1-3. (a) Boasa pingkiran dohot bahasa ni Debata ingkon tumimbo sian jolma? (b) Aha do na taparsiajari di artikel on?

NDANG lomo roha ni Jahowa holan Ibana na mangolu dohot na martua, alani i ditompa ma surusuruan dohot jolma. (Ps. 36:10; 1 Tim. 1:11) Na tinompa ni Jahowa na parjolo digoari do ”Hata”. (Joh. 1:1; Pgk. 3:14) Mangkatai do Jahowa tu Jesus laho paboahon isi ni pingkiran dohot pangkilalaanNa. (Joh. 1:14, 17; Kol. 1:15) Apostel Paulus paboahon, molo angka surusuruan mangkatai mamangke sada bahasa na mansai imbar sian bahasa ni jolma.—1 Kor. 13:1.

² Ditanda Jahowa do marmiliar surusuruan dohot jolma na tinompaNa. Di tingki na sarupa, boi do ditangihon Ibana tangiang ni marjuta halak jala diantusi do sude tangiang i, nang pe dipasahat marhite marragam bahasa. Huhut ditangihon angka tangiang, mangkatai do Jahowa tu angka surusuruan laho mangatur nasida. Laho mangulahon i sude, ingkon tumimbo do pingkiran dohot bahasa ni Jahowa sian jolma. (Jaha Jesaya 55:8, 9.) Alani i, tingki mangkatai Jahowa tu jolma, dipangke do hata na mura antusan.

³ Di artikel on, taparsiajari ma songon dia Jahowa mangkatai tu jolma mamangke isara na mura antusan. Dung i,  taida ma songon dia Debata paubahon isara ni Ibana mangkatai dipahombar tu bahasa na mura antusan ni jolma.

4. (a) Aha do bahasa na dipangke Jahowa tingki mangkatai tu si Musa, si Samuel, dohot si Daud? (b) Aha do isi ni Bibel?

⁴ Ra, dipangke Jahowa do bahasa Heber na parjolo tingki mangkatai tu si Adam di porlak Eden. Dung i, dipangke Ibana do bahasa on tingki mangkatai tu si Musa, si Samuel, dohot si Daud. Nang pe nasida manurathon Hata ni Debata di bahasa Heber, alai sasintongna pingkiran ni Debata do na disurat ni nasida. Disurathon nasida do aha na diparentahon Jahowa jala disurat do taringot sejarah ni naposo ni Debata. Umpamana, disurat do di Bibel songon dia haporseaon dohot holong ni nasida tu Debata. Disurat do muse hasalaan dohot na mambahen nasida ndang marsihohot. Sude hatorangan on, disurat asa marpangkirimon jala bahen poda tu hita.—Rom 15:4.

5. Holan bahasa Heber do dipangke Debata tingki mangkatai tu jolma? Patorang ma.

⁵ Ndang holan bahasa Heber dipangke Jahowa tingki mangkatai tu jolma. Tingki ruar halak Israel sian huta Babel, pigapiga sian nasida mangkatai di bahasa Aram. Ra, on do na mambahen si Daniel, si Jeremia dohot si Esra manurathon deba sian isi ni Bibel di bahasa Aram. *

6. Boasa Kitab Kitab Ibrani diterjemahon tu bahasa Junani?

⁶ Tingki si Aleksander Agung mangarajai godang negara di portibi on, di bahasa Junani Koine do torop halak mangkatai. Torop halak Jahudi mulai mamangke bahasa Junani. Alani i ma, Angka Buku Heber diterjemahon tu bahasa Junani. Digoari ma terjemahan on Septuaginta. On ma terjemahan ni Bibel na parjolo sahali jala mansai ringkot. Angka ahli porsea molo Septuaginta on disurat 72 penerjemah. * Pigapiga Angka Buku Heber diterjemahon hata parhata, alai na asing ndang songon i. Porsea do halak Jahudi na mamangke bahasa Junani dohot halak Kristen na asing, molo Septuaginta on Hata ni Debata.

7. Bahasa aha do na dipangke Jesus tingki di tano on?

⁷ Tingki di tano on Jesus, ra ibana mangkatai mamangke bahasa Heber. (Joh. 19:20; 20:16; Ul. 26:14) Ibana pe olo do mamangke bahasa Aram na somal di pangke tingki i. Alai, diantusi ibana do bahasa Heber na parjolo, i ma na dipangke ni si Musa dohot panurirang na asing na somal dijahahon di sinagoga ganup minggu. (Luk. 4:17-19; 24:44, 45; Ul. 15:21) Nang pe bahasa Junani dohot bahasa Latin somal dipangke di tingki ni Jesus, alai Bibel ndang hea paboahon molo Jesus hea mamangke na dua bahasa on.

8, 9. Boasa godang halak Kristen mamangke hata Junani, jala aha do na boi taparsiajari taringot Jahowa sian on?

