Ganup taon, diputarhon Saksi Jahowa do godang video tikki kebaktian. Mulana bahasa Inggris do sude video i. Alai songon dia ma carana asa boi video i diattusi halak na so mamboto bahasa Inggris? Diterjemahon ma i tu godang bahasa jala direkam ma. Aha do pandapot ni akka halak na manonton video i?

On ma pandapot ni akka halak na so Saksi, na ro tu kebaktian di Meksiko dohot Amerika Tengah:

• “Huattusi do sude na di video i, jala hira na dohot do ahu di film i. Hona hian tu rohakku.”​—Na ro tu kebaktian bahasa Popoluca, di Veracruz, Meksiko.

• “Hira na di hutakku do huhilala, jala rap makkatai dohot akka donganku. Umtabo do on sian manonton film. Ala boi do huattusi sude na di video i.”​—Na ro tu kebaktian bahasa Nahuatl, di Nuevo León, Meksiko.

• “Tikki hutonton video di bahasangku sandiri, hira na langsung makkatai do halak na di video i tu ahu.”​—Na ro tu kebaktian bahasa Chol, di Tabasco, Meksiko.

• “Burju do organisasi on mangurupi halak marsiajar di bahasa na diattusi akka halak. Dang adong organisasi na asing na songon on.”​—Na ro tu kebaktian bahasa Cakchiquel, di Sololá, Guatemala.

Dang halak na profesional na dipakke Saksi Jahowa lao mangarekam dohot mangisi soara tu video i. Jala somalna di huta-huta do i direkam. Jadi, songon dia ma cara ni nasida mangulahon i?

Piga-piga taon na parpudi on, diatur kantor cabang Saksi Jahowa na di Amerika Tengah do asa dibahen video kebaktian i tu bahasa Spanyol dohot 38 bahasa daerah disi. Hira-hira 2.500 ma halak na dohot mangurupi. Adong do tim na lao menerjemahon dohot mangarekam video i di kantor cabang, kantor penerjemahan dohot di studio sementara. Jala dibahen do on di lobi sian 20 inganan, songon di Belize, Guatemala, Honduras, Meksiko, dohot Panama.

Dang mura lao mambahen studio sementara. Ikkon dipakke nasida do bahan na adong disi songon salimut dohot tilam, lao manutup ruangan i asa unang tarbege soara sian luar.

Halak na pogos do godangan na dohot mangisi suara i. Ikkon berjuang do nasida asa boi ro tu studio i. Adong na ro sian inganan na dao, 14 jom ma nasida di dalan asa sahat tu studio i. Adong do sahalak ama dohot anakna ikkon mardalan pat saleleng ualu jom.

Sian na gelleng, nungnga dohot si Naomi mangurupi keluargana lao mambahen studio rekaman. Ibana mandok, “Sai dipaima-ima hami do andigan muse lao rekaman. Semangat do bapak lao mambahen studio i. Hea do omak mangaloppa sipanganon tu 30 halak relawan.” Saonari, si Naomi nungnga gabe relawan di kantor penerjemahan di Meksiko. Didok ibana, “Las hian do rohakku boi mangurupi akka halak marsiajar Bibel di bahasa ni nasida. Ulaon na massai denggan do on di ahu.”

Ganup taon, dibahen Saksi Jahowa do kebaktian di liat portibi on. Jala sude do halak boi ro tu kebaktian i. Lao mamboto hatorangan taringot i, ida ma di bagian KEBAKTIAN.