Di piga-piga taon na parpudi on, godang do akka pangungsi na ro sian Afrika, Timur Tengah, dohot Asia Selatan tu Eropa. Diparade negara dohot akka sukarelawan disi do sipanganon, inganan, dohot parubatan lao mangurupi nasida.

Sasittongna, dang holan na porlu di pardagingon na rikkot di nasida. Godang do sian nasida na trauma, porlu do nasida diapuli jala dilehon pakkirimon. Marsitutu do Saksi Jahowa di Eropa Tengah lao mangurupi, manangihon jala mangapuli nasida marhite Bibel.

Mulai Agustus 2015, Saksi di lobi sian 300 huria sian Austria dohot Jerman marsitutu lao mangapuli akka pangungsi. Didok nasida, las do roha ni akka pangungsi tikki mangulas alus ni Bibel taringot tu sukkun-sukkun on:

• Boasa massai godang hasusaan?

• Aha do na masa tu halak naung mate?

• Aha do barita na uli sian Hata ni Debata?

• Adong do goar ni Debata?

• Ise do Saksi Jahowa?

Sian Agustus sahat tu Oktober 2015, dipangido Saksi na di luat i do lobi sian opat ton bukku na marojahan tu Bibel sian kantor cabang Eropa Tengah jala gratis do i dilehon tu akka pangungsi.

Godang do sian pangungsi i na holan mamboto bahasa di luat nasida. Alani i, dipakke Saksi ma situs jw.org na marisi sijahaon dohot video di marratus bahasa. Si Matthias dohot si Petra na gabe sukarelawan di Erfurt, di Jerman mandok, “Sipata dipakke hami do isyarat, foto manang gambar lao makkatai dohot nasida.” Dipakke nasida do muse aplikasi JW Language lao marsiajar bahasa na asing asa boi marbarita na uli di bahasa ni akka pangungsi i. Adong do muse na mamakke aplikasi JW Library lao manjahahon Bibel dohot patuduhon video di marragam bahasa.

“Mansai godang do halak na ro mandapotton hami. Di bagasan dua satonga jom, nungnga dijalo akka pangungsi i 360 bukku. Piga-piga sian nasida mandok mauliate do tu hami,” ninna Saksi na mardongan saripe sian Schweinfurt, di Jerman. Si Wolfgang, sahalak sukarelawan di Diez di Jerman mandok, “Las do roha ni akka pangungsi i ala adong na manarihon nasida. Sipata, dipangido nasida do bukku di bagasan lima manang onom bahasa.”

Godang do sian nasida na pittor manjaha bukku i. Na asing, ro do muse lao mandok mauliate. Si Ilonca, sahalak Saksi di Berlin di Jerman mandok, “Ro ma dua halak bawa na poso manjalo bukku sian hami. Dung satonga jom nai, ro do muse nasida mamboan roti tu hami. Jala didok nasida ma, ’Holan on ma na boi hulehon hami lao mandok mauliate tu hamu.’”

Diargai pegawai sosial, pejabat, dohot warga disi do halojaon ni akka Saksi na gabe sukarelawan disi. Pegawai sosial na mangurupi hira-hira 300 pangungsi mandok, “Mauliate! Mauliate godang! Ala olo hamu manarihon na rikkot tu akka halak sian negara na asing!” Sahalak pegawai sosial na asing mandok massai denggan do ala dilehon Saksi sijahaon di bahasa ni akka pangungsi i “alana dang adong be ulaon ni nasida asing ni mangan tolu hali sadari”.

Si Marion dohot tungganedolina, si Stefan na sian Austria, paboahon tujuan ni nasida gabe sukarelawan disi tu dua polisi na manjaga. Mandok mauliate do polisi i tu nasida jala dipangido ma dua bukku. Si Marion mandok, “Sai dipuji polisi i do hami ala dohot di ulaon on.”

Sahalak borua di Austria na jotjot mangalehon sumbangan tu pangungsian i mandok, sai na rade do Saksi mangurupi nang pe tikki las ari manang udan. Sada tikki didok ibana ma, “Rikkot do nian sipanganon dohot na asing di akka pangungsi i. Alai, rumikkot do pakkirimon di nasida. Jala, i do na dilehon hamu.”