Lomo hian do roha ni Punguan na Mangaradoti Organisasi mendukung ulaon marbarita di liat portibi on. Alani i denggan do dipakke nasida hepeng sumbangan lao mambangun akka fasilitas na boi mendukung ulaon i. Contohna saleleng taon dinas 2023, adong ma lobi sian 500 juta dolar AS naung dipakke akka badan hukum ni akka kantor cabang Saksi Jahowa lao manuhor, mambangun, merenovasi, dohot memelihara Bale Harajaon dohot Bale Kebaktian na adong di liat portibi on. Hepeng on dang termasuk dope biaya na dipakke akka huria lao memelihara Bale Harajaon ni nasida.

 Asing ni i, akka sumbangan on pe dipakke do lao mambangun dohot memelihara akka kantor cabang, na boi mendukung ulaon marbarita. Saonari lebih sederhana do dibahen cara kerja di akka kantor cabang. Alani i boi ma unggodang hepeng sumbangan dipakke lao mambangun jala merenovasi Bale Harajaon dohot Bale Kebaktian. Jala godang dope muse kantor cabang na porlu dipadenggan, direnovasi, manang dipapinda. Boasa massai penting diulahon on? Akka aha do na dibahen kantor cabang lao mendukung ulaon marbarita? Taida ma alusna.

 Godang do kantor cabang naung dibangun lobi sian 30 manang 40 taon! Si Nicholas, na karejo di Departemen Rancang/Bangun Sedunia mandok, “Nang pe denggan tarawat akka bangunan i, alai lam leleng pasti adong do na porlu dipadenggan. Jadi asa boi torus dipakke bangunan i, porlu do direnovasi.”

 Akka bangunan di Betel pe porlu do disesuaihon. Ala torus do martamba godang ni Saksi Jahowa di liat portibi on, dihaporluhon do godang relawan na lao karejo di Betel. Jadi asa boi menampung sude na karejo disi, godang do kantor cabang na ikkon dipabalga.

 Asing ni i, dipikkirhon do tong taringot keamanan. Ala mangolu di ari parpudi hita saonari, lam sering do terjadi bencana alam. (Lukas 21:11) Alani i tikki adong kantor cabang na direnovasi, dipakke do teknik pembangunan na terbaru asa kuat bangunan i. Jala molo terjadi bencana, boi ma aman akka na karejo disi. Asing ni i, boi ma muse dipakke akka bangunan i lao mangatur bantuan kemanusiaan dohot mendukung ulaon marbarita dung terjadi bencana.

 Mangihutton petunjuk sian Punguan na Mangaradoti Organisasi, saleleng taon dinas 2023, adong ma dibahen proyek pembangunan dohot renovasi di 43 kantor cabang. On berarti hampir satonga ma kantor cabang di liat portibi on na lagi pembangunan. Saonari taida ma piga-piga contohna jala aha manfaatna diulahon i.

 Angola. Si Matt, sahalak anggota Panitia Cabang di Angola mandok, “Boi do diida hami surirang di Haggai 2:7 digenapi di cabangnami. Di bagasan sappulu taon on, 60 persen ma tamba godang ni penyiar di Angola! Lao mendukung pertumbuhan on, sebenarna ikkon tolu hali loppit ma godang ni akka relawan na lao karejo di Betel. Hape terbatas do fasilitas Betel dison, jadi dang boi diundang hami godang halak lao karejo dison. On mambahen gabe kerja keras ma godang anggota keluarga Betel jala sering lembur.”

 Adong ma piga-piga donganta na ditugasson lao mangalului boha carana asa boi dipabalga kantor cabang di Angola. Mulana, didok roha ni nasida tumagon do bangunan ni Betel i na direnovasi. Alai dung dipertimbakkon muse, diboto nasida ma dang i cara na terbaik mamakke hepeng sumbangan. Jadi saran ni nasida i ma manuhor bangunan na jonok tu kantor cabang jala direnovasi ma i. Didok si Matt, “Tikki dipaboa rencana on tu Panitia Cabang, didok rohanami pasti dang sarupa denggan ni bangunan i martimbakkon molo hita sandiri na mambangun sian awal. Alai dung sae bangunan i direnovasi, cocok do hape i tu kebutuhannami. Dipasu-pasu Jahowa do keputusan na dibahen hami i.”

 Haduan olo do ra bangunan di Betel Angola porlu ditambai muse. Alai bangunan na baru dituhor i, bangunan-bangunan modular tempat tinggal anggota keluarga Betel, dohot apartemen na disewa, nungnga cukkup memenuhi kebutuhan ni cabang Angola saonari lao mendukung pertumbuhan na luar biasa di lapangan.

