On ma laporan sian Perserikatan Bangsa-Bangsa (PBB):

•   Mulai sian 7 Oktober sahat tu 23 Oktober 2023, adong lobi sian 6.400 halak na mate jala 15.200 halak na lukka alani porang di Gaza-Israel. Godangan na gabe korban i ma masyarakat biasa. Jala dipaksa do marratus ribu halak lao sian inganan i.

•   Di tanggal 24 September 2023 dilaporhon adong 9.701 masyarakat biasa na mate jala 17.748 na lukka alani porang ni Rusia dohot Ukraina.

 Adong do harapan sian Bibel tu akka halak na gabe korban alani porang?

 Didok di Bibel, lao ‘dipaujung Debata do akka porang di saluhut tano on’. (Psalmen 46:9) Dipakke Debata do harajaonna na di surgo lao manggattihon sude pamarettaon na adong di tano on. (Daniel 2:44) Disalpuhon Harajaon ni Debata nama sude sitaonon ni jolma.

 On ma na lao diulahon Jesus Kristus, Raja ni Harajaon ni Debata i:

•   “Paluaonna do akka halak na pogos na jou-jou mangido asa diurupi,jala paluaonna do akka na dangol dohot na so adong pangalu-aluanna. Asi do rohana tu halak na dangol dohot tu halak na pogos, jala dijaga ibana do ngolu ni halak na pogos. Paluaonna do nasida sian akka halak na manusai nasida dohot sian halak na kejam.”—Psalmen 72:12-14.

 Marhite Harajaon ni Debata, diapus Debata ma sude hasusaan alani porang dohot kejahatan.

•   “Apusan ni Debata ma nasa ilu-ilu sian mata ni nasida. Dang adong be hamatean nang arsak ni roha, nang angguk-angguk, nang na haccit, dang disi be. Ai nungnga salpu na parjolo i.”—Pangungkapon 21:4.

 Jadi satokkin nai, lao disalpuhon Harajaon ni Debata do sude masalah na adong di tano on. Sabotulna nungnga dipaboa hian di Bibel memang na lao masa do porang dohot “barita taringot tu akka parporangan” di tikkitta on. (Mateus 24:6) Sude na masa saonari on patuduhon na mangolu di “ari parpudi” do hita.—2 Timoteus 3:1.