Adong do Pelatihan tu Saksi Jahowa lao Mangulahon Pelayanan ni Nasida?

PANGOLU

Sai dilatik do Saksi Jahowa asa boi lam denggan mangulahon manang aha pe di ngoluna, termasuk ma asa lam denggan marbarita na uli. Disuru Jesus do akka halak na mangihutton ibana asa paboahon jala mangajarhon barita na uli taringot Harajaon ni Debata. (Mateus 24:14; 28:19, 20) Dilatik do hami di parpunguan ganup minggu, parpunguan wilayah, dohot parpunguan regional. Jala dibahen do tong pelatihan tu Saksi Jahowa na adong tugas tambahanna di huria manang di organisasi.

Di artikel on lao tabahas ma

Akka pelatihan aha do na dijalo Saksi Jahowa?

Akka parpunguan. Ganup minggu dua hali ma hami marpungu di tempat ibadahnami na digoari Bale Harajaon. Na sada dibahen di parsitongaan ni minggu, jala na sada nai di ujung ni minggu. Dang holan Saksi Jahowa na boi ro tu acara i jala dang adong dipapungu kolekte.

Parpunguan di parsitongaan ni minggu. Diajari do hami di acara parpunguan on asa lam denggan manjaha, makkata-hatai tu halak, makkatai di jolo ni godang halak, marbarita, dohot mangajari akka halak. Dilatik do hami marhite jamita, sukkun-sukkun maralus, pertunjukan, dohot video presentasi. Alani pelatihan on gabe lam denggan ma hami paboahon barita na sian Bibel dohot mangurupi halak marsiajar Bibel. Sude na ro tu acara parpunguan on boi do mandapot manfaat sian acara i. Jala na rumikkot boi ma tapatogu haporseaotta tu Debata jala gabe lam holong ma rohatta tu Debata dohot tu dongan sahaporseaotta.
Parpunguan di ujung ni minggu. Adong dua bagian di acara parpunguan on. Na parjolo, i ma jamita na sian Bibel na bermanfaat tu sude halak. Na paduahon, i ma sukkun-sukkun maralus na mambahas sada artikel sian majalah Joujou Paboahon edisi siparsiajaran. a Hatorangan na sian Bibel do na dibahas di artikel i, na adong hubunganna tu ulaon marbarita dohot tu ngolutta siganup ari.

Parpunguan wilayah dohot parpunguan regional. Di bagasan sataon adong tolu acara parpunguan na balga dibahen hami. Godang do huria na ro tu acara i jala sian Bibel do dibuat tema ni acara i. Di acara i adong do jamita, pertunjukan, wawancara, jala diputarhon do akka video disi. Sarupa do tujuan ni acara on tu acara parpunguannami ganup minggu, asa lam godang parbinotoannami taringot Bibel jala lam denggan hami marbarita na uli. Di acara on pe, dang holan Saksi Jahowa na ro jala dang adong dipapungu kolekte.

Akka sikkola na dibahen tu Saksi Jahowa

Adong do muse sikkola Alkitab na dibahen Saksi Jahowa. Akka sikkola aha ma i? Aha ma tujuan ni ganup sikkola? Piga leleng ma i? Jala akka ise do na boi dohot?

Sikkola Dinas Perintis

Tujuanna: Lao mangajari akka pelayan sepenuh waktu na digoari perintis, b asa lam denggan marbarita dohot mangajari akka halak. Di sikkola i adong do pembahasan, pertunjukan, jamita, dohot akka latihan.
Lelengna: Onom ari.
Na dohot: Akka dongan naung merintis pinomatna sataon. Akka perintis naung leleng pe diundang do dohot muse tu sikkola on sahali di bagasan lima taon.

Sikkola tu Parbarita Harajaon

Tujuanna: Lao mangalatik akka pelayan sepenuh waktu naung berpengalaman asa lam denggan marbarita dohot mangajari akka halak. Jala bagas do diparsiajari nasida Bibel di sikkola i. Dung sae sikkola i, godangan siswa ditugasson tu inganan na makkaporluhon gumodang parbarita.
Lelengna: Dua bulan.
Na dohot: Akka perintis na memenuhi syarat jala na boi ditugasson manang na tudia pe.

