1, 2. (a) Aha do na diholsohon ni natuatua tingki remaja ianakhonna? (b) Songon dia do asa las roha ni ianakhonmuna tingki remaja?

LAS DO ROHA ni natuatua molo sude ianakhonna tardidi. Songon si Berenice, opat ianakhonna nunga tardidi andorang marumur 14 taon. Ibana mandok, ”Las situtu do roha molo sude ianakhon manomba Jahowa. Nang pe taboto gok do elaela diadopi nasida tingki remaja.” Hamu pe tontu holsoan do tingki mangadopi ianakhonmuna na marsiajar dolidoli manang anak boru na digoari remaja.

² Sahalak psikolog anak paboahon, dung remaja sasahalak, borat do on diadopi nasida dohot natuatuana. Alai hamu natuatua, unang dokkon hamu molo nasida palobihu manang padakdanakhu pingkiranna. Sasintongna malo, hinsa, jala lomo do roha ni nasida marsaor dohot angka donganna. Alani i ma, tingki ianakhonmuna nunga remaja, boi do nasida maraleale dohot Jahowa songon Jesus di tingki haposoonna. (Jaha Lukas 2:52.) Nasida boi do marsitutu asa lam denggan marbarita na uli jala asa lam hiras rohana marhobas tu Jahowa. Nasida boi mambahen haputusan sandiri, songon mangoloi dohot mangalehon diri tu Jahowa. Alai, aha do ulahonon ni natuatua mangajari  ianakhonna na remaja asa manomba Jahowa? Hamu boi marsiajar sian isara ni Jesus mangajari angka siseanna marhite holong, serep ni roha dohot pangantusion.

3. Sian dia do angka sisean mamboto molo Jesus olo maraleale dohot nasida?

³ Ndang holan gabe induk somang Jesus di adopan ni siseanna. Alai, ibana pe gabe aleale do di nasida. (Jaha Johannes 15:15.) Najolo, sahalak induk somang ndang somal manungkun pangkilalaan ni anak somangna, alai Jesus ndang mambahen siseanna songon anak somang. Dihaholongi Jesus do nasida jala dilehon do godang tingki rap dohot nasida. Las do roha ni Jesus paboahon tu nasida aha na adong di pingkiran dohot di rohana. Ditangihon ibana do angka siseanna tingki paboahon na di pingkiran dohot di roha ni nasida. (Mrk. 6:30-32) Ala jotjot do mangkatahatai Jesus dohot siseanna, gabe maraleale ma nasida. Rade ma angka sisean mangulahon ulaonna di tingki na naeng ro.

4. Songon dia do angka natuatua boi maraleale dohot ianakhonna? (Ida gombar di mula ni parsiajaran.)

⁴ Nang pe hamu marhak maminsang dohot mambahen aturan tu ianakhonmuna, boi do hamu gabe aleale ni nasida. Ingkon godang do tingki dilehon asa boi tongtong maraleale. Atur hamu ma sadia godang tingkimuna laho karejo asa gumodang tingkimu rap dohot ianakhonmuna. Martangiang jala marsitutu ma hamu asa boi mangulahon i. Jotjot do na maraleale marlas ni roha mangulahon ulaon na sarupa. Alani i, ingkon botoonmu do aha na dihalomohon ni ianakhonmuna. Umpamana musik, film manang olahraga hasolomanna. Dung i, marsitutu ma hamu asa boi mangkalomohon i. Si Ilaria na tading di Italia mandok, ”Lomo do roha ni natuatuangku tu musik na hutangihon. Bapakku do na gabe alealeku, jala ndang mabiar ahu paboahon sude na di rohangku tu ibana.” Molo maraleale hamu dohot ianakhonmuna jala hamu mangurupi nasida maraleale tu Jahowa, ndang na gabe mago hakmuna laho maminsang dohot mambahen aturan tu nasida. (Ps. 25:14) Alai, idaonna ma na dihaholongi jala na diargai hamu do nasida. Jala ndang mabiar nasida paboahon manang aha pe tu hamu.

