Tubu di Gomba do au di Uganda. Unggodang do halak na pogos na tinggal di hutanami. Dang adong listrik masuk tu hutanami, molo borngin mamakke lampu teplok do hami.

 Sian Rwanda do natua-tuakku pinda tu Uganda. Pangula do natua-tuakku, manuan kopi dohot pisang do nasida. Sian pisang na disuan nasida i, dibahen nasida do gabe minuman keras. Molo di Uganda didok ma goarna waragi. Asing ni i mamiaro manuk do nasida, hambing, babi, dohot lombu. Di budayanami dohot di keluarganami, molo sahalak istri ikkon unduk tu suamina jala dang boi mangalean pandapot. Gabe songon i ma tong pandanganku.

 Tikki marumur 23 taon, pinda ma au tu Rwanda. Dung di Rwanda, lomo do rohakku lao tu kafe tikki borngin rap dohot akka donganku. Adong do sada kafe na jotjot ro au tusi. Ala jotjot au ro tusi, gabe boi do au gratis masuk tu kafe i. Lomo do rohakku manonton akka film kekerasan dohot akka pembunuhan. Ala songon i do film na hutonton jala songon i do akka halak di lingkunganku, gabe halak na kasar ma au, jahat jala parmabuk.

 Di taon 2000, sajabu ma au dohot sahalak borua na margoar Skolastique Kabagwira jala adong ma tolu gellengnami. Molo naeng makkatai ibana tu au, manang mangido manang aha pe, ikkon jolo manukkap do ibana songon na marsomba tu au, ala songon i do biasana dibahen di keluargakku. Jala huanggap do muse sude barangnami, appunakku do i sude jala lomokku do mamakke i. Asing ni i, jotjot do au kaluar malam. Jala mulak jam tolu pagi do au, huhut mabuk. Molo nga hutuktuk pintu hape dang pittor dibukka si Skolastique pintu i, gabe hupukkuli do ibana.

 Di tikki i gabe supervisor ma au di sada perusahaan jasa satpam, jala balga do gajikku. Hea ma au diajak si Skolastique tu gareja Pentakosta. Dirippu ibana molo dohot au tusi, gabe boi au muba. Alai dang olo au, gariada gabe selingkuh do au dohot boru-boru na asing. Ala kejam au jala parmabuk na so marmoral, gabe lao ma si Skolastique tu jabu ni natua-tuana jala diboan ma tolu gellengnami i.

 Adong ma dongannami na pasingotton au. Didok ibana asa rap muse au dohot si Skolastique. Jala didok ibana muse, porlu dope sahalak bapa di gellengnami i. Jadi di taon 2005 hupaso ma na minum-minum i, hutinggalhon ma selingkuhanki, jala rap ma muse au dohot si Skolastique. Di taon 2006 sah ma perkawinannami. Alai tong dope kasar au tu ibana.

 Taon 2008 adong ma sahalak Saksi na margoar si Joël ro tu jabunami jala denggan do hutangihon aha na didok ibana. Saleleng piga-piga bulan, sai jotjot do ibana ro dohot sahalak Saksi na margoar si Bonaventure lao mambahas isi ni Bibel. Godang do sukkun-sukkunku tarlumobi taringot bukku Pangungkapon. Sasittongna, naeng mangalului kesalahan ni nasida do au. Uppamana, husukkun do tu nasida boasa ma didok Saksi Jahowa “punguan bolon” na disurat di Pangungkapon 7:9 lao mangolu di tano on. Hape didok do di ayat i, “Jongjong do nasida di jolo ni habangsa i dohot di jolo ni Anak ni Biru-biru i”, i ma Jesus Kristus. Alai sabar do si Joël mangalusi sukkun-sukkun i. Contohna dibukka ibana ma Jesaya 66:1. Di ayat i didok Debata do molo tano on “sidegedegean ni pathu”. Jala sasittongna, di tano on do punguan bolon i tikki jongjong di jolo ni tahta ni Debata. Dung i hujaha ma Psalmen 37:29 na mandok, na lao mangolu salelengna do halak partigor roha di tano on.

 Ujungna, olo ma au marsiajar Bibel. Diajari si Bonaventure ma au dohot si Skolastique marsiajar Bibel. Dung marsiajar Bibel au, gabe taronjar ma rohakku naeng muba. Gabe denggan ma hubahen tu istrikku. Dang husuru be ibana manukkap songon na marsomba tikki makkatai tu au manang tikki mangido manang aha pe. Dang didok rohakku be akka barangnami i, appunakku sandiri. Jala dang olo be au manonton akka film kekerasan. Alai dang mura lao mangulahon i sude. Ikkon berupaya do au asa mangorom diri jala toktong marserep ni roha.

 Piga taon naung salpu, hubahen ma anakku siakkangan, i ma si Christian tinggal dohot keluargakku di Uganda. Alai dung hujaha bukku 5 Musa 6:4-7 huboto ma, tu au dohot tu istrikku do dilehon Debata tanggung jawab lao mangurus ianakkonnami, termasuk ma i mangajari nasida marsiajar Bibel. Las hian do rohanami dung diboan hami mulak anakkonnami si Christian.

 Dung marsiajar Bibel au, huboto ma molo Jahowa na olo do manalpuhon hasalaakku. Pos do rohakku, dang sai diingot-ingot Debata be hasalaanki. Las do rohakku ala olo si Skolastique rap marsiajar Bibel dohot au. Dilehon hami ma ngolunami tu Jahowa, jala rap tardidi ma hami di tanggal 4 Desember 2010. Dang sai curiga be hami nadua. Dihilala hami do godang manfaatna dung marsiajar Bibel hami. Las do roha ni istrikku ala pittor mulak do au dung sae karejo. Jala las do muse rohana ala huargai ibana, dang hubahen be songon najolo tu ibana. Nungnga hupaso be na minum-minum i, jala dang kejam be au songon najolo i. Di taon 2015, dilantik ma au gabe sahalak sintua lao mangurus huria. Jala tolu sian lima ianakkonnami nungnga tardidi.

 Tikki mulai marsiajar Bibel au dohot Saksi Jahowa, dang pittor porsea au tu sude na didok nasida i. Alai na mambahen au tertarik, ala sude sukkun-sukkunki, dialusi nasida do sian Bibel. Gabe diboto hami ma, molo halak naeng manomba Debata, ikkon diulahon do sude aha na diparettahon Debata. Mandok mauliate do au, ala boi gabe ale-ale ni Jahowa jala boi gabe sada keluarga dohot na asing na manomba Ibana. Molo huingot muse najolo i, pos do rohakku diurupi Debata do manang ise pe na naeng muba jala na naeng pasonakkon rohana.