Sikkola tu Sintua di Huria

Tujuanna: Lao mangalatik akka sintua c asa lam denggan mangulahon tanggung jawabna di huria, misalna mangajari dohot patoguhon akka dongan. Diurupi do tong nasida di sikkola on asa lam makkaholongi Jahowa dohot akka dongan.—1 Petrus 5:2, 3.
Lelengna: Lima ari.
Na dohot: Akka sintua na baru. Akka sintua naung leleng pe diundang do dohot muse tu sikkola on sahali di bagasan lima taon.

Sikkola tu Pengawas Wilayah Dohot Istrina

Tujuanna: Lao mangalatik pengawas wilayah d asa lam denggan nasida mangulahon tanggung jawabna. (1 Timoteus 5:17) Diurupi do tong nasida dohot istri ni nasida di sikkola on asa lam mangattusi akka ayat ni Bibel.
Lelengna: Sabulan.
Na dohot: Pengawas wilayah na baru dohot istri ni nasida naung melayani pinomatna sataon. Dung i, diundang do muse nasida dohot tu sikkola on sahali di bagasan lima taon.

Sikkola Pakkobasion Harajaon

Tujuanna: Lao mangalatik akka sintua dohot parhobas e asa boi nasida mangihutton cara na terbaru lao mangulahon tanggung jawabna di huria di marragam situasi. (2 Timoteus 3:1) Dibahen do sikkola on sahali di bagasan piga-piga taon.
Lelengna: Marragam, biasana sadari.
Na dohot: Pengawas wilayah, sintua, dohot parhobas.

Sikkola Dinas Betel

Tujuanna: Lao mangalatik anggota Betel f asa boi denggan nasida mangulahon tugasna, jala asa lam holong rohana tu Jahowa dohot tu anggota betel na asing.
Lelengna: Lima satonga ari.
Na dohot: Anggota Betel na baru. Anggota Betel naung leleng pe diundang do dohot muse tu sikkola on sahali di bagasan lima taon.

Sikkola Bibel Gilead Joujou Paboahon

Tujuanna: Lao mangurupi akka siswa asa lam mangattusi isi ni Bibel, makkaholongi i, jala mangulahon i di ngoluna. (1 Tessalonik 2:13) Dung tamat nasida sian sikkola on, gabe lam togu ma haporseaon ni nasida jala boi ma lam godang na diulahon nasida lao mangurupi ulaon ni organisasi dohot ulaon marbarita. Boi ma nasida ditugasson tu kantor cabang di negara ni nasida manang di negara na asing. Jala boi ma nasida gabe pelayan sepenuh waktu khusus di negara ni nasida manang gabe misionaris di negara na asing.
Lelengna: Lima bulan.
Na dohot: Akka pelayan sepenuh waktu na memenuhi syarat jala na dipillit kantor cabang. Di Amerika Serikat do dibahen sikkola on, di Pusat Pendidikan Menara Pengawal Patterson, New York.

Sikkola tu Anggota Panitia Cabang Dohot Istrina

Tujuanna: Lao mangalatik anggota Panitia Cabang g asa lam denggan mengawasi ulaon ni sada kantor cabang dohot kegiatan ni akka naposo ni Jahowa di negara i manang di piga-piga negara na diawasi kantor cabang i.
Lelengna: Dua bulan.
Na dohot: Anggota Panitia Cabang dohot istrina na dipillit Kantor Pusat ni Saksi Jahowa. Di Pusat Pendidikan Menara Pengawal Patterson, New York do dibahen sikkola on.

Aha do na gabe panduan di akka pelatihan na dibahen Saksi Jahowa?

Bibel do na gabe bukku panduan utama di akka pelatihan na dibahen Saksi Jahowa. Pos do rohanami sian Debata do Bibel i jala sian i do boi tadapot petunjuk na terbaik na marguna tu ngolutta.—2 Timoteus 3:16, 17.

