Aha do na Didok Bibel Taringot Kelaparan na Masa Saonari?

PANGOLU

“Dang adong be kelaparan di portibi on.” I ma tujuan na naeng dicapai akka pamimpin dunia. Berusaha do nasida menyediahon sipanganon tu sude jolma di tano on. Berharap do nasida boi pasaehon masalah on. Ai on do sada sian masalah na umbalga di portibi on. a Alai mungkin do memang dang adong be kelaparan di portibi on? Boha do didok Bibel?

Nungnga dipaboa Bibel hian taringot hahurangan sipanganon

Nungnga dipaboa hian di Bibel, di “ari parpudi” na lao masa ma hahurangan sipanganon. Terjadi ma i di tikkitta saonari on. (2 Timoteus 3:1) Memang dang Debata na mambahen hahurangan sipanganon i. Alai nungnga dipaboa hian tu hita na lao masa i. (Jakobus 1:13) Parrohahon ma dua surirang ni Bibel taringot i.

“Masa ma haraparon . . . di godang inganan.” (Mateus 24:7) Sada laporan b paboahon, “Nang pe nungnga berusaha akka pamaretta lao pasohon kelaparan dohot kekurangan gizi, alai tong dope adong masalah i. Gariada tamba parah do situasina.” Marratus juta halak di godang negara dang boi dope mandapot sipanganon na dihaporluhon nasida. Ujungna gabe godang ma na mate.

“Huida ma ro sada hoda na birong jala maniop sada timbangan do na hundul di hoda i.” (Pangungkapon 6:5) Hoda dohot na hundul di hoda i manggombarhon kelaparan na masa saleleng ari parpudi. c Timbangan na ditiop i dipakke lao manimbang sipanganon na holan saotik hian. Dung i adong ma soara na paboahon, arga nama annon sude situhoron. Dipasingot do akka halak asa malo-malo nasida mangatur sipanganon asa cukkup. (Pangungkapon 6:6) Cocok do on manggombarhon situasi saonari on. Marmiliar do halak na maol mandapot sipanganon na bergizi.

Dang na lao adong be halak na kelaparan

Didok akka pakar, sabotulna boi do tano on menghasilhon sipanganon tu sude makhluk hidup. Alai boasa ma adong kelaparan? Jala boha do cara ni Jahowa d Sipanoppa i, pasaehon masalah on? Taida ma alusna sian Bibel.

Na mambahen adong kelaparan: Godang do halak saonari na pogos jala mengalami ketidakadilan. Dang boi dipasae pamaretta masalah on. Alani i ma godang na kelaparan.

Na lao bahenon ni Debata: Satokkin nai, Harajaon ni Debata nama na mamaretta di tano on jala manggattihon pamarettaon ni jolma. (Daniel 2:44; Mateus 6:10) Molo nungnga mamaretta Harajaon ni Debata, dang adong be halak na kelaparan songon na taida saonari on. Songon on ma na didok Bibel na lao bahenon ni Jesus Kristus Raja ni Harajaon ni Debata i, “Paluaonna do akka halak na pogos na jou-jou mangido asa diurupi, jala paluaonna do akka na dangol dohot na so adong pangalu-aluanna. . . . Godang ma tubu sipanganon di ladang, haru di pussu ni dolok pe godang do tubu suan-suanan.”—Psalmen 72:12, 16.

Na mambahen adong kelaparan: Molo masa porang di sada daerah, gabe hancur do ekonomi di daerah i. Bahkan boi do i mempengaruhi daerah na asing. Alani i, gabe maol ma halak mandapot sipanganon.

Na lao bahenon ni Debata: “Dipaujung [Jahowa] do akka porang di saluhut tano on. Diponggolhon Ibana do panah, diropukkon Ibana do akka tombak, jala ditutung Ibana do akka kareta porang.” (Psalmen 46:9) Haduan hancurhonon ni Debata nama sude sinjata porang dohot sude halak na marporang. Molo dang adong be porang, dang adong be kelaparan jala mura ma akka halak mandapot sipanganon. Didok do di Bibel, “Gabe lam denggan ma ngolu ni halak na tigor marroha, dos ma nasida songon suan-suanan na lomak. Jala gok ma hadameon.”—Psalmen 72:7.

Na mambahen adong kelaparan: Molo masa bencana alam dohot cuaca ekstrim, gabe sega do suan-suanan jala mate akka ternak.

Na lao bahenon ni Debata: Haduan bahenon ni Debata ma dang adong be bencana alam jala denggan ma cuaca di tano on. Molo nga songon i keadaanna, boi ma denggan tubu akka suan-suanan. Didok do di Bibel, “Dipaso [Jahowa] ma badai i, gabe tenang ma laut i. . . . Dibahen Ibana do gurun gabe kolam, jala dibahen Ibana do tano na koring gabe mata mual. Dibahen Ibana ma halak na male maringanan disi . . . Diula nasida ma ladang dohot porlak anggur gabe godang ma hasil panen ni nasida sian i.”—Psalmen 107:29, 35-37.

Na mambahen adong kelaparan: Godang do halak saonari na mambahen makanan na so sehat bahkan na berbahaya, holan asa mandapot godang uttung. Asing ni i, adong do tong halak na korupsi na sengaja dang olo mangalehon sipanganon tu halak na sabotulna layak mandapot i.

Na lao bahenon ni Debata: Satokkin nai lao pamateon ni Debata nama sude halak na so jujur dohot halak na jahat. (Psalmen 37:10, 11; Jesaya 61:8) Didok do di Bibel, Jahowa i Debata “na mambahen na adil tu halak na dioto-otoi, na mangalehon sipanganon tu halak na male”.—Psalmen 146:7.

Na mambahen adong kelaparan: Ganup taon, bolong do sapartolu bahan makanan di liat portibi on.

Na lao bahenon ni Debata: Molo nga mamaretta Harajaon ni Debata tu tano on, adong do annon na mangatur jala mangurus persediaan makanan. Sian dia taboto na lao bahenon ni Debata songon i? Tikki di tano on Jesus, dang olo ibana mambolokkon sipanganon. Misalna hea do dilehon ibana 5.000 halak mangan marhite mukjizat, jala adong ma lobi ni sipanganon i. Alai didok Jesus do tu akka siseanna, “Papungu hamu ma akka na lobi i asa unang adong na bolong.”—Johannes 6:5-13.

Jadi pos do rohatta haduan dang adong be na mambahen halak kelaparan. Gok nama sipanganon na tabo jala na bergizi di tano on. (Jesaya 25:6) Asa diboto hamu andigan i lao pasauton ni Harajaon ni Debata, jaha ma artikel “Andigan do Harajaon ni Debata i Mamaretta di Tano on?”

a Sian Agenda 2030 untuk Pembangunan Berkelanjutan (The 2030 Agenda for Sustainable Development), naung mulai diulahon sude negara na bergabung tu Perserikatan Bangsa-Bangsa (PBB) mulai sian taon 2015.

b Sian laporan gabungan na dibahen Organisasi Pangan dan Pertanian PBB, Dana Internasional untuk Pengembangan Pertanian PBB, Dana Anak-Anak PBB, Program Pangan Dunia PBB, dohot Organisasi Kesehatan Dunia.

c Molo naeng diboto hamu gumodang hatorangan taringot on, jaha ma artikel “Angka Ise do Na Mangkunduli Hoda I?”

d Goar ni Debata do Jahowa. (Psalmen 83:18) Ida ma artikel, “Ise do Jahowa i?”