 Jepang. Bangunan utama di cabang Jepang dibangun hira-hira 40 taon na salpu jala dang hea dope direnovasi secara keseluruhan. Denggan do dirawat akka bangunan i. Alai ala nungnga leleng hian bangunan i, porlu do i direnovasi. On ma saonari proyek na dikarejohon di kantor cabang Jepang.

 Piga-piga taon on adong do perubahan na dibahen di Betel. Sebelum taon 2015, disediahon do sipanganon ni anggota keluarga Betel. Ido alana dang balga dibahen “dapur” di setiap kamar. Alai saonari, dibahen do pengaturan asa nasida sandiri na paradehon sipanganonna. Jadi dung direnovasi akka kamar ni nasida, gabe tabo ma dihilala nasida tikki mangaloppa. Si Kumiko na karejo di cabang Jepang mandok, “Dung adong dapur on, hira na tinggal di jabu ma au hurasa. Alani i boi ma au mangihutton pengaturan baru na dibahen di Betel.”

 Balga do pengaruh ni ulaon na diulahon di kantor cabang Jepang lao mendukung ulaon marbarita di liat portibi on. (Mateus 28:19, 20) Holan dua do kantor cabang na mancetak Bibel na lengkap, cabang Jepang ma sala satuna. Jadi tikki direnovasi kantor cabang on, sada proyek na diulahon i ma mamasang alat na boi menyedot sisa kertas dohot debu. Penting hian do alat on dipasang asa tetap sehat akka na karejo di bagian Percetakan. Hampir sajuta dolar AS ma arga ni alat i dohot biaya pemasanganna. Alai ala dipasang alat on, gabe boi ma torus kantor cabang Jepang mancetak jala makkirim akka publikasi tu hita, termasuk ma Bibel.

 Nang pe lagi direnovasi bagian Percetakan i, alai tetap do mardalan ulaon mancetak Bibel. Si Trey, sahalak anggota Panitia Cabang Jepang mandok, “Nang pe adong proyek renovasi, alai tetap do adong Bibel na dirilis, bahkan lam godang do Bibel na dipesan. Tikki mamasang alat na baru i, kerja sama do piga-piga departemen di Betel dohot kontraktor. Jadi dang targanggu na karejo di bagian pencetakan.” Godang do tantangan saleleng proyek renovasi on. Alai nang pe songon i, boi do dicetak hampir 220.000 Bibel setiap bulan mulai sian bulan Maret sahat tu Agustus 2023. Hape di bulan i ma proyek renovasi Percetakan i na paling sibuk. Jala boi do sae proyek on sesuai tu biaya naung ditottuhon hian.

 Di proyek renovasi cabang Jepang on dibahen do akka bangunanna hemat energi. Dipasang ma akka panel surya na baru. Ala dipasang alat on, gabe boi ma hemat biaya hira-hira 120.000 dolar AS setiap taon. Asing ni i dipasang do muse jendela kaca berlapis tiga. Alani i boi ma muse hemat biaya 10.000 dolar AS setiap taon. Memang gabe tamba do biaya renovasi lao mamasang panel surya dohot jendela kaca berlapis tiga on. Alai dung dipasang i, gabe boi do hemat biaya pengeluaran lobi sian 3,5 juta dolar AS. Jala akka alat on mambahen bangunan i ramah lingkungan.

 Sian proyek di dua kantor cabang on boi ma taboto balga hian do pengaruh ni ulaon di Betel tu ulaon marbarita na uli. Alai godang dope proyek na ikkon diulahon. Si Aaron na karejo di bagian Departemen Rancang/Bangun Sedunia mandok, “Memang nungnga godang proyek naung sae taulahon, alai godang nai dope muse na ikkon diulahon.” Alai boasa boi sae sude ulaon i? Didok si Aaron, “Boi pe sae akka proyek on ala adong do sumbangan sukarela. Asing ni i, godang do akka donganta na rela mambahen penyesuaian asa boi dohot mangurupi akka proyek i. Jala pos do rohatta rade do muse akka donganta mangurupi akka proyek na mangihut. Mandok mauliate do hita tu sude upaya naung dibahen nasida. Jadi sian sumbangan dohot kerelaan ni akka donganta na mangurupi di proyek on patuduhon, dipasu-pasu Jahowa do ulaonta on.”—Psalmen 110:3.

 Sude proyek pembangunan dohot renovasi on boi diulahon alani sumbangan sukarela. Godang do akka sumbangan i dilehon marhite donate.pr418.com. Mauliate godang ma di haburjuonmuna i.