Di Bibel, hata Junani na diterjemahon gabe “gereja” patuduhon punguan ni halak na manomba Debata, dang na patuduhon inganan parpunguan ni nasida.

 Umpamana: Tikki ditongos apostel Paulus surat tu halak Kristen di Rom, dipasahat ibana ma tabe tu si Akuila dohot si Priskilla, jala didok ibana ma, “Sahat ma tabe tu gereja na marpungu di jabu ni nasida.” (Rom 16:5, Contemporary English Version) Molo taida sian hata ni si Paulus on, tontu ibana dang pasahatton tabe tu sada inganan. Alai, ibana pasahatton tabe tu akka halak—manang huria na marpungu di jabu ni nasida. a

 Alani i, lao mandok inganan parpunguannami, dang dipakke hami hata gereja. Alai, na dipakke hami “Bale Harajaon.”

 Pas do goar on, alana:

•   Inganan on dipakke hami lao marpungu.

•   Disi, hami marpungu lao manomba Jahowa, Debata na disurat di Bibel. Jala dihatindakkon hami do taringot Ibana.—Psalmen 83:18; Jesaya 43:12.

•   Di parpunguan i, diparsiajari hami taringot Harajaon ni Debata, na jotjot dibaritahon Jesus.—Mateus 6:9, 10; 24:14; Lukas 4:43.

 Las rohanami manggokkon hamu asa ro tu Bale Harajaon na jumonok jala mangida songon dia parpunguan ni Saksi Jahowa dipatupa.