Di taon 2020, godang do masa bencana jala masa do muse pandemi COVID-19 di liat portibi on. Songon dia do Saksi Jahowa mangurupi akka halak na hona dampak ni bencana dohot pandemi on?

 Saleleng taon dinas 2020, a disetujui Panitia Kordinator sian Punguan na Mangaradoti ma asa dipakaluar hepeng hira-hira 395 miliar rupiah lao mangurupi akka na hona bencana. Adong ma lobi sian 200 bencana na masa, termasuk ma i pandemi COVID-19, siklon tropis, banjir di Afrika, kekurangan makanan di Venezuela, dohot logo ni ari na massai leleng di Zimbabwe. Akka sumbangan i dibahen lao manuhor sipanganon, siinumon, tempat tinggal sementara, pakkean dohot akka obat-obatan. Asing ni i muse, dipakke do i lao manuhor akka alat kebersihan, padenggatton akka na sega, dohot mambangun. On ma piga-piga contoh na diulahon lao mangurupi.

 COVID-19. Sude do akka donganta di liat portibi on gabe susa alani pandemi on. Lao mangurupi nasida, dibahen ma lobi sian 800 Panitia Penanggulangan Bencana (PPB) di liat portibi on. Nasida ma na mamparrohahon dohot na mangalehon laporan tu Panitia Kordinator. Alani i, gabe boi ma diatur Panitia Kordinator songon dia mangalehon bantuan tu akka donganta.

 Saleleng taon dinas 2020, godang do akka donganta na diurupi PPB asa mandapot sipanganon, siinumon, akka na dipakke lao sanitasi, dohot akka ubat. Di piga-piga inganan, kerjasama do PPB dohot akka sintua na adong di inganan i mangurupi akka donganta asa boi mandapot bantuan sian pemerintah.

 Diparrohahon akka halak na so Saksi Jahowa do akka bantuan na dibahen hami on. Contohna, si Field Simwinga, sahalak pejabat di kota Nakonde di Zambia mandok tu akka donganta, “Mandok mauliate do hami tu bantuan na dilehon hamuna i. Tepat waktu do hamu mangalehon bantuan, jala bantuan na dilehon hamuna i, i do na massai dihaporluhon akka halak na hona dampak ni pandemi on.”

 Kekurangan Makanan di Angola. Alani pandemi COVID-19 on, maol do mandapot sipanganon di Angola. Jala molo adong pe, massai arga do i. Godang do akka donganta disi na lam maol manuhor akka sipanganon.

 Dipangido ma tu kantor cabang Brasil asa dikirim sipanganon tu akka donganta di Angola. Asa boi denggan dipakke akka sumbangan i, jolo dilului do cara na cocok lao manuhor dohot mangirim sipanganon i. Jadi dituhor nasida ma sahali godang sipanganon. Ujungna, boi ma dapot ni nasida hira-hira 300.000 rupiah sapaket, nga termasuk i ongkos kirimna. Borat ni sapaket 20 kilogram ma. Jala isi ni sapaket adong boras, kacang-kacangan, dohot miak goreng. Nungnga adong 33.544 paket naung dikirim. Totalna sude hira-hira 654 ton ma. Jadi molo dipapungu sude sipanganon na dikirm sian Brasil dohot sipanganon na dipapungu sian Angola, boi ma mangalehon mangan lobi sian 50.000 halak!

 Songon dia do perasaan ni akka donganta ala mandapot bantuan i? Contohna, donganta si Alexandre, tinggal di inganan na terpencil do ibana di Angola. Didok ibana, “Takkas do huida na holong roha ni Jahowa tu au jala dang dipasombu sahalakku. Arga do au di organisasi ni Jahowa.” Contoh na asing i ma si Mariza, orang tua tunggal do ibana. Didok ibana, “Dibege Jahowa do tangiakki, mandok mauliate do au tu Ibana dohot tu organisasina!”

 Logo ni Ari na Massai Leleng di Zimbabwe. Saleleng taon dinas 2020, ala masa logo ni ari na massai leleng di Zimbabwe, gabe marjuta ma halak na kelaparan. Jala marribu Saksi di Zimbabwe na kekurangan makanan.

 Dibentuk ma lima PPB lao mangalehon akka sipanganon tu akka donganta disi. Marratus akka donganta mangurupi lao mambukkus akka sipanganon i, pamasukkon sude sipanganon i tu kendaraan, manang maminjappon kendaraan ni nasida lao mangirim sipanganon i. b Jadi saleleng taon dinas 2020, nungnga dipakaluar hepeng hira-hira 978 juta rupiah na dipakke lao mangalehon sipanganon tu lobi sian 22.700 halak!

 Di piga-piga situasi, pas tikki nga habis sipanganon ni akka donganta, nungnga ro bantuan. Tikki sahat sipanganon i, langsung dipuji nasida ma Jahowa. Jala adong do piga-piga sian nasida sappe mangendehon ende Harajaon.

 Di sada inganan, adong ma dua donganta borua na mabalu ro tu sada pertemuan na dibahen sada organisasi na so sian pemerintah, lao mambahas taringot bantuan makanan. Hape lam leleng, diida nasida ma adong do hubungan ni pertemuan i tu politik. Jadi dang olo nasida mangihutton aha na dipangido organisasi i asa boi mandapot bantuan. Ujungna, ditinggalhon nasida ma pertemuan i jala direhei ma nasida. Didok ma tu nasida, “Unang dirippu hamu boi dapotmuna sipanganon sian hami da!” Alai dua minggu dukkon i, ro ma akka donganta mamboan persediaan makanan tu akka donganta on. Hape bantuan na sian organisasi i, dang ro dope.

 Gabe sada kesaksian do bantuan na talehon i di Zimbabwe. Contohna, donganta si Prisca, na tinggal di sada huta na gelleng. Nang pe songon i situasi di Zimbabwe manang tikki masa mangula pe, tong do marbarita si Prisca ganup ari Rabu dohot ari Jumat. Direhei parhuta i do si Prisca. Didok nasida tu ibana, “Kelaparan do annon keluargam molo holan na sai marbaritai ho.” Alai didok si Prisca ma, “Dang tinggalhonon ni Jahowa akka naposona.” Dang sadia leleng, ro ma bantuan makanan sian organisasitta. Gabe heran ma akka tetanggana jala didok nasida ma tu ibana, “Dang ditinggalhon Debatami hape ho. Gabe lomo do rohanami naeng mamboto taringot Ibana.” Ujungna, pitu tetanggana nungnga dohot marpungu na disiarhon sian radio.

 Ala nungnga mangolu di ari parpudi hita, pasti ikkon terjadi dope akka bencana. (Mateus 24:3, 7) Alani akka sumbanganmuna i, gabe boi ma akka donganta mandapot akka na porlu di nasida. Mandok mauliate do hami tu sude akka sumbanganmuna na dilehon marhite godang cara di situs donate.pr418.com.