Pos do roha ni Saksi Jahowa molo aturan dohot prinsip na adong di Bibel boi mangurupi nasida mambahen haputusan na denggan jala mambahen las roha ni Jahowa. (Jesaya 48:17, 18) Dang hami na mambahen prinsip dohot aturan on, alai olo do hami mangolu hombar tu prinsip on. Parrohahon ma songon dia hami mangulahon on tikki marhallet. a

•   Dang boi sirang na mardongan saripe. (Mateus 19:6) Dang boi Saksi Jahowa margait-gait tikki marhallet, alana on sada dalan lao mardongan saripe.

•   Holan halak na lao mardongan saripe do na boi marhallet. Nasida, i ma halak na so makkarikkotton giot-giot ni daging.—1 Korint 7:36.

•   Halak na marhallet marhak do lao mardongan saripe. Alai, molo adong na sirang dang alani na mangalakkup dongan saripena hian, dang boi ibana marhasohotan muse.—Mateus 19:9.

•   Halak Kristen ikkon marhasohotan dohot dongan sahaporseaon. (1 Korint 7:39) Dang boi Saksi Jahowa marhallet tu halak na holan mangargai haporseaon ni nasida. Alai, ikkon marhallet tu halak naung tardidi gabe Saksi jala dohot tu ulaon marbarita. (2 Korint 6:14) Debata mandok holan dohot donganna sahaporseaon do naposoNa boi marhallet. (1 Musa 24:3; Maleaki 2:11) Songon pandok ni akka peneliti, marlaba do paretta on molo diihutton. b

•   Ikkon oloan ni ianakkon do natua-tuana. (Poda 1:8; Kolosse 3:20) Molo sajabu dope ianakkon dohot natua-tuana, ikkon oloan ni nasida do aturan ni natua-tuana, dohot ma i aturan lao marhallet. Umpamana, sadia umur ni nasida lao marhallet jala aha na lao ulahonon ni nasida.

•   Hombar tu isi ni Bibel, akka Saksi do na mamillit lao marhallet manang na dang, jala dohot ise nasida marhallet. Dos ma on tu ayat ni Bibel na mandok, “Ai ganup do halak masiboan bobanna be.” (Galatia 6:5, Bibel siganup ari) Alai, molo marhallet nasida, denggan do nasida manukkun taringot na marhallet tu halak naung marhasohotan.—Poda 1:5.

•   Sipata, adong do na marhallet gabe madabu tu dosa. Diorai Bibel do mangulahon parmainanon (percabulan). Na didok dison dang holan na sampur (hubungan seksual), alai dohot do ulaon na so denggan. Umpamana, manjama-jama lao patubuhon giot-giot ni daging na sala. Asing ni i, mangulahon hubungan seks oral manang anal. (1 Korint 6:9-11) Halak naung martunangan pe, dang boi mangulahon parmainanon alana ulaon i ramun di jolo ni Debata. (Galatia 5:19-21) Diorai Bibel do hita makkatahon “hata na roa” taringot parmainanon.—Kolosse 3:8, Bibel siganup ari.

•   “Angkal situtu” do roha ni jolma. (Jeremia 17:9) Roha na akkal boi mambahen sasahalak mangulahon na sala nang pe diboto ibana molo ulaon i sala. Alani i, dang boi na marhallet holan padua-dua di sada inganan. Dumenggan do nasida molo rap marsaor dohot na asing. Manang, manogihon halak na umtua lao mandongani nasida. (Poda 28:26) Dang denggan halak Kristen mangalului dongan saripe marhite Internet, manang marhallet tu halak na so takkas ditanda.—Psalmen 26:4.