Boi do terjadi bencana alam alani cuaca ekstrim? Angin topan dohot tornado jotjot do mambahen gabe naik gelombang ni air laut, banjir, manang mambahen gabe gogo hian alogo. Molo doras hian udan boi do mambahen gabe longsor tano, jala molo adong petir boi do i mambahen sappe tarbakkar hutan. Asing ni i, berbahaya do cuaca na massai mohop dohot badai salju.

 Di godang negara, sering do terjadi cuaca ekstrim jala parah do akibatna. Federasi Internasional Perhimpunan Palang Merah dan Bulan Sabit Merah paboahon, “Tamba do godang ni akka halak na gabe korban ni bencana alam. Ai lam jotjot do terjadi banjir, badai, dohot kekeringan. Akibatna, godang do halak na mate. Na asing, dang adong be karejona jala jabuna pe hancur.”

 Akka peristiwa sisongon i dang holan berpengaruh tu kesehatanta, alai berpengaruh do tong tu perasaanta. Adong do mungkin halak na gabe trauma ala sega jabu ni nasida, mago artana, manang mate halak na dihaholongi nasida.

 Molo dohot do hamu hona dampak ni bencana alam alani cuaca ekstrim on, adong do ayat ni Bibel na boi mangurupi hamu. Adong do ayat ni Bibel na boi menghibur, paposson roha, jala na boi mangurupi godang halak. (Rom 15:4) Boi do tong dapotmuna di Bibel alus ni akka sukkun-sukkun on: Boasa dipasombu Debata masa bencana? Hukuman sian Debata do i?

 Dipaboa do di Bibel, dang Debata na mambahen susa jolma. Alana didok do di Bibel “dang boi ujion Debata marhite na jahat jala dang diuji Ibana manang ise pe”. (Jakobus 1:13) Jadi, dang Debata na mambahen cuaca ekstrim na masa saonari.

 Memang adong do dipaboa di Bibel, hea do dipakke Debata kekuatan alam lao manghukum halak na jahat. Alai dang sarupa i tu bencana na masa saonari. Molo saonari, jotjot do i masa dang jolo adong peringatan. Jala tikki masa i, berdampak do i tu halak na burju dohot halak na jahat. Alai dipaboa do di Bibel, molo diparo Debata bencana torus do diselamatton Ibana akka halak na burju, dipaboa Ibana do peringatan sebelum diparo i, jala dipaboa do alasanna parohon i. Contohna, di tikki ni si Noak dipaboa Debata do boasa naeng bahenonna Air Bah, jolo dibahen Ibana do peringatan tu akka halak, jala diselamatton do si Noak dohot keluargana.—1 Musa 6:13; 2 Petrus 2:5.

 Asa lam pos rohamuna na so hukuman sian Debata bencana alam i, jaha ma artikel “Boha do Didok di Bibel taringot Bencana Alam?”

 Dipaboa di Bibel, Jahowa a i Debata parholong jala parduli do Ibana tu hita. Akka ayat na di toru on boi do menghibur hita.

•   Jesaya 63:9: “Di tikki susa nasida, marsak do pakkilalaan ni [Debata].”

   Artina: Lungun do roha ni Jahowa mangida akka jolma na susa.

•   1 Petrus 5:7: “Diparrohahon do hamu.”

   Artina: Diboto Jahowa do hasusaan na masa tu hita jala diattusi Ibana do boha perasaanta.

 Parduli do Jahowa jala holong do rohana tu hita. Alani i ma dilehon Ibana akka poda na denggan di Bibel lao mangurupi hita. Jala marjanji do Ibana, di ari na naeng ro dang na lao adong be bencana alam.—2 Korint 1:3, 4.

 Didok Jahowa do di Bibel “na lao denggan do ngolumuna di ari na naeng ro”. (Jeremia 29:11) Lomo do roha ni Debata dame roha ni jolma mangolu salelengna di tano on jala dang mabiar be terjadi bencana alam.—1 Musa 1:28; 2:15; Jesaya 32:18.

 Na lao pasauton ni Debata ma janjina i haduan marhite Harajaonna na dipajongjong di surgo. Jala Rajana i ma Jesus. (Mateus 6:10) Dilehon do bisuk dohot huaso tu Jesus asa boi dikendalihon ibana cuaca. Tikki di tano on Jesus nungnga dibuktihon ibana i. (Markus 4:37-41) Haduan dipakke Jesus do parbinotoanna i lao mamaretta jala mangajari akka jolma asa denggan mangurus tano on. (Jesaya 11:2) Dung mamaretta Jesus tu tano on, dang na lao adong be halak na menderita alani cuaca ekstrim.

 Alai sukkun-sukkun do ra rohamuna, ‘Andigan do dipakke Jesus huasona i lao mengendalihon cuaca?’ Lao mamboto alusna, jaha hamu ma artikel “Andigan do Harajaon ni Debata i Mamaretta di Tano on?”

 Adong do ayat ni Bibel na boi mangurupi hamu mamboto aha na ikkon diulahon hamu sebelum masa cuaca ekstrim, saleleng masa, jala dukkon masa i.

•   Sebelum: Bahen hian ma persiapanmuna.

   Didok di Bibel: “Molo dibereng halak na marbisuk adong jea, martabuni do ibana. Alai anggo halak na so marpengalaman, ditorusson do dalanna gabe marjea ma ibana.”—Poda 22:3.

   Artina: Antisipasi hian ma bahaya aha na boi terjadi, asa diboto hamu aha na ikkon diulahon hamu lao manjaga dirimuna dohot keluargamuna.

   Pengalaman: “Tikki kebakaran hutan, boi do hami selamat. Alana nungnga dibahen hami hian persiapan. Nungnga diparade hami hian tas keselamatan, isina adong do pakkean dohot obat-obatan. Tikki panik halak na di sakalilingnami dang dohot hami panik ala nungnga adong hian persiapannami. Mandok mauliate hian do au di tikki i.”—Si Tamara, Kalifornia, Amerika Serikat.

•   Saleleng masa: Fokus ma mamikkirhon akka na uppetting.

   Didok di Bibel: “Nang pe godang arta ni sasahalak, dang sian artana i ngoluna.”—Lukas 12:15.

   Artina: Ummarga do ngolutta sian arta.

   Pengalaman: “Tikki terjadi Topan Lawin b hancur do jabunami, dang huboto aha na lao huulahon. Holan martangiang tu Jahowa ma na boi huulahon. Mago do sude artanami di tikki i, alai mandok mauliate do au ala boi hami selamat.”—Si Leslie, Filipina.

•   Dukkon masa i: Unang terlalu khawatir.

   Didok di Bibel: “Unang ma holsoan hamu lao mamikkiri taringot ari sogot. Ai asing do na taholsohon sadari on dohot di ari sogot. Ganup ari adong be do hasusaanna.”—Mateus 6:34.

   Artina: Unang ma terlalu khawatir hita tu akka na lao masa, alana belum tentu i terjadi.

   Pengalaman: “Banjir do jabunami alani Badai Irma. Stres do au, ala godang hian do na ikkon huulahon. Alai ala huulahon saran na dipaboa di Bibel, gabe dang terlalu khawatir be au. Hurasahon do bantuan ni Jahowa ala sae do sude masalakki.”—Si Sally, Florida, Amerika Serikat.

 Lao mamboto informasi na asing, jaha ma artikel “Cara Agar Bisa Selamat Saat Terjadi Bencana”.