarita na  uli. Umpamana, tingki marbarita Jesus huhut mambahen tanda halongangan di Kapernaum, dipangido godang halak ma asa leleng ibana tading di huta i. Aha do na diulahon Jesus? Ndang olo ganggu rohana. Ibana mandok, ”Ingkon dohot do tu angka huta na asing hubaritahon harajaon ni Debata, ai ala ni i do Ahu disuru.” (Luk. 4:42-44) Mardalan pat do Jesus marbarita na uli tu angka inganan na dao laho manjumpangi godang halak. Nang pe halak na so mardosa ibana, dilehon do tingkina laho maradi ala naung loja marbarita na uli.—Luk. 8:23; Joh. 4:6.

11. Boasa ndang dilehon Jesus rohana tu parsoalan ni sahalak baoa? Aha do na diajarhon Jesus tu angka siseanna?

¹¹ Tingki Jesus mangajar angka siseanna, ro ma sahalak baoa mandapothon ibana jala mandok, ”Guru, dokkon ma amparangku marbagi teanteanannami rap dohot ahu!” Alai ndang dilehon Jesus rohana tu parsoalan ni baoa i, asa unang ganggu rohana laho mangajar. Jala dipaboa ma tu siseanna asa unang ganggu roha ni nasida laho manomba Jahowa.—Luk. 12:13-15.

12, 13. (a) Aha do na mambahen longang roha ni halak Junani mangida Jesus? (b) Aha do na diulahon Jesus tingki dipaboa si Pilippus na laho jumpangan ni halak Junani ibana?

¹² Marsak situtu do roha ni Jesus andorang so mate. (Mat. 26:38; Joh. 12:27) Diboto do na laho mate dibunu ibana. Diboto ibana do godang dope na laho ulahononna. Umpamana, di ari Minggu 9 Nisan, ro do Jesus tu Jerusalem manunggang halode. Godang do na marlas ni roha di harorona. (Luk. 19:38) Sogotna i, dipalao Jesus ma angka partigatiga na adong di bagas joro.—Luk. 19:45, 46.

¹³ Halak Junani na ro tu Jerusalem laho mangulahon Paska, longang mangida aha na diulahon Jesus. Dipangido ma tu si Pilippus asa jumpang nasida dohot Jesus. Alai ndang olo Jesus manjumpangi, nang pe diboto boi nasida paluahon ibana sian angka musuna. Diboto ibana do adong ulaon na rumingkot. Ndang ganggu rohana laho mangulahon lomo ni roha ni Jahowa, i ma mangalehon ngoluna gabe tobusan. Dipaboa ma tu angka siseanna na otik nama tingkina di tano on. Jala sude na mangihuthon Jesus ingkon olo mangalehon ngoluna. Didok Jesus ma, ”Agoan hosa ma na marhamaolhon hosana; alai na mangkasogohon hosana di portibi on, i do na mangaramotisa sahat tu hangoluan salelenglelengna.” Jesus marjanji ”pasangapon ni Ama i” do na mangihuthon ibana jala lehonon ni Debata ma hangoluan salelengna tu nasida. Dipaboa si Pilippus ma barita on tu halak Junani.—Joh. 12:20-26.

14. Aha do ulaon ni Jesus, asing ni marbarita na uli?

¹⁴ Tingki di tano on Jesus, ulaon marbarita do na rumingkot di ngoluna. Nang pe ringkot di ibana marbarita na uli, alai dilehon ibana do tingkina mangulahon na asing. Umpamana, ro do ibana tu sada pesta jala dibahen do tanda halongangan, i ma aek gabe anggur. (Joh. 2:2, 6-10) Olo do Jesus ditamue angka alealena dohot halak na manjangkon barita na uli. (Luk. 5:29; Joh. 12:2) Na rumingkot, dilehon Jesus do tingkina laho maradi, mangarimangi hata ni Debata dohot martangiang.—Mat. 14:23; Mrk. 1:35; 6:31, 32.

15. Aha do na porlu diulahon halak Kristen, jala songon dia do si Paulus gabe tiruan na denggan?

¹⁵ Dipatudos si Paulus do halak Kristen songon halak na marsitutu asa monang di parlojongon. Asa boi monang, ingkon tanggalhononna do sude na mambahen ibana lambat marlojong. (Jaha Heber 12:1.) Si Paulus ma tiruan na denggan taringot on. Nang pe boi ibana mamora jala gabe pangulu ni agama Jahudi na tarbarita, alai ditadingkon ibana do sudena i asa boi mangulahon na ”rumingkot”. Marsitutu do ibana marbarita na uli. Laho do ibana tu godang inganan songon Siria, Asia kecil, Makedonia dohot Judea. Manatap do si Paulus tu hangoluan na laho dijalo ibana di surgo. Didok ibana ma, ”Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang.” (Plp. 1:10; 3:8, 13, 14) Ala ndang marhasohotan si Paulus, boi ma ibana tongtong manjumolohon ulaon di partondion.—1 Kor. 7:32-35.

16, 17. Marhasohotan manang ndang, songon dia do hita boi maniru si Paulus? Songon dia do si Mark dohot si Claire mangulahon on?

¹⁶ Songon si Paulus, godang do naposo ni Jahowa ndang marhasohotan asa boi mangalehon gumodang tingki manomba Jahowa. (Mat. 19:11, 12) Gumodang do tanggungjawab ni halak naung marhasohotan sian na so marhasohotan. Alai marhasohotan manang ndang, ”tapeakkon ma nasa na pasorathon” asa unang ganggu rohanta manomba Jahowa. Tapauba ma hasomalanta asa boi mangalehon gumodang tingki laho manomba Jahowa.

¹⁷ Si Mark dohot si Claire sian Wales, nunga merintis dung tamat singkola. Dung marhasohotan, tongtong dope nasida gabe perintis. Alai, lomo do roha ni nasida laho mangalehon gumodang tingki. Si Mark paboahon, ”Digadis hami ma jabunami, jala so sian parkarejoan. Dung i, dohot ma hami mangurupi konstruksi internasional.” Saleleng 20 taon, nunga parsidohot nasida pajongjongkon Bale Harajaon di godang inganan di Afrika. Sipata otik do hepeng ditiop, alai tongtong do Jahowa mamparrohahon nasida. Si Claire mandok, ”Las do rohanami ala manomba Jahowa ganup ari. Lam godang ma dongannami jala ndang hahurangan manang aha. Ndang sadia na dilehon hami martimbangkon las ni roha ala manomba Jahowa.” Godang do angka naposo ni Jahowa na mangalehon godang tingki mangkilala sisongon on. *

18. Aha do na porlu tasungkun tu dirinta?

¹⁸ Nunga dijumolohon hamu manomba Jahowa di ngolumuna? Adong do na mangambati hamu mangulahon ulaon na ringkot? Molo adong, aha do na ingkon ulahononmu? Padenggan hamu ma hasomalanmu tingki marsiajar Bibel. Artikel na mangihut patorangkon songon dia hamu boi mangulahon on.