Tikki masa Holocaust (pembantaian massal na dibahen Nazi), adong 35.000 Saksi Jahowa na tinggal di Jerman dohot di negara-negara na dikuasai Nazi. Di tikki i, adong ma 1.500 Saksi Jahowa na dipamate. Deba sian na mate i, dang diboto dope aha na mambahen nasida mate. Sahat tu sadari on, diselidiki dope pe aha na mambahen nasida mate jala sadia godang na mate. Jadi, hatorangan taringot i boi dope muba.

•  Aha na mambahen nasida mate?

•  Boasa disiksa nasida?

•  Didia do nasida mate?

•  Na masa tu piga-piga korban

•   Dihukum mate: Adong hira-hira 400 halak Saksi Jahowa na dihukum mate di Jerman dohot di negara-negara na dikuasai Nazi. Godangan sian nasida diadili, dihukum mate jala diponggol uluna. Na asing, ditembak manang digattung hape dang jolo diadili.

•   Massai susa do dibahen tu akka tahanan i: Lobi sian 1.000 Saksi Jahowa na mate di kamp konsentrasi dohot dipenjara. Adong do nasida na mate ala na dipaksa karejo, ala na disiksa, alani na male, ala ngalian, ala marsahit manang ala dang diubati. Ala kejam do dibahen tu nasida jala disiksa saleleng di penjara, adong do sian nasida na mate dung dibebasson di ujung ni Porang Dunia II.

•   Penyebab na asing: Adong do Saksi Jahowa na dipamate di kamar gas, mate ala dibahen gabe kelinci percobaan ni akka dokter, manang disuntik mate.

 Godang do Saksi Jahowa na disiksa ala mangihutton ajaran ni Bibel. Tikki disuru pemerintah Nazi akka donganta on mangulahon ulaon na maralo tu Bibel, dang olo akka donganta on. Dipillit nasida do “mangoloi Debata gabe parhuaso unang apala jolma”. (Ulaon ni Apostel 5:​29) Taparrohahon ma adong dua sikap na dipatudu nasida.

1.   Toktong netral di politik. Sude Saksi Jahowa toktong do netral di politik, songon i do tong akka Saksi Jahowa tikki jaman ni Nazi. (Johannes 18:36) I do alana dang olo nasida

   •   Dohot tu dinas Militer manang mendukung na marporang.​—Jesaya 2:4; Mateus 26:52.

   •   Mamillit manang ise pe tikki adong pemilu manang dohot tu organisasi Nazi.​—Johannes 17:16.

   •   Menghormat tu swastika manang mandok “Heil Hitler!”​—Mateus 23:10; 1 Korint 10:14.

2.   Toktong mangulahon na dihaporseai nasida. Nang pe diorai akka Saksi Jahowa on mangulahon na dihaporseai nasida, alai toktong do nasida

   •   Rap marpungu jala martangiang.​—Heber 10:24, 25.

   •   Marbarita na uli jala mangalehon akka sijahaon na marisi ayat ni Bibel.​—Mateus 28:19, 20.

   •   Patuduhon holong tu na asing, termasuk tu halak Jahudi.​—Markus 12:31.

   •   Dang olo tikki disuru manandatangani dokumen asa maninggalhon haporseaon ni nasida.​—Markus 12:30.

 Didok Professor Robert Gerwarth, “holan Saksi Jahowa do na disiksa alani haporseaon ni nasida saleleng Kekaisaran Ketiga (Third Reich)”. a Dipuji akka tahanan na asing na adong di kamp konsentrasi i do Saksi Jahowa alani haporseaon ni nasida. Adong sahalak tahanan sian Austria mandok, “Dang olo nasida marporang. Tumagon do nasida mate dibunu unang apala mambunu halak na asing.”

•   Di kamp konsentrasi: Unggodang do Saksi Jahowa na mate di kamp konsentrasi. Dihurung do nasida di akka kamp songon di Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück, dohot di Sachsenhausen. Holan di Sachsenhausen, adong hira-hira 200 halak Saksi Jahowa na mate.

•   Di penjara: Adong do Saksi na mate ala disiksa di penjara. Na asing, mate ala dipukkuli tikki diinterogasi.

•   Di lokasi hukuman mate: Godangan Saksi Jahowa dihukum mate di penjara na di Berlin-Plötzensee, Brandenburg, dohot di Halle/Saale. Adong do muse na dihukum mate di 70 lokasi na asing.

•  Goar: Helene Gotthold

   Lokasi hukuman mate: Di Plötzensee (Berlin)

   Si Helene, sahalak ina na adong dua gellengna. Nungnga piga-piga hali ibana ditakkup. Di taon 1937, hea do ibana diinterogasi jala disiksa sappe keguguran. Tanggal 8 Desember 1944, diponggol ma uluna mamakke guillotine di penjara Plötzensee, Berlin.

•  Goar: Gerhard Liebold

   Lokasi hukuman mate: Di Brandenburg

   Tanggal 6 Mei 1943, tikki marumur 20 taon si Gerhard diponggol ma uluna. Dua taon andorang so i, nungnga parjolo ulu ni bapakna diponggol di penjara na sarupa. Andorang so mate ibana, dibahen ibana ma surat tu keluargana dohot tu tunanganna. Didok ibana ma di suratna i, “Molo dang ala na diurupi Debata au, dang sanggup au manaon on sude.”

•  Goar: Rudolf Auschner

   Lokasi hukuman mate: Di Halle/Saale

   Tanggal 22 September 1944, diponggol ma ulu ni si Rudolf. Tikki i, 17 taon dope umurna. Andorang so mate ibana, dibahen ma surat tu omakna. Di suratna i didok, “Godang do akka donganta na togu haporseaonna, au pe ikkon songon i do.”