Dang marulang tahun Saksi Jahowa, ala dang lomo roha ni Debata tu ulaon i. Nang pe dang adong ayat ni Bibel na mangorai hita mangulahon i, alai adong do piga-piga hatorangan na boi mangurupi hita mangattusi songon dia pakkilalaan ni Debata tu ulaon i. Taparrohahon ma opat hatorangan on dohot prinsip ni Bibel na hombar tusi.

1.   Marharoroan sian hasomalan ni sipelebegu do ulang tahun. Bukku Funk & Wagnalls Standard Dictionary of Folklore, Mythology, and Legend patorakkon, hasomalan marulang tahun dibahen alana porsea do halak najolo, “adong tondi na jahat na boi mangganggu halak na marulang tahun i”. Alani i, molo ro akka donganna mandok “selamat ulang tahun”, boi do i padaohon ibana sian tondi na jahat i. Buku The Lore of Birthdays mandok, najolo rikkot do ari hatutubu lao mangida nasib ni sasahalak. Didok bukku i muse, margogo do lilin ulang tahun pasautton sakkap ni roha ni halak na marulang tahun.

    Alai di Bibel, diburai do halak na mangulahon ulaon hadatuon, hasipelebeguon, spritisme manang “angka na suman tusi.” (5 Musa 18:14; Galatia 5:​19-​21) Jala diuhum Debata pe halak Babel, ala somal do nasida manilik bintang, i ma hasomalan lao mamboto ari na naeng ro. (Jesaya 47:11-​15) Dang sai disulikkiti Saksi Jahowa haroro ni sude hasomalan. Alai, molo adong tudu-tudu sian Bibel taringot sada ulaon, diihutton hami do i.

2.   Dang marulang tahun halak Kristen na parjolo. The World Book Encyclopedia mandok, “diboto halak Kristen na parjolo do, molo marulang tahun hasomalan ni halak sipelebegu.” Halak Kristen saonari on ikkon maniru akka apostel dohot halak Kristen na marsiajar sian Jesus.​—2 Tessalonik 3:6.

3.   Parningotan ari hamamate ni Jesus do na sai diulahon halak Kristen na parjolo, dang ari hatutubuna. (Lukas 22:17-​20) Dang songgot rohatta disi, alana Bibel pe mandok, “dumenggan do ari hamatean ni jolma sian ari hatutubuna.” (Parjamita 7:1) Di ujung ngolu ni Jesus di portibi on, diulahon Jesus do lomo ni roha ni Debata, i do na mambahen rumikkot ari hamamatena sian ari hatutubuna.​—Heber 1:4.

4.   Dang adong dipaboa di Bibel sisomba Debata marulang tahun. Adong dua pesta ulang tahun na disurat di Bibel. Alai dang sisomba Debata na mangulahon i. Alani i, dang denggan taihutton ulaon i.​—1 Musa 40:20-​22; Markus 6:​21-​29.

 Songon natua-tua na asing, dipatudu Saksi Jahowa do holongna tu ianakkonna. Dilehon nasida do hadiah jala rap marpungu do nasida dohot ianakkonna manang sadihari pe. Ditiru nasida do Debata Jahowa na jotjot patuduhon holongna. (Mateus 7:​11) Alani i, dang gabe lungun roha ni ianakkon ni Saksi Jahowa, taida ma komentar na di toru on:

•   “Las hian rohakku molo toppu mandapot hadiah.”​—Si Tammy, 12 taon.

•   “Nang pe dang dilehon natua-tuakku hadiah di ari ulangtahunku, alai dilehon nasida do di ari na asing. Lomo do rohakku songon i, toppu mandapot hadiah.”​— Si Gregory, 11 taon.

•   “Molo holan sappulu minut do, i pe holan mangallang kue dohot marende ulang tahun, dang pesta i. Ro ma tu jabukku, asa diboto hamu pesta na sasittongna!”—Si Erik, 6 taon.