Massai penting do aek di ngolutta. Alai songon na didok si António Guterres, Sekretaris-Jenderal PBB, “Lam tamba do godang ni aek na dihaporluhon saonari, hape terjadi do krisis air di liat portibi on.” Marmiliar do halak di liat portibi on na maol mandapot aek.

 Salelengna do terjadi krisis air on? Manang adong do tikkina haduan godang nama aek di tano on? Aha do na didok Bibel taringot i?

Janji ni Debata na disurat di Bibel

 Didok di Bibel, haduan dang adong be halak na hahurangan aek. Godang nama aek na ias jala segar.

 “Godang ma aek kaluar di gurun, jala godang ma sunge di gurun pasir. Tano na harsang alani mohop ni ari gabe songon kolam, jala tano na koring gabe songon mata mual.”—Jesaya 35:6, 7.

 Porsea do hita tu na didok Bibel on? Pikkirhon ma aha na didok Bibel taringot songon dia tano on dirancang.

Na didok Bibel taringot tano on dohot siklus air

 “Dang na lao marisuang [tano on] ditoppa [Debata], alai ditoppa do i lao diingani.”—Jesaya 45:18.

 “Dibahen [Debata] do nakkok uap ni aek tu ginjang. Gabe ombun ma i, jala sian i ma ro udan. Dung i turun ma udan sian ombun i, tu atas ni sude jolma.”—Job 36:27, 28.

 “Parookku ma udan tu hamu di tikkina, asa dilehon tano i hasilna jala asa marparbue akka hau na di ladang.”—3 Musa 26:4.

 Godang do partani di Israel najolo. Marjanji do Debata lao mamasu-masu hasil panen ni nasida. Alai asa boi terjadi i, ikkon lehononna do tu nasida godang aek. Alana diboto Debata, massai penting do aek asa boi tubu suan-suanan jala boi panen pas di tikkina.

 Songon na dibahen Jahowa tu halak Israel najolo, songon i ma bahenonna haduan tu saluhut tano on. (Jesaya 30:23) Alai sahat tu tikki on, godang do inganan di liat portibi on na hurangan aek. Sada na mambahen i terjadi, ala jarang ro udan. Songon dia do didok Bibel lao mangatasi masalah on?

Dang adong be na hurangan aek

 Dang sanggup pamarettaon ni jolma mangatasi krisis air. Alai didok di Bibel, marhite Harajaon ni Debata lao dipasae ma sude masalah na adong di tano on, termasuk ma krisis air. (Mateus 6:9, 10) Na lao mamaretta ma Harajaon ni Debata i sian surgo tu tano on. (Daniel 2:44; Pangungkapon 11:15) Dung i, padengganon ni Harajaon i ma sude masalah na mambahen terjadi krisis air.

 Masalah: Perubahan cuaca na so stabil berpengaruh do i tu siklus air. Akibatna adong ma deba inganan na mengalami kekeringan, alai di inganan na asing terjadi do banjir, ala torus ro udan na doras manang ala naik permukaan air laut.

 Solusina: Padengganon ni Harajaon ni Debata ma tano on, asa boi denggan muse songon tikki parjolo ditoppa. Nungnga marjanji Debata, “Ida ma! Hupaimbaru do saluhutna.” (Pangungkapon 21:5) Haduan, godang nama aek di akka inganan na gersang. Alani i boi ma tubu suan-suanan disi jala boi ma diingani. (Jesaya 41:17-20) Dung mamaretta haduan Harajaon ni Debata di tano on, lao dikendalihon Jesus do kekuatan alam asa unang manegai tano on.

 Masalah: Holan mamikkirhon dirina sandiri nama saonari akka jolma. Sega do dibahen nasida tano on. Misalna, alani ulaon ni nasida gabe tercemar do aek na adong di sunge, tao, dohot na adong di toru ni tano. Ujungna gabe maol ma mandapot aek na ias.

 Solusina: Dang pasombuon ni Debata torus sega tano on. Lao padengganonna do i jala bahenonna muse gabe paradeiso. Alani i, dang na lao tercemar be sunge, tao, laut, dohot darat. Didok di Bibel, “Marlas ni roha ma gurun pasir dohot tano na harsang, marlas ni roha ma gurun jala gok ma akka bunga disi.”—Jesaya 35:1.

 Masalah: Ala dang marbisuk jolma mamakke aek, gabe unggodang do aek na bolong sian aek na boi dihasilhon.

 Solusina: Marhite Harajaonna, pasauton ni Debata ma lomo ni rohana tu tano on. (Mateus 6:9, 10) Songon na didok di Jesaya 11:9, “gok parbinotoan taringot Jahowa do saluhut tano on” haduan. a Di Harajaon ni Debata, diajari ma sude jolma asa makkaholongi Jahowa jala parduli tu akka toppaanna. Molo nga saut i, denggan ma annon diurus jolma tano on dohot sumber daya alam.

•    Asa diboto hamu aha do na lao ulahonon ni Harajaon ni Debata, jaha ma artikel “Aha do na Lao Ulahonon ni Harajaon ni Debata?”

•    Asa diboto hamu aha na terjadi dung gabe paradeiso tano on, jaha ma bukku Jesaya bindu 35.

•    Asa diboto hamu aha do tujuan ni Debata manoppa tano on dohot jolma, tonton ma video Aha do na Tinuju ni Debata Manompa Tano On?