Adong do biaya lao mangihutton akka pelatihan i?

Dang adong. Gratis do mangihutton pelatihan i. Sude biaya tu ulaon na dibahen Saksi Jahowa dibuat sian sumbangan sukarela.—2 Korint 9:7.

a Rade do Bibel, akka publikasi na sian Bibel, dohot akka video di situsnami jw.org.

b Perintis, i ma Saksi Jahowa naung tardidi na boi gabe sitiruon. Lomo do roha ni nasida mamakke tikkina piga-piga pulu jom sabulan lao marbarita na uli.

c Togu do haporseaon ni akka sintua, jala nasida do na mangajarhon Hata ni Debata. Nasida do na gabe parmahan jala na patoguhon akka naposo ni Debata. Dang margaji nasida.

d Pengawas wilayah, i ma pelayan sepenuh waktu na manjuppangi sada huria ganup minggu. Dipasahat ibana do jamita na sian Bibel lao patoguhon akka dongan di huria jala dohot do ibana marbarita rap dohot akka dongan na disi.

e Godang do tugas fisik na diulahon sahalak parhobas lao mangurupi akka dongan di huria. Ala adong akka parhobas, gabe boi ma unggodang tikki ni akka sintua lao mangajari dohot patoguhon akka dongan.

f Betel do goar ni kantor cabang ni Saksi Jahowa. Jala akka pelayan sepenuh waktu do na karejo di kantor on. Sude na diulahon nasida disi tujuanna lao mangurupi ulaon ni Saksi Jahowa di negara i.

g Adong tolu bawa manang lobi sian i anggota ni sada Panitia Cabang. Togu do haporseaon ni nasida.

Aha do manfaatna mangihutton akka pelatihan i?

“Ala parila do au halakna, maol do huhilala paboahon barita na uli tu halak na so hutanda. Alai dung dohot au tu pelatihan na dibahen di parpunguan parsitongaan ni minggu, gabe lam percaya diri ma au jala gabe lam denggan ma au mangajari akka halak. Saonari dang maila be au makkatai tu akka dongan di huria dohot di tempat karejokku.”—Si Natasha, Amerika Serikat.
“Dung huihutton Sikkola tu Parbarita Harajaon, gabe boi ma lam denggan au maniru sifat ni Jahowa, songon holong ni roha, haburjuon, jala gabe lam sabar ma au. Huhilala nga gabe halak Kristen, dongan, dohot tetangga na undenggan be au saonari. Diajari do tong au di sikkola i boha carana mangariset hatorangan na adong Bibel, jala boha ma carana asa hona tu roha ni akka halak ayat ni Bibel na hupatorang.”—Si Stephen, Nigeria.
“Di Sikkola tu Sintua di Huria dipaingot do au porlu do hupatudu serep ni roha asa boi au gabe sintua na burju. Dipaingot do tong au marhite akka jamita di sikkola i asa mangihutton sitiruon na dibahen Jesus.”—Si Luca, Italia.
“Ala mangihutton Sikkola Pakkobasion Harajaon gabe huboto ma porlu do au burju jala ramah, asa unang mabiar halak makkatai tu au. Jala holong ni roha ma nian na mangonjar rohakku lao mangurupi akka halak, dang holan ala mangulahon tugas.”—Si Samuel, Inggris Raya.
“Boi do Sikkola Gilead on mangurupi hita asa olo markaca tu Hata ni Debata. (Jakobus 1:22-25) Molo taulahon i gabe taboto ma sifat na dia na ikkon tapadenggan jala boha ma carana asa lam denggan hita melayani Jahowa. Diajari do tong hita asa mamikkiri halak na asing dang holan mamikkiri diritta sandiri. Jala holong ni roha ma nian na mangonjar rohatta tikki mandokkon manang mangulahon manang aha pe.”—Si Elnathan dohot si Princess, Filipina.