1. Aha do parange ni Debata na umbalga, jala songon dia do pangkilalaanta dung mamboto on?

BIBEL mandok, ”Haholongon do Debata.” (1 Joh. 4:8) Aha do lapatanna? Holong ndang holan parange ni Debata na denggan alai, parange ni Debata na umbalga. Ibana ndang holan marparange holong, alai haholongon do Ibana. Alani holong ni rohaNa do umbahen ditompa saluhutna. Mandok mauliate ma hita tu Jahowa ala ditompa sude na adong marhite holong!

2. Holong ni Debata mambahen hita marpos ni roha tu aha? (Ida gombar di mula ni parsiajaran.)

² Burju jala lambok do Jahowa tu angka na tinompaNa. Holong ni Debata tu hita paposhon rohanta na laho masa sangkapNa na denggan di ari na naeng ro. Halak na mangoloi Ibana mangkilala las ni roha. Umpamana, nunga ditontuhon Jahowa ”sada ari paruhuman tu portibi on di bagasan hatigoran, marhite sian sada halak na pinillitna”, i ma Jesus Kristus. (Ul. 17:31) Pos do rohanta na laho masa on. Halak  na mangoloi Debata boi mangolu salelengna.

3. Songon dia do parngoluon ni jolma molo ndang parholong Debata?

³ Molo ndang parholong Debata, aha do na masa tu jolma di ari na naeng ro? Tongtong ma nasida diparenta jolma jala dirajai Sibolis, debata na so parholong. (2 Kor. 4:4; 1 Joh. 5:19; jaha Pangungkapon 12:9, 12.) Molo ndang parholong Debata Jahowa, susa ma ngolu ni jolma!

4. Boasa Jahowa paloashon Sibolis mangalo tu pamarentaonNa?

⁴ Tingki mangalo Sibolis tu pamarentaon ni Debata, dielaela ibana do si Adam dohot si Hawa asa dohot mangalo. Didok Sibolis do molo Debata ndang tama mamarenta di hasiangan on. Sibolis mandok dumenggan do ibana mamarenta sian Debata. (1 Mus. 3:1-5) Alai, dilehon Jahowa do tingki tu Sibolis laho patuduhon gabusna i. Nang pe songon i, nunga tangkas tarida ndang denggan pamarentaon ni jolma dohot Sibolis.

5. Aha do na dipatudu ni sejarah taringot jolma?

⁵ Saonari, lam tu susana do portibi on. Sian 100 taon na salpu, lobi sian 100 juta halak mate alani porang. Disurat do di Bibel aha na masa ”di angka tingki parpudi”. Dung i, ”lam tu jahatna ma angka parjahat dohot panipu”. (2 Tim. 3:1, 13, Bibel siganup ari) Disurat do muse di Bibel, ”Nunga huboto, ale Jahowa, ndada guru di jolma dalanna, ndada guru di baoa pardalandalan, pahothon langkana.” (Jer. 10:23) Sejarah patuduhon nunga masa hata ni Bibel on. Debata Jahowa ndang manompa jolma asa mamarenta dirina sandiri.

6. Boasa dipaloas Debata masa hajahaton sahat tu tingki on?

⁶ Dipaloas Debata do masa hajahaton sahat tu tingki on asa tarida holan pamarentaon ni Jahowa do na denggan mamarenta jolma. Di ari na naeng ro, ripashonon ni Debata ma sude parjahat. Jala molo adong dope na mandok Debata ndang tama mamarenta, pintor hatop do ripashonon ni Debata. Disi ndang pasombuon ni Debata be mangolu halak na so unduk tu pamarentaonNa ala nunga tangkas tarida ndang denggan pamarentaon ni jolma.

7, 8. Songon dia do Jahowa patuduhon holongNa?

⁷ Marragam do isara ni Jahowa laho patuduhon holongNa. Boi ma taida hasiangan na mansai bidang jala na mansai uli on. Ditompa do marmiliar galaksi, jala di sada galaksi adong marmiliar bintang dohot planet. Mataniari ma sada sian bintang na adong di galaksi bima sakti. Ndang adong na boi mangolu di tano on molo ndang adong mataniari. Sudena on patuduhon molo Jahowa do Sitompa hita. Jala sian na tinompaNa tarida ma parange ni Debata songon huaso, bisuk, dohot holongNa. Tangkas ma ”tarida do pangalaho ni Debata na buni hian, timbangon ni roha, sian angka pambahenan ni Debata di na tinompana i hasiangan on, i ma hagogoonna dohot hadebataonna na manongtong i”.—Rom 1:20.

