Adong sada suku goarna suku Saami. Nasida tading di negara Finlandia, Norwegia, dohot Swedia. Suku Saami on adong do hasomalan dohot bahasa ni nasida sandiri. Jala baru-baru on, adong dua ulaon na dibahen Saksi Jahowa lao pasahatton barita na uli sian Bibel tu halak Saami.

Na parjolo, di musim gugur taon 2015, dibahen Saksi ma akka sijahaon dohot video na marbahasa Saami. * Na paduahon, adong dua kampanye na dibahen Saksi Jahowa, i ma di taon 2016 dohot 2017. Tikki kampanye on, lao do akka Saksi tu Laplandia. Dao do Laplandia on jala gok do disi rusa kutub. Dipasahat nasida ma disi akka sijahaon dohot video naung diterjemahon i tu halak Saami.

Tikki kampanye bulan Mei taon 2017, adong lobi sian 200 Saksi di Finlandia, Norwegia, dohot Swedia na dohot tikki i. Marbarita ma nasida tu akka huta na adong di luat Laplandia. Marribu kilometer do bolak ni Laplandia on. Piga-piga Saksi adong na mamparsiajari piga-piga hata na dipakke halak Saami asa lomo roha ni halak Saami tikki pajumpang. Adong sahalak bawa na dohot mangurupi di huta Karigasniemi, goarna si Denis. Didok ibana, “Las do roha ni akka parhuta i, ala dicoba hami mamakke bahasa ni nasida. Gabe diboto nasida ma na lomo do rohanami pajuppang dohot nasida.”

Lomo do roha ni akka halak Saami mangida akka toppaan. Jadi, las hian do roha ni nasida tikki mambege janji ni Debata taringot paradeiso di tano on. (Psalmen 37:11) Umpamana, adong sahalak borua disi na marsiajar Bibel mamakke bukku Barita na Uli sian Debata! Diparsiajari ibana ma taringot sakkap ni Debata tu jolma. Gabe sukkun-sukkun do rohana, alana saleleng on dang hea dipaboa pandita tu ibana taringot paradeiso.

Godang do halak disi na las rohana ala ro Saksi Jahowa. Adong sahalak nampunasa toko na mamparrohahon dua Saksi, jala dipuji ibana do nasida. Didok ibana, ulaon na dibahen nasida on “massai rikkot do tu akka halak disi”. Dung i, ditogihon ma nasida tu tokona asa dibuat nasida akka sipanganon. Jala didok ibana tu nasida dang pola digarar i.

Saleleng kampanye i, adong 180 video naung ditonton halak Saami jala adong 500 sijahaon naung dijalo nasida. Godang do sian nasida na mangido sude sijahaon naung diterjemahon tu bahasa Saami. Jala, adong 14 halak Saami nungnga mulai marsiajar Bibel dohot Saksi Jahowa.

Las do roha ni halak Saami tikki manjaha sijahaon sian Saksi Jahowa. Alana, massai denggan do terjemahanna. Adong sahalak guru SD jala karejo di kantor pamaretta, goarna si Nilla Tapiola. Didok ibana, “Massai denggan do terjemahan ni sijahaonmuna on. Tabo do jahaon jala mura do attusan bahasana.” Adong sahalak bawa na tading di Finlandia Utara. Didok ibana, “Malo do na menerjemahon on.”

Di Karigasniemi, i ma perbatasan ni Finlandia dohot Norwegia, marbarita do akka Saksi tu sahalak guru bahasa Saami. Diulas nasida ma parsiajaran na parjolo sian bukku Barita na Uli sian Debata! Lomo do roha ni guru i tu bukku i ala denggan terjemahanna. Jadi, didok ibana ma tu Saksi naeng pakkeonna ma bukku i di sikkola lao mangajari akka muridna taringot bahasa Saami.

Nungnga godang video, risalah, dohot bukku na diterjemahon tu bahasa Saami. Mulai tanggal 29 Februari 2016, nungnga rade situs jw.org di bahasa Saami. Jala ganup bulan lobi sian 400 hali situs on dikunjungi halak Saami. Jala adong 350 sijahaon elektronik, rekaman, dohot video na didownload.

Dang holan halak Saami na mandapot laba sian kampanye on, alai akka Saksi na mangulahon kampanye i pe dapotan laba do sian kampanye on. Adong dua halak goarna si Henrick dohot si Hilja-Maria na lao tu huta Utsjoki. Didok nasida, “Gabe diattusi halak Saami do godang laba na boi didapot nasida sian Bibel.” Adong muse na dohot tu huta Utsjoki, i ma si Lauri dohot si Inga. Didok nasida, “Alani kampanye on gabe diingot hami ma dang dipaimbar-imbar Debata akka halak. Las do rohanami patuduhon holong ni Debata tu akka halak na tading di inganan na dao.”