Perlombaan sepeda na tarbarita di liat portibi on, i ma Tour de France. Nungnga 103 hali perlombaan on dibahen. Di taon 2016, dibahen ma i tanggal 2 sahat tu 24 Juli 2016. Tikki i, godang do akka halak disi na mabiar. Alana di taon 2015, digugai akka teroris do inganan i, jala adong 100 halak na mate. Dung i, di ari libur tanggal 14 Juli 2016, sahalak teroris mamboan truk jala ditabraki ma akka halak na mangida kembang api di kota Nice. Mate ma 86 halak jala godang na luka.

Dukkon masa i, marsitutu do Saksi Jahowa paboahon taringot pakkirimon jala mangapuli akka halak na adong disi. Dibahen Saksi Jahowa ma rak beroda di godang inganan di perlombaan Tour de France. Lobi sian 1.400 Saksi Jahowa dohot tu ulaon i, jala paradehon lobi sian 2.000 sijahaon tu akka halak na mangalului alus ni sukkun-sukkun na rikkot taringot parngoluon.

Marpinda-pinda do perlombaan i dibahen jala akka na manonton pe dohot do tu ganup inganan i. Longang do roha ni nasida mangida akka Saksi Jahowa na adong di ganup inganan i. Piga-piga hali, akka pengurus perlombaan Tour de France mamuji ulaon ni Saksi, jala didok, “Manang didia pe, sai adong do hamu di ganup perlombaan on!” Godang do akka halak na manonton mandok, “Saksi Jahowa pe adong do dison!” Piga-piga ari di perlombaan i, sahalak supir dang olo manjalo sijahaon na dilehon tu ibana, ala nungnga adong opat sijahaon naung dapotna!

Ala ro Saksi Jahowa tu inganan i, adong ma piga-piga halak na mambuat sijahaon sian rak beroda i. Jala i ma parjolo sahali dibuat nasida sijahaon na pinarade ni akka Saksi. Umpamana, adong parkarejo siaran TV olahraga na hea mangida akka Saksi di perlombaan Tour de France naung salpu. Alai tikki perlombaan on, ro ma ibana tu rak beroda jala dibuat ma buku Rahasia Kebahagiaan Keluarga, ala adong hatorangan na rikkot botoonna sian bukku i. Dung sae manjaha piga-piga hatorangan sian bukku i, dipaboa ibana ma taringot rak beroda i tu akka donganna, jala dibuat nasida ma piga-piga sijahaon.

Piga-piga halak na manonton perlombaan i mandapotton Saksi Jahowa jala paboahon pakkilalaan ni nasida. Sahalak borua paboahon sude arsak ni rohana alani sitaononna jala naeng bunu diri nama ibana. Alai dung dibege ibana barita na uli sian Bibel, i ma taringot tu Harajaon ni Debata, tarapul ma rohana jala dang saut be ibana bunu diri. Adong muse sahalak borua na mandok tu Saksi, “Toktong ma ulahon hamu songon on da!”

Sahalak bawa na martukkot mandok, jotjot do ibana curiga tu halak na so ditanda. Hape diurupi sahalak Saksi Jahowa ma ibana jala dang ditanda ibana Saksi i. Didok ibana ma, “Mauliate ma di haburjuonmi jala rapi do ho marpakkean. Gabe dang curiga ahu tu ho.”