5. Songon dia do sisean ni Jesus asa martua?

⁵ Jesus paboahon tu angka siseanna songon dia nasida asa martua. Nasida ingkon marhiras ni roha marhobas tu Jahowa jala marsitutu marbarita na uli. Alani i, dijujui do siseanna asa tongtong marbarita na uli. Marjanji do Jesus na urupanna do nasida.—Mat. 28:19, 20.

6, 7. Songon dia do hamu patuduhon holongmu tu ianakhonmuna tingki mangajar nasida asa tongtong mangulahon ulaon di partondion?

⁶ Tontu las do rohamuna molo ianakhonmu maraleale dohot Jahowa. Dihalomohon Jahowa do asa diajari jala dipinsang hamu ianakhonmuna. Dilehon do hak tu hamu mangulahon i. (Eps. 6:4) Pingkiri ma: Dipasingkolahon hamu do ianakhonmu ala diboto hamu ringkot do nasida mangantusi angka parbinotoan na imbaru. Dos songon i ma, porlu do nasida ro tu parpunguan, parpunguan bolon, dohot panombaon na sasaripe. Sian i, dapot ni nasida ma pangajarion ni Jahowa na paluahon ngolu ni nasida. Urupi ma nasida asa marlas ni roha marsiajar taringot Jahowa na mambahen nasida marbisuk. (Poda 24:14) Dung i, ajari ma ianakhonmuna marbarita na uli. Molo diurupi hamu nasida marhiras ni roha marbarita na uli, on patuduhon na maniru Jesus ma hamu.

⁷ Songon dia do parsiajaran Bibel, parpunguan, dohot ulaon marbarita, boi mangurupi angka remaja manomba Jahowa?  Si Erin, sian Afrika Selatan mandok, ”Tingki dakdanak hami, jotjot do marungutungut molo naeng marsiajar Bibel, laho tu parpunguan dohot marbarita na uli. Sipata olo do ni luluan dalan asa unang dohot tu panombaon na sasaripe. Alai ndang diloas natuatuanami.” Las do roha ni si Erin ala natuatuana mangurupi ibana mangantusi na ringkot do mangulahon ulaon di partondion. Saonari, molo ndang marpungu manang marbarita ibana, ndang tabo pangkilalaanna.

8. (a) Songon dia do Jesus patuduhon serep ni roha? (b) Songon dia do serep ni roha ni Jesus mangurupi angka siseanna?

⁸ Nang pe ndang mardosa Jesus, alai serep do rohana mangido pangurupion ni Jahowa di adopan ni siseanna. (Jaha Johannes 5:19.) Gabe hurang diargai siseanna do Jesus alani on? Ndang songon i. Tingki nasida mangida Jesus mangasahon Jahowa, lam porsea ma nasida tu ibana. Jala, diihuthon nasida ma serep ni roha ni Jesus.—Ul. 3:12, 13, 16.

9. Molo diangkui hamu hahuranganmu songon dia do on mangurupi ianakhonmuna?

⁹ Porlu do hita marserep ni roha, ala mardosa jala jojot do hita mambahen sala. Ingot ma, ndang sude boi ulahononmuna alani i, angkui ma hahuranganmuna. (1 Joh. 1:8) On mangurupi ianakhonmuna marsiajar laho mangangkui hahuranganna, jala lam diargai ma hamu. Ise do na diargai hamu, sahalak bos na mangangkui hasalaanna manang na so olo mangangkui hasalaanna? Si Rosemary patorangkon, masipaboaan do ibana dohot tunggani dolina taringot hahurangan ni nasida. Ibana mandok, ”On mangurupi ianakhonku asa unang mabiar paboahon manang aha pe tu hami tingki nasida mangadopi parsoalan.” Didok ibana muse, ”Diajari hami do ianakhonnami songon dia isara na dumenggan mangadopi parsoalanna i. Tingki dihaporluhon nasida pangurupion, dilului hami ma isara na denggan mangadopi i sian publikasi, jala rap martangiang ma hami.”

