Diargai hami do parbinotoan dohot akka penemuan sains naung adong buktina.

 “Sains, i ma parbinotoan naung disulikkiti taringot alam semesta jala didapot sian penelitian.” (Kamus Besar Bahasa Indonesia) Nang pe Bibel dang bukku taringot sains, alai Bibel mangurupi halak asa mamboto taringot alam jala mandapot laba sian akka penemuan sains. Pikkirhon ma piga-piga contohna:

•   Astronomi: “Manaili ma matamuna dompak ginjang, jala ida hamu, tung ise ma na manoppa akka i? Tung ise ma paruar parangannasida marbilangan? Ibana tahe manjou luhutna i di goarna be.”​—Jesaya 40:26.

•   Biologi: “Diboto huhut torsahononna taringot tu angka hau, sian hau Ares na di Libanon ro di Ysop (limutlimut) na tubu di dorpi; ditorsahon huhut taringot tu angka pahanpahanan, taringot tu angka pidong, taringot tu angka gulokgulok dohot taringot tu angka dengke.”​—1 Rajaraja 5:13.

•   Kesehatan: “Gabe dialusi Jesus ma nasida: Apala ringkot pandaoni di angka na hisar, di angka na marsahit do!”​—Lukas 5:​31.

•   Meteorologi: “Nunga tung sahat ho huroha ro di parpeopan ni ambolas na lamot? Jala nunga tung diida ho huroha parpeopan ni ambolas hian? . . .  Didia do dalan parsirangan ni hatiuron dohot parserahan ni alogo sian habinsaran tu tano on?”​—Job 38:22-​24.

 Di sijahaonnami pe, adong do diparade artikel taringot sains dohot akka penemuan sains. Akka natua-tua Saksi pe manjujui ianakkonna asa lam mangattusi taringot na adong di humaliangna. Godang do akka Saksi Jahowa na karejo di bagian sains, umpamana biokimia, matematika, dohot fisika.

 Diboto hami do dang boi sains mangalusi sude sukkun-sukkun taringot parngoluon on. a Umpamana, ahli geologi manulikkiti taringot aha na dipakke lao mambahen tano on, jala ahli biologi manulikkiti songon dia proses na adong di pamatangta. Alai, boasa ma holan di tano on adong hangoluan, jala boasa massai taratur proses na adong di pamatangta?

 Porsea do hami molo Bibel boi mangalusi sukkun-sukkun i. (Psalmen 139:13-​16; Jesaya 45:18) Alani i, diparsiajari hami do Bibel dohot sains asa boi mandapot parbinotoan na denggan.

 Ala adong na hurang mangattusi ajaran ni Bibel, sipata gabe songon na maralo do sains tu Bibel. Umpamana, Bibel dang mangajarhon molo tano on ditoppa saleleng 6 ari (6 hali 24 jom).​—1 Musa 1:1; 2:4.

 Adong do piga-piga hatorangan ni sains na so terbukti jala dang olo piga-piga ilmuwan manjalo hatorangan i. Umpamana, piga-piga ahli biologi, ahli kimia, dohot na asing mandok, hangoluanta adong dang alani evolusi (marhite seleksi alam dohot mutasi acak). Boasa didok nasida songon i? Alana, alam semesta on patuduhon adong proses na massai denggan na dibahen jala porsea do hami disi.