⁸ Angka sisean na parjolo mamangke bahasa Heber, alai dung mate Jesus, dipangke nasida do marragam bahasa.  (Jaha Ulaon ni Apostel 6:1.) Laho pasarhon barita na uli, godangan halak Kristen mamangke bahasa Junani sian bahasa Heber. Ala bahasa Junani do tingki i na somal dipangke, dicetak ma buku Mateus, Markus, Lukas, dohot Johannes di bahasa Junani. * Dung i, angka surat ni apostel Paulus dohot buku na asing pe, disurathon di bahasa Junani.

⁹ Tingki panurat ni Angka Buku Junani Kristen mangenet ayat na adong di Angka Buku Heber, jotjot do nasida mamangke Septuaginta. Alani i, adong do saotik imbarna sian hata na adong di bahasa Heber na parjolo sahali. Alai, sude on nunga gabe bagian ni Bibel na tapangke saonari. Tarida ma molo Jahowa ndang mambahen sada bahasa sumurung sian bahasa na asing.—Jaha Ulaon ni Apostel 10:34.

10. Aha do na taparsiajari sian isara ni Jahowa mangkatai tu jolma?

¹⁰ Nunga taparsiajari molo Jahowa paubahon isara ni Ibana mangkatai, dipahombar do tu bahasa na mura antusan ni jolma. Ndang diparenta Debata hita asa mamangke sada bahasa laho mananda Ibana dohot sangkapNa. (Jaha Sakaria 8:23; Pangungkapon 7:9, 10.) Taparsiajari do molo Jahowa manogunogu pingkiran ni panurat ni Bibel. Dipaloas Ibana do nasida manurathon aha na adong di pingkiranNa mamangke hata ni nasida sandiri.

11. Boasa bahasa na marragam ndang mangambati Jahowa laho mangkatai tu jolma?

¹¹ Marragam do bahasa na dipangke ni jolma, alai on ndang mangambati Debata mangkatai tu nasida. Sian dia taboto? Holan saotik do hata ni Jesus na mamangke bahasa asli disurathon di Bibel. (Mat. 27:46; Mrk. 5:41; 7:34; 14:36) Diurupi Jahowa do asa disurat jala diterjemahon hata ni Jesus tu bahasa Junani dohot tu bahasa na asing. Ala nunga godang hata ni Debata dicetak halak Jahudi dohot halak Kristen na asing, boi ma tongtong tarondingi hata ni Debata. Dung i, angka na dicetak on diterjemahon tu marragam bahasa. Di abad na paopathon, si John Chrysostom mandok molo ajaran ni Jesus nunga diterjemahon tu bahasa Siria, Mesir, India, Persia, Etiopia dohot bahasa na asing.

12. Aha do diulahon halak na mangkasogohon Bibel?

¹² Torop do na marsogo ni roha tu Bibel, tu na manerjemahon dohot tu na mancetak Bibel. Hirahira 300 taon  dung tubu Jesus, Kaisar Rom Diokletianus mambahen parenta asa ditutung sude Bibel naung dicetak. Hirahira 1.200 taon dungkon i, si William Tyndale manerjemahon Bibel tu bahasa Inggris. Ibana mandok molo dipaloas Debata ibana leleng mangolu, bahenonna ma sahalak partani marpangantusion na dumenggan taringot Bibel sian pangula ni huria. Ala sogo roha ni halak tu si Tyndale, laho ma ibana sian Inggris asa boi manerjemahon dohot mancetak Bibel. Nang pe klerus nunga manutung godang Bibel naung dicetakna i, alai terjemahan ni si Tyndale nunga sanga tarsar tu torop halak. Ujungna, mate ma si Tyndale ala disongkik jala ditutung di sada tiang. Alai, ndang sude dapot ni klerus Bibel na diterjemahonna i. Terjemahan on ma na dipangke laho manerjemahon Bibel na asing, na digoari King James Version.—Jaha 2 Timoteus 2:9.

13. Aha do na tarida dung diparsiajari manuskrip ni Bibel na parjolo sahali?

¹³ Di pigapiga Bibel na diterjemahon i adong hatorangan na sala dohot na maralo. Alai, angka ahli manat do mamparsiajari marribu manuskrip, angka bagian ni manuskrip dohot terjemahan ni Bibel naung leleng. Dung diparsiajari nasida, dapot ni nasida ma ayat na marimbar hatoranganna. Alai, ndang muba barita na adong di Bibel. Porsea do angka na marsiajar Bibel, molo Bibel na tapangke saonari, i ma hata na sinihathon ni Jahowa.—Jes. 40:8. *

14. Songon dia do Bibel diparade saonari?

¹⁴ Nang pe godang na marsogo ni roha, alai nunga diterjemahon Bibel tu lobi sian 2.800 bahasa. Sian buku na asing, on ma buku na gumodang diterjemahon. Nang pe godang halak ndang porsea tu Debata, alai Hata ni Debata do na gumodang dicetak sahat tu tingki on. Nang pe pigapiga terjemahan ni Bibel ndang mura dijaha manang adong dope hatorangan na sala, alai sude do terjemahan i patuduhon pangkirimon, taringot hangoluan salelengna.

