Di bulan Juli dohot Agustus 2020, sude akka donganta di liat portibi on manonton acara kebaktian regional di tikki na sarupa. On dope parjolo sahali dibahen songon on. Jadi rekaman acarana porlu diterjemahon tu lobi sian 500 bahasa. Biasana, hira-hira sataon ma lelengna lao makkarejohon proyek sisongon on. Alai alani pandemi virus corona on, holan opat bulan do tikki ni akka penerjemah lao menerjemahon acara Kebaktian Regional 2020 “Sai Marlas ni Roha ma Hamu”.

 Boi pe sae proyek on, ala na diurupi Layanan Penerjemahan do dohot Departemen Pembelian Global sian kantor pusat ni Saksi Jahowa. Diboto Layanan Penerjemahan do, porlu do ditambai peralatan tu akka tim penerjemah, tarlumobi mikrofon na berkualitas. Jadi, dituhor Departemen Pembelian Global ma 1.000 mikrofon. Jala diatur ma i asa hatop dikirim tu hira-hira 200 lokasi.

 Asa boi hemat biaya, dituhor ma akka mikrofon i sahali godang jala dikirim ma i holan tu sada lokasi. Sian i, baru ma dikirim tu akka penerjemah di liat portibi on. Alani i, gabe ummura ma arga ni mikrofon i. Hira-hira 2,5 juta rupiah ma arga ni sada mikrofon, jala nga termasuk i ongkos kirimna. Gabe boi ma hita menghemat biaya lobi sian 20 persen.

 Saleleng bulan April dohot Mei 2020, diatur Departemen Pembelian Global ma asa dituhor jala dikirim akka barang i. Hape di tikki i, godang do perusahaan na so boi karejo songon na biasa alani pandemi on. Alai nang pe songon i, di ujung ni bulan Mei nga sahat akka peralatan i tu sude tim penerjemah di kantor penerjemahan, di kantor cabang, dohot di inganan na asing.

 Donganta si Jay Swinney na mengawasi Departemen Pembelian Global mandok, “Adong do kerjasama na denggan sian departemen di Betel dohot akka perusahaan na dohot mangurupi proyek on. Jala ala na diurupi tondi parbadia ni Jahowa do umbahen na boi hatop taurupi akka donganta jala dang pola godang kaluar biaya.”

 Donganta si Nicholas Ahladis na mangurupi di Layanan Penerjemahan mandok, “Ala lockdown dang boi akka penerjemah rap karejo. Alani i, tikki dijalo nasida akka peralatan on las hian do roha ni nasida. Alana gabe boi nasida toktong denggan karejo. Hasilna, gabe boi ma diterjemahon jala direkam akka jamita, drama, dohot ende tu lobi sian 500 bahasa.”

 On ma sada sian godang proyek na diulahon lao mambahen Kebaktian Regional 2020 “Sai Marlas ni Roha ma Hamu”. Boi pe sude akka peralatan i dituhor, alana rade do akka donganta mangalehon sumbangan marhite donate.pr418.com manang marhite akka cara na asing.