Saleleng lobi sian 100 taon, nungnga dipajongjong Saksi Jahowa inganan asa boi nasida marpungu jala manomba Debata. Goar ni inganan i, i ma Bale Harajaon. Adong do di luatmuna Bale Harajaon? Aha do pandapot ni akka halak taringot bale harajaon na di luat nasida?

Bagak do Bale Harajaon dipajongjong asa lomo roha ni halak disi mangida i. Sahalak bawa na mangurupi pajongjokkon Bale Harajaon di Amerika Serikat na margoar si Jason mandok, “Tikki dipajongjong hami Bale Harajaon, lomo do rohanami asa Bale Harajaon on ma gabe bangunan na umbagak jala umdenggan di luat i.” Sahalak Saksi na gabe arsitek di tim desain mandok, “Lomo do rohanami asa las roha ni halak tikki mangida Bale on jala gabe contoh bangunan na denggan ma on.”

Akka Saksi Jahowa do na pajongjokkon Bale Harajaon i. Dilehon nasida do tikki dohot gogo ni nasida jala marsitutu mambahen bangunan na massai denggan. Godang do halak na mamparrohahon karejo ni nasida. Umpamana, baru-baru on dipajongjong ma Bale Harajaon di Richmond di Texas, Amerika Serikat. Adong ma sahalak petugas inspeksi bangunan na mandok molo atap ni Bale Harajaon i, i do atap na umdenggan na hea diida ibana. Di pulau Jamaika, adong petugas inspeksi na manogihon akka dongan karejona na baru lao mangida Bale Harajaon. Didok ibana ma tu nasida, “Pos ma rohamuna. Molo Saksi do pasti denggan do nasida pajongjongkon bangunan. Gariada, standar bangunan ni nasida pe umtimbo do sian standar bangunan na dison.” Sahalak petugas inspeksi na di Florida Amerika Serikat mandok, “Nungnga hupareso piga-piga proyek rumah sakit dohot kantor ni pamaretta. Alai hamu do na huhilala na massai taratur karejo. Denggan do sude na dikarejohon hamu.”

Adong do labana tu akka halak molo ro marpungu tu Bale Harajaon on. Diurupi ma nasida asa gabe ama na denggan, ina na denggan jala gabe anak na burju. Adong sahalak baoa na karejo di tim Bale Harajaon goarna si Rod, didok ibana, “Di Bale Harajaon diajari do akka halak songon dia asa marparange na denggan, jala songon dia asa boi mangurupi na asing. Jala di parpunguan on diurupi ma hamu mangadopi parsoalan di ngolumuna. Burju-burju do halak dison, sude do dijakkon. Denggan do parpunguan on tu akka halak na naeng diapuli jala na lomo mananda Debata.”

Akka na ro tu Bale Harajaon on parduli do tu sude halak. Jala molo masa pe mara, lomo do roha ni nasida mangurupi. Umpamana, taon 2016 masa do Badai Matthew di kepulauan Bahama. Dipature Saksi Jahowa do 254 jabu disi. Adong sasahalak na tading disi goarna si Violet. Nungnga marumur 80 taon ibana. Dijuppangi ibana do akka Saksi lao mangido asa diurupi ibana paturehon jabuna. Didok ibana lehononna do hepeng tu nasida. Alai dang olo akka Saksi i dilehon hepeng. Digatti nasida do genteng ni jabuna. Dung i, dipasang do atap na baru di ginjang ni ruang tamuna. Dihaol si Violet ma nasida sude jala sai didok ibana mauliate. Didok ibana tu nasida, “Hamu do naposo ni Debata!”

Asa toktong denggan jala uli Bale Harajaon, dibahen Saksi Jahowa do pelatihan tu akka ruasna, asa diajari nasida lao merawat Bale Harajaon. Denggan do hasilna, umpamana di sada luat di Arizona adong sada borua na karejona penulis barita di koran. Digokkon do ibana tu Bale Harajaon jala ro do ibana. Dibereng ibana uli do Bale Harajaon i. Longang do ibana ala mamboto adong do dibahen jadwal asa dirawat Bale Harajaon. Alani i toktong ma i ias jala uli. Ujungna, dibahen ibana do barita taringot Bale Harajaon di koran i. Di ujung ni barita i didok do, “Las do rohanami . . . adong Bale Harajaon di luatnami on.”

Nungnga godang Bale Harajaon dipajongjong di liat portibi on. Digokkon do hamu asa ro. Dijakkon do hamu molo ro tusi.