10. Songon dia do Jesus patuduhon serep ni roha tingki manuru siseanna mangulahon sada ulaon?

¹⁰ Marhak do Jesus paboahon aha na laho diulahon siseanna. Alai, ala marserep ni roha do Jesus, dipatorang ibana ma boasa nasida ingkon mangulahon i. Umpamana, tingki didok Jesus tu angka siseanna asa dijumolohon Harajaon ni Debata dohot hatigoranNa, dipatorang ibana do boasa porlu mangulahon i. Ibana mandok, ”Tambahononna do sude angka ondeng tu hamuna.” Dung i, tingki didok Jesus asa nasida unang manguhumi, didok ibana ma, ”Unang hamu manguhumuhumi, asa unang hona uhum hamu, ai panguhumonmuna i do siuhumhononhon tu hamu.”—Mat. 6:31–7:2.

11. Songon dia do hamu mangurupi ianakhonmuna mambahen haputusan?

¹¹ Patorang hamu ma tu ianakhonmuna boasa dibahen hamu aturan manang haputusan tu nasida. On mambahen nasida mura mangoloi hamu. Si Barry naung opat ianakhonna mandok, ”Molo tapaboa tu ianakhonta boasa tabahen sada aturan, lam porsea ma nasida tu hita.” Antusan ni angka remaja ma molo hamu natuatua mambahen aturan dohot haputusan ndang holan ala na marhak hamu mambahen i. Alai, na adong do na denggan pangkorhon ni haputusan i. Jala ingot ma, di sada tingki porlu do nasida mambahen haputusan tu dirina sandiri. (Rom 12:1) Si Barry mandok, ”Angka remaja porlu do marsiajar mambahen haputusan mamangke roha pangantusion.” (Ps. 119:34) Marhite serep ni roha, patorang ma tu nasida boasa dibahen hamu sada haputusan.  Sian i, marsiajar ma nasida mambahen haputusan tu dirina sandiri. Diboto ma molo hamu mangargai jala lomo rohamuna lam matoras nasida tingki mambahen haputusan.

12. Songon dia do Jesus mamangke pangantusion tingki mangurupi si Petrus?

¹² Marpangantusion do Jesus tu angka siseanna. Diboto do aha na dihaporluhon nasida. Umpamana, tingki Jesus paboahon tu siseanna na laho dibunu ibana, didok si Petrus ma asa dihaholongi Jesus dirina sandiri. Diboto Jesus do na holong roha ni si Petrus tu ibana, alai diboto do ndang denggan na didok ni si Petrus i. Songon dia do Jesus mangurupi si Petrus dohot sisean na asing? Na parjolo, dipasingot Jesus ma si Petrus. Dung i, dipatorang Jesus ma tu angka siseanna aha na masa molo ndang diulahon lomo ni roha ni Jahowa. Dipaboa Jesus do muse na dihalomohon Jahowa do halak na so mangkaringkothon dirina sandiri. (Mat. 16:21-27) Marsiajar ma si Petrus sian na masa on.—1 Ptr. 2:20, 21.

13, 14. (a) Aha do na patuduhon porlu ianakhonmuna patoguhon haporseaonna? (b) Songon dia do hamu boi mangurupi ianakhonmuna?

¹³ Martangiang ma tu Jahowa asa marpangantusion hamu laho mamboto haporluon ni ianakhonmuna. (Ps. 32:8) Ra, hurang do las ni roha ni ianakhonmu dung remaja. Manang, olo do ra ditangihon hamu ndang denggan pandapotna taringot dongan sahaporseaon. Ra, dihilala hamu adong do na so dipaboa ibana tu hamu. Unang ma pintor dirimpu hamu molo na so dipaboana i ulaon na sala. * Alai, denggan ma parrohahon nasida. On patuduhon, porlu do hamu mangurupi nasida patoguhon haporseaonna.

