Mangihutton Bibel do pandapot dohot ulaon na dibahen hami tu na mate, i ma:

•   Dang sala marhabot ni roha molo mate na tahaholongi. Marhabot ni roha do sisean ni Jesus tikki mate na dihaholongi nasida. (Johannes 11:33-​35, 38; Ulaon ni Apostel 8:2; 9:​39) Alani i, dang dibahen hami hira na marpesta ulaon tu na mate. (Parjamita 3:​1, 4; 7:​1-4) Alai, i ma tikkina lao patuduhon na sapakkilalaan do hami.​—Rom 12:15.

•   Dang diboto halak na mate be agia aha. Manang sian dia pe haroronami, dipasiding hami do akka ulaon na so sian Bibel na mandok mangolu dope tondi ni na mate jala makkorhon tu halak na mangolu. (Parjamita 9:​5, 6, 10) Dohot ma i ulaon borngin pandungoi, pesta manang parningotan tu na mate, mangalehon pelean tu na mate, makkata-hatai manang manukkun tu na mate dohot mambahen ulaon adat tu na mabalu. Dipasiding hami do akka ulaon sisongon i mangihutton paretta ni Bibel na mandok, “Ruar ma hamu, . . . unang ma jama hamu na ramun.”​—2 Korint 6:​17.

•   Adong do pakkirimon tu na mate. Dipaboa di Bibel, adong do haheheon tu halak na mate jala dang adong be hamatean di ari na naeng ro. (Ulaon ni Apostel 24:15; Pangungkapon 21:4) Alani pakkirimon i, dang marlungun ni roha be hami songon halak na so marpakkirimon, on ma na diulahon halak Kristen na mula-mula.​—1 Tessalonik 4:​13.

•   Dijujui Bibel do hita asa marserep ni roha. (Poda 11:2) Dang dibahen hami ulaon tu halak na mate lao patuduhon hamoraon. (1 Johannes 2:​16) Dang olo hami mambahen ulaon tu na mate mardongan akka musik manang mambahen batang ni na mate na massai arga asa sangap diida halak.

•   Dang olo hami mamaksahon pandapotnami tu na asing taringot ulaon tu na mate. Diihutton hami do prinsip na mandok, “Asa ganup hita on, alusanta do Debata taringot tu dirinta be.” (Rom 14:12) Alai, molo adong na manukkun taringot i, olo do hami patorakkon, “mardongan lambok ni roha.”​—1 Petrus 3:​15

 Inganan: Molo porlu dibahen ulaon on, keluarga i do na mamillit inganan i lao dibahen di Bale Harajaon, di rumah sosial, di jabunasida sandiri, di inganan kremasi, manang di kuburan i.

 Ulaonna: Adong jamita lao mangalehon apul-apul na patorakkon boha do didok Bibel taringot hamatean dohot pakkirimon haheheon. (Johannes 11:25; Rom 5:​12; 2 Petrus 3:​13) Dipaboa do di ulaon i taringot jujur ngolu dohot akka na denggan sian halak na mate i na boi gabe sitiruon tu na asing.—2 Samuel 1:​17-​27.

 Adong do muse ende na marojahan tu Bibel. (Kolosse 3:​16) Dipaujung ma ulaon i marhite tangiang na patoguhon roha.​—Pilippi 4:​6, 7.

 Iuran: Dang adong iuran na ikkon digarar ruasnami na mangulahon ulaon tu na mate, dos songon parpunguannami na so mardurung-durung.​—Mateus 10:8.

 Na ro tu ulaon i: Boi do na so Saksi Jahowa ro tu ulaon i nang pe di Bale Harajaon dibahen. Dos songon parpunguannami, sude do boi ro.

 Ganup Saksi boi mamillit lao ro manang dang, hombar tu panggora ni rohana be. (1 Timoteus 1:​19) Alai, dang parsidohot hami tu ulaon na maralo tu prinsip ni Bibel.​—2 Korint 6:​14-​17.