15. (a) Songon dia do publikasi diterjemahon saonari? (b) Boasa publikasi disurathon di bahasa Inggris?

¹⁵ Taon 1919, adong ma punguan na metmet na marsiajar Bibel na dipillit gabe ”naposo haposan jala na marroha”. Di tingki i, naposo haposan mangkatai tu angka naposo ni Debata mamangke bahasa Inggris. (Mat. 24:45) Alai saonari, publikasinta nunga diparade lobi sian 700 bahasa. Songon bahasa Junani najolo, bahasa Inggris ma  saonari na dipangke torop halak. Dipangke ma on di bisnis dohot di singkola. Alani i, publikasinta disurathon parjolo sahali di bahasa Inggris, dung i diterjemahon ma tu bahasa na asing.

16, 17. (a) Aha do na dihaporluhon naposo ni Debata? (b) Aha do na porlu diparrohahon tingki manerjemahon Bibel na baru? (c) Aha do sangkap ni donganta si Knorr?

¹⁶ Sude do publikasinta dipahombar tu isi ni Bibel. Na parjolo, naposo ni Debata mamangke Bibel King James Version taon 1611. Alai, bahasa na dipangke terjemahan on nunga leleng jala maol diantusi. Goar ni Debata pe, otik do disurat diterjemahan on, hape di manuskrip na parjolo sahali adong marribu hali disurathon goar ni Debata. Adong hasalaan dohot ayat na ditambai na so adong di manuskrip na parjolo di terjemahan on. Songon i do nang di Bibel terjemahan bahasa Inggris na asing.

¹⁷ Tangkas ma, naposo ni Debata mangkaporluhon Bibel terjemahan na baru, na sintong jala mura antusan. Alani i, dibahen ma sada punguan na digoari Panitia Penerjemahan Alkitab Dunia Baru. Angka donganta na dohot tu punguan on, nunga mangarilis Bibel terjemahan na baru sian taon 1950 sahat tu 1960. Na parjolo sahali di rilis, i ma di parpunguan bolon tanggal 2 Agustus 1950. Di parpunguan bolon on, donganta si Knorr paboahon molo naposo ni Debata mangkaporluhon Bibel terjemahan na modern, na sintong, na mura antusan jala na boi lam tangkas mangurupi nasida mangantusi hasintongan. Nasida mangkaporluhon terjemahan na mura dijaha jala pangantusionna dos tu na sinurat ni sisean ni Jesus najolo. Donganta si Knorr marsangkap molo Terjemahan Dunia Baru mangurupi marjuta halak mananda Jahowa.

18. Aha do na mangurupi penerjemahan ni Bibel?

¹⁸ Masa ma sangkap ni donganta si Knorr taon 1963. Angka Buku Junani Kristen Terjemahan Dunia Baru nunga adong di bahasa Belanda, Italia, Jerman, Portugis, Prancis dohot Spanyol. Di taon 1989, Punguan na Mangaradoti Organisasi mambahen sada departemen na imbaru laho manguluhon penerjemahan ni Bibel di liat portibi on. Dung taon 2005, dipaloas ma manerjemahon Bibel tu bahasa naung manerjemahon Joujou Paboahon. Saonari, Terjemahan Dunia Baru lengkap manang sasabagian nunga diterjemahon tu lobi sian 130 bahasa.

19. Aha do na masa taon 2013, jala aha do na taparsiajari di artikel na mangihut?

¹⁹ Nunga adong muba bahasa Inggris na dipangke di edisi Terjemahan Dunia Baru bahasa Inggris na parjolo sahali. Alani i, porlu ma direvisi. Tanggal 5 dohot 6 Oktober 2013, adong 1.413.676 halak parsidohot tu acara ni Lembaga Alkitab dan Risalah Menara Pengawal Pennsylvania. Nasida, i ma halak na ro sian 31 negara dohot na streaming internet. Sahalak sian Punguan na Mangaradoti Organisasi, mangarilis Terjemahan Dunia Baru edisi revisi di bahasa Inggris. Sude halak na ro, marlas ni roha jala godang na tangis alani balga ni rohana mandapot terjemahan na baru on. Dipaboa do ayat na direvisi, sian i tarida ma molo edisi revisi on ummura dijaha dohot diantusi. Di artikel na mangihut, taparsiajari ma gumodang hatorangan taringot revisi on jala songon dia on diterjemahon tu bahasa na asing.