Tubu di Kota Calgary provinsi Alberta, Kanada do au. Nga marsirang natua- tuakku tikki poso-poso dope au. Jadi gabe di jabu ni oppung do au dohot omak tinggal. Massai burju do oppungku tu hami na dua. Tikki i sonang do parngoluokku huhilala.

 Alai dung marumur pitu taon au, muba ma sude. Menikah do muse omakku dohot bapakku. Dung i pinda ma hami tu kota St. Louis, Missouri, Amerika Serikat. Baru huboto ma halak na kasar do hape bapakku. Hea ma tikki pas baru masuk sikkola au, direhei jala dipukkuli akka donganku ma au. Alai dang olo au mambalos nasida. Dung diboto bapakku na so hubalos nasida, gabe au do na dimuruki. Dipukkuli ma au, massai haccit do au dipukkuli. Umhaccit do sian na dibaen akka donganku. Mulai sian i, gabe sai holan na martubbuki do au dohot akka donganku. Dang olo be au sip molo adong na jugul tu au. Hape pitu taon dope umurhu di tikki i.

 Muruk jala kecewa do omakku tu bapakku alani sifatna i. Sering do nasida marbadai. Tikki marumur 11 taon au, holan na mabuk ma karejokku jala mamakke narkoba. Gabe halak na kasar do au jala holan na martubukki do ulaonku. Dung tammat SMA, gabe lam jahat do pangalahokku.

 Dung marumur 18 taon, bergabung ma au dohot korps Marinir Amerika Serikat. Disi adong pelatihan na mambaen gabe lam jahat pangalahokku. Diajari do au carana mambunu jolma. Lima taon dukkon i, kaluar ma au sian i. Kuliah ma au di Amerika Serikat, jala marsiajar taringot Psikologi. Alana asa boi au karejo di Biro Investigasi Federal Amerika Serikat (FBI). Alai mulak ma au muse tu Kanada, gabe disi ma hulanjutton kuliahku.

 Tikki kuliah, kecewa do au tu akka jolma dohot tu akka organisasi na dibaen nasida. Godang do akka halak na holan mamikkirhon dirina sandiri, jala dang adong na boi pasaehon akka masalah na adong di portibi on. Dang porsea be au tu akka jolma.

 Dang huboto be aha tujuan ni ngolukku. Gabe sursar ma ngolukku. Holan hepeng ma na hupikkiri, boru-boru, minum-minum, dohot marnarkoba. Holan na marpesta pora ma karejokku, jala margatti-gatti do borua donganku modom. Ala tentara hian do au, gabe holan na martubukki ma karejokku. Menuruttu marhak do au manonttuhon dia na denggan dohot na dang. Molo adong hubereng halak na sai naeng lomo-lomona, ikkon hutubbuki do ibana. Nga denggan menuruttu na huulahon i. Hape sasittongna ala na so boi do hukendalihon dirikku molo lagi muruk au.

 Sada tikki, rap mambungkus ganja ma au rap dohot donganku lao digadis. Alai hami sandiri pe marnarkoba do. Dung i disukkun donganki ma au, porsea do ho adong Debata manang na dang? Jadi hualusi ma, ”‏Molo Debata do na mambaen hita susa, dang olo au mananda Debata.”‏ Marsogotna i, di tempat karejokku na baru, adong dongan sakarejokku sahalak Saksi Jahowa. Disukkun ibana ma, “Menurutmu, Debata do na mambaen hita susa manang na dang?” Tarsonggot do au ala disukkun taringot i, alana i do na hudokkon tu donganku nattoarina i. Gabe godang ma sukkun-sukkunku tu ibana. Saleleng onom bulan, godang do na dibahas hami. Jala sude sukkun-sukkunku na so boi taralusi saleleng on, boi do dialusi ibana sian Bibel.

 Tikki i, rap dohot tunanganku do au tinggal. Dang lomo rohana molo huceritahon akka naung huparsiajari. Di sada tikki hupaboa ma tu ibana, naeng huundang do Saksi Jahowa tu jabu asa boi hami na dua rap marsiajar. Alai sadari dukkon i, lao do ibana maninggalhon au. Jala diboan ibana do akka barang na di jabu. Lao ma au mangida tu luar, lungun ma huhilala gabe tangis ma au. Jala martangiang do au tu Debata asa diurupi au. I ma parjolo sahali au martangiang mamakke goar ni Jahowa.—Psalmen 83:18.

