Saksi Jahowa ditanda alani ulaon penerjemahan nasida. Di bulan November 2014, nungnga diterjemahon hami Bibel tu 125 bahasa dohot akka bukku na marojahan tu Bibel tu 742 bahasa. Diterjemahon hami do muse akka video. Di bulan Januari 2015, video Aha do na Dipatupa di Bale Harajaon? nungnga diterjemahon tu 398 bahasa, jala video Boasa Ringkot Marsiajar Bibel? nungnga diterjemahon tu 569 bahasa. Aha do na tinuju ni video on jala songon dia on diulahon?

Di bulan Maret 2014, Punguan na Mangaradoti Organisai mangarahon kantor cabang di liat portibi on asa merekam soara di bagasan godang bahasa, lao mambahen video na patandahon parsiajaran Bibel.

Adong do piga-piga na ikkon diulahon lao mambahen sada video. Na parjolo, diterjemahon tim penerjemah di luat i ma naskah videona. Dipillit ma halak na mamakke bahasa i lao mangisi soara. Dukkon i, direkam, diedit tim audio/video ma soarana jala dibahen ma teks lao tu video i. Na parpudi, dipasada ma rekaman soara, teks di layar dohot videona lao dipamasuk tu situs Web.

Di piga-piga kantor cabang adong do studio rekaman dohot akka halak naung dilatik lao mangaradoti ulaon on. Alai, songon dia mambahen video na diterjemahon di inganan na asing?

Di liat portibi on, lao ma tim audio tu inganan i huhut mamboan akka alat rekaman na mura boanon. Bahenonna ma studio rekaman sementara di sada kantor, Bale Harajaon manang di jabu mamakke sada mikrofon dohot laptop naung adong software rekaman soara. Disuru ma piga-piga halak na mamakke bahasa i lao manjaha teksna, mangalatik pengisi soara dohot mamareso hasil rekamanna. Dung sae jala disetujui hasilna, pinda ma muse tim audio i tu inganan na asing.

Dung diihutton cara on, lam godang ma video na dibahen di bagasan godang bahasa, tolu hali lompit ma godangna.

Las hian do roha ni akka halak mangida akka video on. Di godangan halak, video on ma na parjolo sahali diida nasida di bagasan bahasanasida.

Umpamana merekam bahasa Pitjantjatjara, na dipakke lobi sian 2.500 halak di Australia. Di Alice Springs, di Wilayah Utara do rekamanna dibahen. Si Callan Thomas, na mangurupi ulaon merekam audio mandok, “Lomo hian roha ni akka halak tu video on. Sai diida nasida do tabletna jala disukkun ma, didia do nasida boi mandapot gumodang video sisongon i. Dang godang publikasi di bahasanasida. Jadi tikki diida nasida video i, las situtu ma rohanasida.”

Dua halak Saksi Jahowa marparau di sada sunge. So ma nasida di huta Pigmi jala makkatai ma tu pangulu, guru do ibana di huta i. Dung diboto nasida pangulu i makkatai di bahasa Bassa, diputar nasida ma video Boasa Ringkot Marsiajar Bibel? di bahasa i. Las hian roha ni pangulu i jala dipangido ma piga-piga sijahaon.

Di sada huta di Indonesia, dang lomo roha ni pemimpin agama disi tu Saksi Jahowa. Ditutung ibana ma sude publikasi na disarhon di huta i. Adong do muse parhuta i na mandok lao manutung Bale Harajaon. Ro ma opat halak polisi tu jabu ni sahalak Saksi Jahowa lao manginterogasi ibana dohot keluargana. Naeng botoon nasida, akka aha do na diulahon di Bale Harajaon. Diputar ibana ma video Aha do na Dipatupa di Bale Harajaon? di bahasa Indonesia.

Dung ditonton video i, didok sahalak sian polisi i ma, “Na sala mangattusi do hape akka halak taringot hamu saleleng on.” Didok donganna ma muse, “Kirim ma jo tu au video on asa hupatudu na asing. Asa diboto nasida na sittong taringot hamu.” Gabe burju ma polisi tu Saksi Jahowa jala diurupi nasida.

Molo dang hea dope ditonton hamu akka video on, tonton ma di bahasamuna sandiri.