Di ujung ni bulan November 2016, masa ma haba-haba di bagian utara ni Italia. Gabe hona banjir ma piga-piga huta di jonok ni kota Moncalieri. Timbo ni aek i adong lobi sian satonga meter. Adong sada koran paboahon, “Sude do hona banjir.” Adong 1.500 halak na diurupi pamaretta kaluar sian huta i, jala mandok mauliate do nasida ala hatop do tim SAR mangurupi, jadi dang adong na mate. Alai, godang do halak na disi mago artana.

Piga-piga tim sian Saksi Jahowa na disi pittor hatop do mangurupi. Diurupi Saksi do akka parhuta i paiasson akka gambo dohot sampah sian jabu ni nasida. Jala pakaluarhon akka barang dohot arta ni parhuta i. Jala adong do dalan na dibahen palang, hape adong sada tim sian Saksi na naeng mamolus huhut mamboan peralatan dohot sipanganon. Ujungna dipaloas pamaretta disi do nasida mamolus sian i, jala boi ma diurupi nasida sada keluarga. Dang holan dongan sahaporseaon na diurupi Saksi alai dohot do na so Saksi.

Umpamana, adong sada apartemen na hona banjir gudangna di toru. Dung sae tim SAR pakaluarhon aek sian i, ro ma sada tim sian Saksi na mangurupi dongan sahaporseaon ni nasida, i ma si Antonio dohot keluargana. Diurupi do nasida paiasson gudang ni nasida. Dung i, diurupi Saksi do muse akka tetangga ni si Antonio. Marbaris do nasida lao pakaluarhon barang sian akka gudang i, jala sae ma holan piga-piga jom. Mandok mauliate do nasida ala diurupi. Adong sada tetangga ni nasida i ma si Viviana. Tangis ma ibana jala didok ma tu istri ni si Antonio, “Dok ma mauliate tu akka donganmuna i da, luar biasa do hamu bah!”

Adong sada huta na sega situtu alani banjir i, diparrohahon akka parhuta i do akka tim sian Saksi na mangurupi halak na hona banjir. Gabe taronjar do roha ni nasida lao mangurupi tim Saksi i, jala olo do nasida mangihutton tudu-tudu sian ketua tim.

Adong ma sada bawa na sega situtu jabuna jala margambo garasina. Longang do rohana mangida adong ualu halak Saksi na paiasson gambo sian garasina i saleleng opat jom. Dung i dihaol ibana ma piga-piga sian nasida jala dibahen ma status di media sosial lao mandok mauliate tu “pangurupion na massai arga” na dilehon nasida.

Sahalak Saksi mandok, “Diurupi hami do akka tetangganami na so Saksi. Godang do sian nasida nungnga marumur 80-an. Adong do na sampe tangis mandok mauliate ala nungnga diurupi.” Adong sahalak na aktif di gareja Katolik, mandok mauliate ala nungnga diurupi. Didok ibana ma, “Nang pe dang sarupa agamanta, alai las hian do rohakku ala marsiurupan hita songon on.” Adong muse sahalak bawa na mandok, “Saleleng on dirippu hami do karejomuna holan ro tu jabu ni halak ganup Minggu manogot, hape sasittongna lomo do rohamuna lao mangurupi halak na susa.”