⁸ Jahowa manompa tano on laho diingani. Sude na adong di tano on  mambahen binatang dohot jolma boi mangolu. Debata mambahen porlak na uli laho inganan ni jolma jala dilehon do tu nasida pingkiran dohot pamatang na so mardosa asa boi mangolu salelengna. (Jaha Pangungkapon 4:11.) Dung i, ”Ibana mangalehon sipanganon tu nasa sibuk, ai ro di salelenglelengna do asi ni rohana.”—Ps. 136:25.

9. Nang pe Debata haholongon Jahowa, alai aha do na dihasogohon ni Ibana?

⁹ Ndang lomo roha ni Debata mangida na jahat ala haholongon do Ibana. Umpamana, di Psalmen 5:5-7 dipaboa do taringot Jahowa, ”Ndang lomo roham mida hageduhon, ale Debata . . . dihosom roham do nasa siulahon na so uhum.” Dihagigihon Ibana do muse ”halak angka na tumahi mudar dohot sipaotooto”.

10, 11. (a) Aha do na masa tu halak parjahat? (b) Aha do na masa tu halak na mangoloi Jahowa?

¹⁰ Di tingki na pas, ripashonon ni Debata ma sude parjahat sian tano on, ala Debata haholongon do Ibana jala ndang lomo rohaNa mangida na jahat. Dijanjihon Debata do, ”Sai na siap do sogot angka parjahat i, alai sai na teanon ni angka na mangkaposi Jahowa do tano i sogot. Tongkinnari ndang disi be parjahat i.” Angka musu ni Jahowa ”gabe timus” di ari na naeng ro.—Ps. 37:9, 10, 20.

¹¹ Marjanji do muse Debata, ”Teanon ni angka partigor i do sogot tano i, jala tongtong do nasida maringanan disi.” (Ps. 37:29) Jala marlas ni roha ma halak na marsihohot, alani ”hinadeak ni hadameon”. (Ps. 37:11) Boasa? Ala Debata na parholong sai mangalehon na dumenggan tu naposoNa. Disurat do di Bibel, ”Jadi apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i!” (Pgk. 21:4) Tung mansai denggan do na laho masa tu halak na mangoloi jala mangargai holong ni Debata!

12. Ise do halak na ”tigor”?

¹² Dipaboa Bibel do tu hita, ”Sai matahon na lidang i jala bereng na tigor i, ai sai hadameon do ujung ni halak sisongon i. Alai sai siap do sogot angka pangalaosi sudena, pinompar ni angka parjahat pe siap do.” (Ps. 37:37, 38) Halak na ”tigor”, i ma na mananda Jahowa dohot anakNa jala na mangulahon lomo ni roha ni Debata. (Jaha Johannes 17:3.) Dihaporseai nasida do ”laho salpu do portibi on rap dohot na pinarhagiotna; alai na mian ro di salelenglelengna do na mangulahon lomo ni roha ni Debata”. (1 Joh. 2:17) Ala nunga jonok ajal ni hasiangan on, didok do tu hita, “Haposi ma Jahowa jala paihutihut dalanna i.”—Ps. 37:34.

13. Songon dia do Debata patuduhon holongNa na umbalga?

¹³ Nang pe mardosa hita, boi do taoloi Debata. Boi do hita maraleale dohot Ibana, ala dipatudu Debata do holongNa marhite tobusan ni Jesus. Diparade Jahowa do tobusan asa boi halak na mangoloi Debata malua sian dosa dohot hamatean. (Jaha Rom 5:12; 6:23.) Marsihohot do Jesus tu Debata saleleng  di surgo, alani i pos do roha ni Jahowa na marsihohot Jesus saleleng di tano on. Songon sahalak ama parholong, hansit situtu do roha ni Jahowa mangida parjahat mambunu Jesus. Alai, marsihohot do Jesus tu pamarentaon ni Jahowa. Dipatudu Jesus do, molo halak na so mardosa boi marsihohot tu Debata nang pe mangadopi godang sitaonon.

14, 15. Aha do pangkorhon ni tobusan?

