Marsitutu do Saksi Jahowa mangihutton na diajarhon Jesus dohot na diulahon akka apostelna. Di artikel on, dipaboa ma piga-piga na dihaporseai nasida.

1.   Debata. Hami manomba Debata na sittong, Sipanompa Natumimbul na margoar Jahowa. (Psalmen 83:19; Pangungkapon 4:​11) Ibana do Debata ni si Abraham, si Musa dohot Jesus.​—2 Musa 3:6; 32:11; Johannes 20:17.

2.   Bibel. Porsea do hami na sinihatton ni Debata do Bibel. (Johannes 17:17; 2 Timoteus 3:​16) Haporseaonnami marojahan tu 66 buku na adong di “Padan na Robi” dohot “Padan na Imbaru”. Tikki paboahon taringot Saksi Jahowa, Profesor Jason D. manurat, “Marojahan tu Bibel do haporseaon dohot hasomalan ni nasida, dang manimbil agia otik. Manang, boi ma dohonon jolo manat do disulikkiti nasida isi ni Bibel.” a

    Nang pe dihaporseai hami sude isi ni Bibel, alai dang sude ayat ni Bibel hulapati hami pas songon na tarsurat i, alana adong do piga-piga ayat ni Bibel na patuduhon sada gombaran manang tudosan.​—Pangungkapon 1:1.

3.   Jesus. Diihutton hami do ajaran dohot sitiruon na binahen ni Jesus Kristus. Porsea do hami molo ibana Sipalua jala Anak ni Debata. (Mateus 20:28; Ulaon ni Apostel 5:​31) Alani i, Kristen do hami. (Ulaon ni Apostel 11:26) Alai, nungnga disulikkiti hami sian Bibel, dang Debata Natumimbul Jesus jala dang adong ayat ni Bibel na patuduhon adong Debata Sitolusada.​—Johannes 14:28.

4.   Harajaon ni Debata. Sada pamarentaon di surgo, dang na di bagasan roha. Harajaon i ma na lao manggantihon pamarettaon ni jolma jala na lao pasautton sakkap ni Debata tu tano on. (Daniel 2:​44; Mateus 6:​9, 10) Dang sadia leleng nai masa ma i, surirang di Bibel patuduhon hita nungnga mangolu di “tikki parpudi.”​—2 Timoteus 3:​1-5; Mateus 24:​3-​14.

    Jesus ma Raja ni Harajaon ni Debata. Nungnga mamaretta ibana mulai sian taon 1914.​—Pangungkapon 11:15.

5.   Haluaon. Holan marhite tobusan ni Jesus do hita boi malua sian dosa dohot hamatean. (Mateus 20:28; Ulaon ni Apostel 4:​12) Asa mandapot laba sian tobusan i, dang sae holan porsea sambing tu Jesus. Ikkon mambahen hamubaon do sasahalak jala tardidi. (Mateus 28:19, 20; Johannes 3:​16; Ulaon ni Apostel 3:​19, 20) Ikkon dipatuduhon do na mangolu haporseaonna. (Jakobus 2:​24, 26) Alai, “asi ni roha ni Debata” do haluaon i, dang upa ni halojaonta.​—Galatia 2:​16, 21.

6.   Surgo. Debata Jahowa, Jesus Kristus dohot suru-suruan tading di surgo. b (Psalmen 103:19-​21; Ulaon ni Apostel 7:​55) Suang songon i 144.000 halak na lao rap mamaretta dohot Jesus di Harajaonna, dipahehe do lao mangolu di surgo.​—Daniel 7:​27; 2 Timoteus 2:​12; Pangungkapon 5:​9, 10; 14:​1, 3.

7.   Tano on. Ditoppa Debata tano on lao inganan ni jolma do salelengna. (Psalmen 104:5; 115:16; Parjamita 1:4) Mangolu salelengna ma halak na mangoloi Debata di Paradeiso di tano on.​—Psalmen 37:11, 34.

8.   Hajahaton dohot Parukkilon. Sada suru-suruan na mangalo Debata do na mamukka hajahaton. (Johannes 8:​44) Di pudian ni ari, digoari ma ibana “Sibolis” manang “Setan”. Ibana ma na mangela-ela bawa nang borua na parjolo. Gabe dohot ma sude pinomparna mardosa. (1 Musa 3:​1-6; Rom 5:​12) Asa tarida Sibolis pargabus, diloas Debata ma masa hajahaton dohot parukkilon. Alai dang pasombuon ni Debata on saleleng ni lelengna.

