Olo. Jotjot do Saksi Jahowa mangalehon pangurupion tikki adong mara. Dilehon hami do pangurupion tu sude halak, tu Saksi Jahowa dohot na so Saksi Jahowa. Diihuthon hami do paretta ni Bibel di Galatia 6:10 na mandok, “Taulahon ma na denggan di saluhut halak, alai gumodang ma tu donganta sahaporseaon.” Dilehon hami do pangurupion di partondion jala diapuli hami do roha ni akka na hona mara.—2 Korint 1:3, 4.

 Molo masa mara di sada luat, akka sittua di inganan i ikkon manukkun situasi ni akka Saksi na adong disi. Jala paradeon ni nasida ma pangurupion na dihaporluhon. Akka sintua pe ikkon paboahon pangurupion naung diparade nasida dohot hatorangan na imbaru tu kantor cabang ni Saksi Jahowa.

 Molo dang boi nasida paradehon pangurupion, dipaboa ma tu Punguan na Mangaradoti Organisasi, asa diparade pangurupion. Dos ma on songon na diulahon halak Kristen di abad na parjolo tikki masa haleon. (1 Korint 16:1-4) Disuru kantor cabang na adong di luat i ma Punguan na Mangurupi na Hona Mara, asa mangalehon pangurupion. Akka Saksi sian luat na asing pe, boi mangalehon gogo dohot tikki lao mangurupi akka halak na hona mara.—Poda 17:17

 Akka sumbangan na dilehon tu kantor cabang dipakke tu godang ulaon, dohot ma i mangalehon pangurupion tu na hona mara. (Ulaon ni Apostel 11:27-30; 2 Korint 8:13-15) Ala sude na mangurupi dang digaji, sude sumbangan i dipakke holan tu na hona mara. Manat jala denggan do hami mamakke sude sumbangan na dilehon.—2 Korint 8:20.