¹⁴ Nang pe godang sitaonon diadopi Jesus, marsihohot do ibana tu pamarentaon ni Debata. Mandok mauliate do hita tu tobusan ni Jesus ala marhite on, boi hita mangolu salelengna di tano na imbaru! Apostel Paulus manggombarhon holong ni Jahowa dohot holong ni Jesus marhite tobusan. Ibana mandok, ”Uju na parir dope hita, disi ma tongon mate Kristus humongkop angka parjahat. Ai maol mate halak humongkop partigor; adong do deba na barani mate humongkop na ulibasa. Alai ia Debata, dipapatar do holong ni rohana i di hita, uju pardosa dope hita, ai disi do mate Kristus humongkop hita.” (Rom 5:6-8) Apostel Johannes pe manurat, ”Sian on do gabe patar holong ni roha ni Debata na tu hita; sian naung sinuruna i Anakna na sasada i tu portibi on, asa mangolu hita marhitehite Ibana. Di bagasan on do holong ni roha i: Ndada hita  mangkaholongi Debata; Ibana do mangkaholongi hita, jala disuru do Anakna, bahen pardengganan pasaehon dosanta.”—1 Joh. 4:9, 10.

¹⁵ Jesus mandok, ”Songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.” (Joh. 3:16) Dilehon Jahowa do anakNa gabe tobusan, nang pe lungun rohaNa. On patuduhon mansai balga do holong ni Debata tu jolma ro di salelengna. Si Paulus manurat, ”Gomos do ditiop rohangku: Ndang tarbahen sirang hita sian holong ni roha ni Debata, na di bagasan Kristus Jesus Tuhanta i: Manang bahenon ni hamatean manang hangoluan, nang bahenon ni angka surusuruan nang angka harajaon, nang na masa nuaeng, nang na masa sogot, nang angka hagogoon pe, manang bahenon ni na di ginjang nang na di toru, ro di nasa na tinompa pe.”—Rom 8:38, 39.

16. Aha do Harajaon Mesianik jala ise do dipillit Jahowa gabe raja?

¹⁶ Pamarentaon ni Debata, i ma Harajaon Messianik, patuduhon holong ni Jahowa tu jolma. Songon dia on boi masa? Jahowa mamillit Jesus gabe Raja ala ibana parholong. (Poda 8:31) Dipillit Debata do 144.000 halak mamarenta rap dohot Jesus di surgo ala nasida nunga mangkilala parngoluon ni jolma. (Pgk. 14:1) Tingki di tano on, tongtong do Jesus mamaritahon taringot Harajaon ni Debata. Jala diajari ibana do siseanna martangiang, ”Ale Amanami na di banua ginjang! Sai pinarbadia ma Goarmu! Sai ro ma harajaonmu! Sai saut ma lomo ni roham di banua tonga on songon na di banua ginjang!” (Mat. 6:9, 10) Taida ma tangiang on digohi tingki Harajaon ni Debata mangalehon pasupasu tu jolma!

17. Patorang ma songon dia pamarentaon ni Jesus marimbar sian pamarentaon ni jolma.

¹⁷ Marimbar do pamarentaon ni Jesus tu pamarentaon ni jolma. Pamarentaon ni jolma mambahen porang, na mambahen marjuta halak mate. Alai di pamarentaon ni Jesus, dihaholongi do hita jala Jesus maniru parange ni Debata tarlumobi holong. (Pgk. 7:10, 16, 17) Jesus mandok, ”Ro ma hamu tu Ahu, hamu angka na loja jala na sorat, asa hupasonang hamu! Jangkon hamu ma augangku, marguru ma hamu tu Ahu, ai na lambok do Ahu jala na serep marroha, asa dapotan hasonangan tondimuna. Ai lambok do augangku jala neang do dohot na hupaporsanhon.” (Mat. 11:28-30) Tutu ma molo janji on, mangapul rohanta!

18. (a) Aha do na masa mulai taon 1914? (b) Aha do na laho taulas di artikel na mangihut?

¹⁸ Sian Bibel, taboto ma molo Harajaon ni Debata nunga mamarenta di surgo taon 1914. Mulai sian i, nunga dipapungu ise na laho mamarenta dohot Jesus di surgo. Jala ”mansai torop” halak na boi malua sian ajal ni hasiangan on na mangolu di tano na imbaru. (Pgk. 7:9, 13, 14) Sadia godang do na torop on saonari? Jala aha do na ingkon ulahonon ni nasida? Artikel na mangihut mangulas sungkunsungkun on.