9.   Hamatean. Dang diboto halak naung mate be agia aha. (Psalmen 146:4; Parjamita 9:​5, 10) Dang dipasikkor-sikkor nasida di api na roko.

    Paheheon ni Debata ma haduan marmiliar halak naung mate. (Ulaon ni Apostel 24:15) Molo dang mangoloi Debata nasida dung dipahehe, ripashononNa do nasida saleleng ni lelengna.​—Pangungkapon 20:5.

10.   Keluarga. Diihutton hami do aturan na binahen ni Debata tu halak naung marhasohotan, holan parmainanon do na boi mambahen marsirang. (Mateus 19:​4-9) Pos do rohanami boi do martua akka keluarga molo mangihutton poda na sian Bibel.​—Epesus 5:22–​6:1.

11.   Panombaon. Dang dipakke hami silang manang akka gombar na asing. (5 Musa 4:​15-​19; 1 Johannes 5:​21) On ma na diulahon hami di panombaonnami:

    •   Martangiang.​—Pilippi 4:6.

    •   Manjaha jala marsiajar Bibel.​—Psalmen 1:​1-3.

    •   Mangarimangi naung diparsiajari sian Bibel.​—Psalmen 77:12.

    •   Di parpunguan hami martangiang, marsiajar Bibel, marende, mangalehon komentar, patoguhon dongan sahaporseaon dohot na asing.​—Kolosse 3:​16; Heber 10:23-​25.

    •   Mamaritahon barita na uli taringot Harajaon ni Debata.​—Mateus 24:14.

    •   Mangurupi halak na makkaporluhon.​—Jakobus 2:​14-​17.

    •   Pajongjokkon dohot paiashon Bale Harajaon dohot bangunan na asing na dipakke lao marsiajar Bibel di liat portibi on.​—Psalmen 127:1.

    •   Mangalehon pangurupion tu na hona mara.​—Ulaon ni Apostel 11:27-​30.

12.   Organisasinami. Diorganisasi do hami di huria, diuluhon punguan ni sittua. Alai dang na gabe pangkat hasittuaon i jala dang digaji nasida. (Mateus 10:8; 23:8) Dang adong dibahen saparsampuluan jala dang adong kolekte di parpunguannami. (2 Korint 9:7) Sude ulaonnami diurupi silehon-lehon jala dang ditingtikkon.

    Ulaon Saksi Jahowa di liat portibi on diuluhon Punguan na Mangaradoti Organisasi sian kantor pusatnami, i ma piga-piga halak Kristen na togu di partondion.​—Mateus 24:45.

13.   Parsaorannami. Sarupa do haporseaonnami di liat portibi on. (1 Korint 1:​10) Jala marsitutu do hami asa unang paimbar-imbarhon jolma alani parhepengon, houm dohot marga. (Ulaon ni Apostel 10:34, 35; Jakobus 2:4) Diloas do hami mamillit sipillitonnami. Ganup Saksi boi mambahen haputusan hombar tu panggora ni rohana naung mangihutton ajaran ni Bibel.​—Rom 14:​1-4; Heber 5:​14.

14.   Parniulaon. Marsitutu do hami asa dang holan makkaholongi diri sandiri. (Johannes 13:34, 35) Dipasiding hami do ulaon na mambahen jut roha ni Debata, songon mangalehon manang manjalo transfusi darah. (Ulaon ni Apostel 15:28, 29; Galatia 5:​19-​21) Hadameon do na dihalomohon hami jala dang olo hami parsidohot marporang. (Mateus 5:9; Jesaya 2:4) Dioloi hami do aturan na sian pamaretta molo dang maralo tu patik ni Debata.​—Mateus 22:21; Ulaon ni Apostel 5:​29.

15.   Maradoppon na Asing. Jesus mandok, “Sihaholonganmu do donganmi doshon dirim!” Jala didok ibana do halak Kristen “ndang na sian portibi on.” (Mateus 22:39; Johannes 17:16) Alani i, marsitutu do hami mangulahon “na denggan di saluhut halak”, alai toktong do hami netral di politik jala dang parsidohot di ulaon agama na asing. (Galatia 6:​10; 2 Korint 6:​14) Alai dang olo hami mamaksahon pandapotnami tu na asing.​—Rom 14:12.

Molo adong sukkun-sukkunmuna taringot haporseaon ni Saksi Jahowa, boi do idaonmu gumodang hatorangan di situsnami, hubungi ma kantornami, ro tu Bale Harajaon na jumonok tu hamu, manang makkatai ma langsung tu sahalak Saksi di luatmuna.