 Dua ari dukkon i, marsiajar ma au dohot Saksi Jahowa na suami istri. Dung mulak nasida, hujaha ma bukku Saudara Dapat Hidup Kekal dalam Firdaus di Bumi. a Sappe habis do hujaha bukku i dibagasan saborngin i. Hona do tu rohakku tikki marsiajar taringot Debata Jahowa dohot taringot Jesus Kristus Anakna. Gabe huboto ma Debata na parasi roha do hape Jahowa jala lungun do rohana mangida hita susa. (Jesaya 63:9) Na paling mambaen au terharu, i ma tikki huboto na holong do roha ni Jahowa tu au. Rela do Ibana mangalehon Anakna Jesus Kristus demi au. (Johannes 4:10) Huboto ma muse, saleleng on sai sabar do Jahowa tu au ala ”‏dang lomo rohana diripasson manang ise pe, alai naeng ma sude jolma marhamubaon”‏. (2 Petrus 3:9) Menuruttu lomo do roha ni Jahowa asa marale-ale au dohot Ibana.—Johannes 6:44.

 Di Minggu i, dohot ma au tu parpunguan ni Saksi Jahowa. Dang suman penampilanku tikki ro tusi. Ganjang do obukku jala mamakke anting-anting. Alai nang pe songon i, disambut nasida do au. Dibaen do au songon keluarga ni nasida. Sian i gabe huboto ma toho do nasida halak Kristen na sittong. Gabe songon na di jabu ni oppungku na hinan ma perasaanku. Bahkan ussonang sian i do huhilala tikki rap dohot Saksi Jahowa.

 Dang leleng dukkon i, hubahen ma piga-piga perubahan. Hupangkas ma obukku jala dang huulahon be seks na so patut. Dang marnarkoba be au jala dang olo be au mabuk. (1 Korint 6:9,10; 11:14) Lomo rohakku naeng mambaen las roha ni Jahowa. Dung huboto adong pangalahokku na so dihalomohon Jahowa, hira na ditusuki piso ma huhilala ate-atekku. Jadi berupaya ma au manguba cara marpikkir dohot pangalahokku. Balga do manfaat na huhilala ala berupaya mangulahon akka na mambaen las roha ni Jahowa. Onom bulan dukkon marsiajar Bibel, tardidi ma au di tanggal 28 Juli 1989.

 Godang do pangalahokku naung muba ala marsiajar Bibel. Najolo molo pajuppang au tu halak na garang, boi do au unggarang sian nasida. Alai saonari berupaya do au asa boi mardame dohot sude jolma. (Rom 12:18) Gabe lam denggan ma ngolukku. Alai dang alani gogokku i. Ala diurupi Jahowa do au marhite tondi parbadiana dohot Bibel.—Galatia 5:22, 23; Heber 4:12.

 Dang huulahon be seks na so patut, marnarkoba, jala dang garang be au. Saonari berupaya do au mambaen las roha ni Jahowa jala mangalehon na dumenggan tu Ibana. Termasuk ma i berupaya mangurupi akka halak asa dohot mananda Jahowa. Piga piga taon dukkon tardidi, pinda ma au tu inganan na massai dao lao mangurupi ulaon marbarita disi. Las hian do rohakku marbarita alana gabe boi do huurupi akka halak marsiajar Bibel, jala huida ma songon dia Bibel mambaen lam denggan ngolu ni nasida. Na paling mambaen las rohakku, gabe Saksi Jahowa ma omakku. Sada alasan na mambaen olo ibana gabe Saksi Jahowa, i ma ala lam denggan do parngoluokku dung marsiajar Bibel.

 Di taon 1999, dohot ma au tu sikkola na saonari digoari Sikkola tu Parbarita Harajaon. Di sikkola i dilatik do au asa lam terampil marbarita, mangajari, dohot manggembalahon sidang. Di akhir taon 1999, menikah ma au tu si Eugenia. Burju jala bagak do ibana. Melayani ma hami na dua gabe pelayan sepenuh waktu di Guatemala.

 Dang kecewa be au tu akka na masa di portibi on, alai puas jala bahagia do huhilala saonari. Ala mangihutton nasehat ni Bibel, dang halak na garang be au jala dang huulahon be seks na so patut. Saonari dame do huhilala ngolukku jala boi ma huhilala holong na tulus.