Dang dipauba. Sasittongna, haporseaonnami do na dipauba hami asa hombar tu ajaran ni Bibel.

 Andorang so dipabinsar Kitab Suci Terjemahan Dunia Baru di taon 1950, nungnga disulikkiti hami Bibel. Dipakke hami do terjemahan na dia pe jala dipauba hami do haporseaonnami tu ajaran ni Bibel. Parrohahon ma piga-piga haporseaon naung leleng diihutton hami jala ida ma songon dia haporseaonnami hombar tu ajaran ni Bibel.

1.   Haporseaonnami: Dang Adong Debata Sitolusada. Majalah Zion’s Watch Tower Edisi Juli 1882 patorakkon, “Nang pe porsea hami tu Jahowa, tu Jesus, dohot tu tondi parbadia, alai dang porsea hami tu ajaran na so hombar tu Bibel na mandok, adong tolu Debata di bagasan sada hadirion manang sada Debata di bagasan tolu hadirion.”

     Bibel Patorakkon: “Jahowa Debatanta i, Jahowa Sasadasa do.” (5 Musa 6:4) “Holan sada do Debata, Ama i, parmulaan ni saluhut, jala hita do tu Ibana; jala sada do Tuhan, i ma Jesus Kristus, parhitean ni saluhutna, jala hita marhitehite Ibana.” (1 Korint 8:6) Jesus pe mandok, “Umbalga do Damang asa Ahu.”—Johannes 14:28.

2.   Haporseaonnami: Dang tutu parjahat dipasiak-siak salelengna di api na roko. Zion’s Watch Tower edisi bulan Juni 1882 mangenet judulna sian Rom 6:23, i ma “Upa Tinuhor ni Dosa do Hamatean”. Edisi on patorakkon, “Takkas jala mura do antusan ayat on. Alai, godang do halak dang porsea tu ajaran on, nang pe diboto nasida molo Bibel i hata ni Debata. Na dihaporseai nasida, molo mardosa sasahalak, “dipasiak-siak salelengna di api na roko.”

     Bibel Patorakkon: “Tondi ni manang ise na mardosa, ingkon i do mate.” (Hesekiel 18:4, 20) Bibel mangajarhon, halak parjahat “diripashon salelengna”, dang na lao dipasiak-siak salelengna—2 Tessalonik 1:9, King James Version.

3.   Haporseaonnami: Tutu do adong Harajaon ni Debata, dang holan di bagasan roha. Taringot Harajaon ni Debata, Zion’s Watch Tower edisi bulan Desember 1881 patorakkon, “Lao ripashonon ni Harajaon ni Debata ma sude harajaon na adong di portibi on.”

     Bibel Patorakkon: “Alai di tingki hinarajahon ni angka rajai, padirion ni Debata, na di surgo i, sada harajaon na so tarpapatu ro di salelenglelengna, gomgomanna pe ndang pasahatonna tu bangso na asing; ropuhanna do tahe sogot saluhut angka harajaon i, jala pansingkononna, alai hot do anggo na sasada i ro di saleleng ni lelengna.”—Daniel 2:44.

 Dipakke Saksi Jahowa do marragam terjemahan ni Bibel tikki marbarita na uli. Nang pe diparade hami Terjemahan Dunia Baru na so margarar, alai las do rohanami molo adong halak mamakke terjemahan Bibel na asing tikki marsiajar.