Marratus ribu do halak na tardidi ganup taon. Alani i, porlu do ditambai akka fasilitas na dipakke lao manomba Jahowa. I do alana, saleleng taon dinas 2020 a Rancang/Bangun Setempat mambahen rencana lao mambangun manang mangarenovasi lobi sian 2.700 inganan lao beribadat.

 Alai, alani pandemi COVID-19 godang do rencana i na gabe sundat. Godang do proyek i na dipaso Punguan na Mangaradoti sian Panitia Penerbitan. Alana, lao manjaga akka donganta asa unang hona virus jala mangihutton peraturan na dibahen pamaretta. Alai saleleng taon dinas 2020, lobi sian 1.700 inganan beribadat naung dibangun jala direnovasi andorang so masa dope pandemi on. Asing ni i muse, lobi sian 100 proyek ni kantor cabang na sae dibangun. Taida ma aha manfaatna tu akka dongan dung sae dibangun dua proyek on.

 Kantor cabang Kamerun. Kantor cabang on adong di Douala jala gelleng do kantorna. Alani i, porlu do dipabalga kantor cabang on. Jadi direncanahon Panitia Penerbitan ma naeng mangarenovasi kantor cabang i. Alai gabe unggodang do biaya mangarenovasi sian arga ni bangunan i. Adong muse pilihan na asing, i ma mambangun bangunan na baru di inganan na asing, manang manuhor naung adong bangunanna jala mangarenovasi muse. Alai dang adong na saut sian rencana na dua i ala dang cocok situasina.

 Hape diboto akka donganta na di Douala utara ma, na lao dibahen pamaretta dalan tu arah ni Bale Kebaktianta. Molo nungnga denggan dalan, gabe mura ma mamboan akka bahan bangunan tu inganan i. Cocok hian ma situasi i tu kebutuhan ni kantor cabang. Ujungna, disetujui Punguan na Mangaradoti ma asa dibangun kantor cabang na baru di labbung ni Bale Kebaktianta.

 Rap kerja sama do akka Saksi dohot kontraktor na digaji lao mangulahon proyek i. On ma sada cara asa boi hemat hepeng jala boi hatop sae proyek i. Buktina sae do proyek i jala boi do dihemat biaya lobi sian dua juta dollar AS sian biaya na diperkirahon hian. Gabe boi ma hatop keluarga betel pinda tu kantor cabang na baru on, andorang so masa dope pandemi COVID-19.

 Gabe las ma roha ni akka dongan na karejo di kantor cabang Kamerun. Alana nungnga lam denggan tempat tinggal dohot inganan karejo ni nasida saonari. Jala diboto nasida do molo kantor cabang na baru on sada hadiah sian Jahowa. Pasangan suami istri mandok, “Ikkon tamba semangat do hami karejo jala ikkon dipatudu hami do na diargai hami hadiah na sian Jahowa on.”

 Kantor Penerjemahan di Tojolabal, Meksiko. Saleleng martaon-taon, di kantor cabang Amerika Tengah do tim penerjemah bahasa Tojolabal karejo, jonok tu kota Meksiko. Hape, di Altamirano dohot di Las Margaritas do na unggodang halak mamakke bahasa Tojolabal on, na daona hira-hira 1.000 kilometer sian kantor cabang. Ala sai berubah do bahasa jala akka tim penerjemah on pe dang tinggal di daerah ni halak na mamakke bahasa Tojolabal, gabe maol ma diboto nasida akka aha do bahasa na berubah. Jala gabe maol do kantor cabang mangalului akka dongan na boi marbahasa Tojolabal na jonok tu kantor cabang lao mangurupi di bagian penerjemahan dohot di bagian rekaman.

 Alani i, direncanahon Panitia Penulisan sian Punguan na Mangaradoti ma lao papindahon tim penerjemahan on tu daerah ni akka halak na mamakke bahasa Tojolabal. Lao pasautton i, dibahen kantor cabang ma keputusan lao manuhor bangunan jala mangarenovasi. Dibahen pe keputusan on, alana ummura do biaya mangarenovasi sian manewa kantor.

 Sahalak penerjemah paboahon manfaat na dihilala ibana. Didok ibana, “Nungnga sappulu taon au gabe penerjemah di kantor cabang. Alai dang hea dope adong juppangku sada keluarga na jonok tu kantor cabang na mamakke bahasakku. Saonari, nungnga dibahen be kantornami di daerah ni akka halak na marbahasa Tojolabal. Ganup ari ma au pajuppang dohot akka halak na marbahasa Tojolabal. Alani i, gabe godang ma na huboto bahasa na baru na somal dipakke jala gabe lam denggan ma hasil terjemahannami.”

 Tu taon dinas 2021, nungnga dibahen rencana lao mambangun 75 kantor penerjemahan dohot fasilitas tu sikkola Alkitab. Di mulai ma on molo nungnga denggan situasi. Jala lao dilanjutton do muse ualu proyek utama ni kantor cabang, termasuk ma i proyek na baru na adong di Ramapo, New York dohot cabang na adong di Argentina dohot di Italia. Ditamba muse, adong lobi sian 1.000 Bale Harajaon na ikkon dibangun, lobi sian 6.000 inganan parpunguan na so cocok be dipakke jala porlu ikkon digatti. Asing ni i muse, adong 4.000 Bale Harajaon na ikkon direnovasi.

 Sian dia do biaya na dipakke tu sude proyek pembangunan dohot lao mangarenovasi? Tikki mambahas taringot proyek pembangunan kantor penerjemahan Tojolabal, si Lázaro González sahalak sian Panitia Cabang di Kantor Cabang Amerika Tengah mandok, “Di daerah cabangnami, terbatas do sumber daya. Alani i, molo dang ala na diurupi akka dongan, dang mungkin boi dibangun hami kantor penerjemahan on na lao tu akka dongan na marbahasa Tojolabal. Alani sumbangan sian akka dongan di liat portibi on, gabe boi ma akka penerjemah jonok tu daerah ni akka halak na marbahasa Tojolabal.” Mandok mauliate do hami tu sude akka dongan na di liat portibi on. Alani sumbangan na dilehon hamu tu ulaonta na di liat portibi on jala godang do muse na mangalehon marhite donate.pr418.com gabe boi ma sae proyek on.