Taon 2015, adong 175.000 halak na ro tu kantor cabang Saksi Jahowa di Meksiko, Amerika Tengah, manang 670 halak ganup ari! Godang do sian nasida na ro markelompok, mardalani piga-piga ari manewa piga-piga bus. Nungnga diparade nasida i saleleng piga-piga bulan.

Piga-piga sian nasida na ro tu kantor cabang na digoari Betel, ikkon mambahen pengorbanan. Umpamana, godang do sian huria Veracruz na so adong hepengna lao manggarar ongkos bus na gabe dalannasida, na daona 550 kilometer. Jadi, dibahen nasida ma rencana na digoari “Proyek Betel”. Dibahen nasida ma piga-piga kelompok na paradehon jala manggadis sipanganon. Didaur ulang nasida do muse akka botol plastik. Dung tolu bulan, cukup ma hepengnasida lao manggarar ongkos.

Aha do hasilna? Massai las do rohanasida. Umpamana, si Lucio, sahalak na poso sian huria i manurat, “Dung ro hami tu Betel, taronjar ma rohanami asa mambahen cita-cita di partondion, jala marsitutu ma ahu mangulahon akka ulaon di huria.” Si Elizabeth na marumur 18 taon mandok, “Di Betel, huida do holong na sasittongna, na gabe tanda sian akka halak na marhobas tu Jahowa. Taronjar do rohakku lao mangalehon na dumenggan tu Jahowa, gabe perintis ma ahu.”

Di sada tikki, adong ma marribu halak na ro di bagasan sadari. Marsitutu do akka dongan di Bagian Tur asa denggan manjakkon nasida. Si Lizzy mandok, “Las do rohanami mangida godang ni na ro. Dipatogu do haporseaonnami mangida pangargaion dohot pengorbanan na dibahen nasida asa boi ro tu kantor cabang.”

Laho manjangkon marribu halak na ro, dohot do angka dongan sian bagian na asing di Betel mamboan nasida tur. Nang pe sasintongna ndang ulaonnasida on, las do rohanasida manjangkon angka na ro. Si Juan mandok, ”Dung sae huboan nasida tur, huida las do roha ni nasida jala ndang marisuang on sude.”

Angka dakdanak pe, las do rohanasida tingki ro tu Betel. Si Noriko, na karejo di Departemen Komputer mandok, ”Husungkun ma tu angka dakdanak na ro, ’Lomo do rohamuna molo karejo di Betel?’ Sude nasida mandok, ’Lomo!’” Sada inganan na dihalomohon angka dakdanak, i ma ”Gang Kaleb”. Disi, boi do nasida marpotopoto raphon si Kaleb dohot si Sophia na di video Gabe Aleale ni Jahowa, na sarupa balgana tu nasida. Didok si Noriko muse, ”Lomo do roha ni dakdanak disi.”

Godang do dakdanak na patuduhon pangargaion tu ulaon na adong di Betel. Umpamana, si Henry, sahalak dakdanak sian Meksiko, ditabung do hepengna di celengan asa dilehon gabe sumbangan tingki ro ibana tu Betel. Disurat ibana ma di sumbanganna i, ”Pangke ma hepeng on laho mambahen gumodang sijahaon. Mauliate ma ala nunga karejo hamu tu Jahowa.”

Adong do tur gratis na dibahen Saksi Jahowa di sude kantor dohot inganan percetakan ni nasida di liat portibi on. Molo lomo rohamu ro tu kantor cabangnami, las do rohanami manggokkon hamu. Tontu, las do rohamuna molo ro tu kantornami. Dapotmuna do muse gumodang hatorangan taringot i di bagian TARINGOT HAMI > KANTOR & TUR.