Watch Tower Bible and Tract Society of Pennsylvania, i ma sada badan hukum na dibahen di taon 1884 na diatur Commonwealth of Pennsylvania, AS. Saksi Jahowa mambahen badan hukum on lao mangurupi ulaon marbarita na uli di liat portibi on na so manggarar, umpamana pabinsarhon Bibel dohot sijahaon na marojahan sian Bibel.

 Na tinuju ni badan hukum on, i ma lao “marbarita na uli dohot mangajar taringot Harajaon ni Debata na diparenta Jesus Kristus,” jala adong do partalian ni badan hukum on tu “agama, pendidikan, dohot sosial.” Anggota ni badan hukum on, i ma akka halak na ditogihon jala dang na dipillit alani sadia godang nasida mangalehon sumbangan. Anggota dohot direkturna mangurupi Punguan Na Mangaradoti Organisasi ni Saksi Jahowa.

 Asing ni Watch Tower Bible and Tract Society of Pennsylvania, dibahen Saksi Jahowa do badan hukum di piga-piga negara. Piga-piga goar ni badan hukum on mamakke hata “Watch Tower,” “Watchtower,” manang diterjemahon tu hata na dipakke di negara i.

 Dung dibahen akka badan hukum on, nungnga godang akka na denggan na hudapot hami, umpamana:

•   Panuraton dohot Pabinsarhon. Nungnga hupabinsar hami hira-hira 220 juta Bibel. Adong muse hira-hira 40 miliar sijahaon na marojahan sian Bibel di lobi sian 700 hata. Asing ni i, huparade hami do Bibel online na so manggarar di situs web jw.org jala dapotmuna ma disi alus ni sukkun-sukkun taringot “Aha do Harajaon ni Debata i?”

•   Pendidikan. Hupatupa hami do piga-piga sikkola lao mamparsiajari Bibel. Umpamana, sian taon 1943, lobi sian 8.000 Saksi Jahowa nungnga mangihutton Sikkola Gilead, jala dilatik do nasida gabe misionaris lao mangurupi dohot patoguhon ulaonnami di liat portibi on. Jala ganup minggu, marjuta halak, termasuk ma na so Saksi, mandapot laba sian parpunguan Kristen. Huparade hami do muse parsiajaran tu halak na so boi manjaha dohot manurat jala hupabinsar hami do bukku parsiajaranna di bagasan 110 hata.

•   Sosial. Huparade hami do pangurupion tu nasida na hona mara—umpamana, songon Genosida na masa di Rwanda, manang songon lalo di Haiti na masa di taon 2010.

 Nang pe badan hukum on nungnga godang mangalehon pangurupion tu ulaonnami, alai hami mangulahon ulaon on dang holan alani badan hukum i. Ganup halak Kristen martanggung jawab mangulahon paretta ni Debata, i ma marbarita na uli jala pasahatton hasintongan. (Mateus 24:14; 28:19, 20) Porsea do hami na diurupi Debata hami mangulahon ulaon on jala Ibana do na “patubuhon” ulaon on.—1 Korint 3:6, 7.