¹⁴ Asa diboto hamu songon dia mangurupi ianakhonmuna, denggan jala lambok ma sungkun nasida. On dipatudos songon manimba aek sian sumur. Molo asal tatimba, ndang godang dapotta aek. Dos songon i ma, molo ndang dipatudu hamu hasabaron tingki manungkun jala dipaksa hamu nasida mangkatai, ndang boi botoonmuna  aha na sasintongna di pingkiran dohot di rohana. (Jaha Poda 20:5.) Diingot si Ilaria ma tingki remaja ibana, lomo do rohana sai rap dohot dongan sakalasna nang pe diboto na sala do i. Diparrohahon natuatuana do marsak ibana alani on. Didok si Ilaria ma, ”Di sada tingki, diparrohahon natuatuangku ma na marsak ahu. Disungkun nasida ma aha na mambahen ahu marsak. Pintor tangis ma ahu, hupatorang ma aha na masa jala hupangido ma asa diurupi. Dihaol nasida ma ahu, didok nasida ma na diantusi nasida do na huhilala, jala marjanji do na urupanna ahu.” Natuatua ni si Ilaria pintor mangurupi ibana maraleale dohot dongan sahaporseaon.

15. Songon dia do Jesus patuduhon pangantusionna?

¹⁵ Dipangke Jesus do pangantusionna laho mangida parange na denggan sian siseanna. Umpamana, tingki diboto si Natanael na sian Nasaret do Jesus, didok ibana ma, ”Tung tarbahen ma ro na denggan sian huta Nasaret?” (Joh. 1:46) Molo disi hamu, pintor dohononmu do molo si Natanael halak na so denggan jala ndang marhaporseaon na togu? Alai, ndang songon i pingkiran ni Jesus. Diboto ibana do molo si Natanael halak na mangkatahon hata na tutu. Didok Jesus ma, ”On ma sada halak Israel na tutu, na so marpangansi di bagasan!” (Joh. 1:47) Tangkas ma, Jesus boi manjaha roha jala dipangke ibana do haboionna i mangida parange na denggan sian jolma.

16. Songon dia do hamu boi manjujui ianakhonmuna asa lam denggan?

¹⁶ Nang pe ndang boi dijaha hamu roha ni sasahalak, alai pangke ma pangantusionmu. Jahowa mangurupi hamu mangida parange na denggan sian ianakhonmuna. Nang pe marsak hamu dibahen ianakhonmuna, unang ma dokkon na oto manang sisurang nasida. Jala unang ma tapingkirhon hata sisongon i. Paboa ma tu ianakhonmuna adong do parange na denggan sian ibana, jala sasintongna, lomo do rohana mangulahon na denggan. Paboa ma aha na porlu paubaonna jala puji ma ibana. Urupi ma ianakhonmuna asa marparange na denggan marhite mangalehon tanggungjawab tu nasida. Jesus mangulahon on tu angka siseanna. Sada satonga taon dung jumpang dohot si Natanael (na digoari si Bartolomeus), dilehon Jesus ma tanggungjawab tu ibana. Dipillit ma si Natanael gabe apostel jala marsihohot do ibana mangulahon ulaon na dilehon ni Jesus. (Luk. 6:13, 14; Ul. 1:13, 14) Unang ma bahen hamu ianakhonmuna mangkilala na so hea ibana mangulahon na denggan. Alai, puji jala jujui ma nasida asa mangulahon na denggan. Paboa ma, molo dipangke nasida haboionna marhobas tu Jahowa, on mambahen hamu dohot Jahowa marlas ni roha.

17, 18. Aha do labana molo tongtong diajari hamu ianakhonmuna manomba Jahowa?

¹⁷ Ra boi do dihilala hamu na masa tu si Paulus. Sai dipingkiri ibana do angka dongan di huria jala nunga songon ianakhonna i di ibana. Diurupi do nasida mananda Jahowa jala dihaholongi do nasida. Alai, marsak do ibana mamingkiri na deba, na so marsihohot tu Jahowa. (1 Kor. 4:15; 2 Kor. 2:4) Si Victor na tolu ianakhonna mandok, ”Tingki na umborat di natuatua, i ma mangajari ianakhonna na remaja. Holan marhite pangurupion ni Jahowa do hita boi maraleale dohot ianakhonta.”

¹⁸ Hamu angka natuatua, marsitutu ma hamu mangajari ianakhonmuna ala mansai dihaholongi hamu do nasida. Unang ma marnaloja hamu. Pingkirhon ma las ni roha na boi hilalaonmu molo ianakhonmuna mambahen haputusan laho manomba jala marsihohot tu Jahowa.—3 Joh. 4.