Di liat portibi on, adong hira-hira sada satonga juta sijala dekke. Ala jotjot do nasida marpinda-pinda sian sada pelabuhan tu pelabuhan na asing, songon dia do Saksi Jahowa boi pasahatton barita na uli tu nasida? Molo adong sada kapal maradi di pelabuhan, ro ma akka Saksi tu kapal i mangalehon akka sijahaon di bahasa ni nasida jala mambahen parsiajaran Bibel.

Songon dia do pakkilalaan ni akka halak na di kapal i? Si Stefano, sahalak Saksi na marbarita di pelabuhan Vancouver, Kanada, mandok, “Dirippu piga-piga halak do sude sijala dengke i halak na garang. Ra, adong do pigapiga na songon i, alai gumodangan do na serep marroha jala lomo rohana marsiajar.” Didok ibana muse, “Sai dijakkon nasida do hami, alana porsea do nasida tu Debata jala makkirim tu pasu-pasuNa.” Di Vancouver, mulai bulan September 2015 sahat tu Agustus 2016, nungnga lobi 1.600 hali akka Saksi Jahowa manjuppangi akka halak na di kapal! Dilehon nasida ma marribu sijahaon di marragam bahasa, jala adong lobi sian 1.100 halak na olo marsiajar Bibel.

Ala adong do akka Saksi na marbarita di godang pelabuhan di liat portibi on, boi ma akka sijala dekke i toktong marsiajar Bibel tikki lao tu pelabuhan na asing. Umpamana di bulan Mei 2016, pajumpang ma Saksi Jahowa di Vancouver dohot si Warlito, sahalak pangaloppa di kapal barang. Dipatudu ma tu ibana video Boasa Ringkot Marsiajar Bibel? jala marsiajar Bibel ma ibana mamakke brosur Barita na Uli sian Debata! Tikki i, naeng lao nama si Warlito tu pelabuhan Paranaguá di Brasil. Alai, hirim do rohana asa boi toktong marsiajar Bibel.

Dung lobi sabulan, sahat ma ibana di Paranaguá. Pajuppang ma ibana dohot dua Saksi halak Brasil di pelabuhan i. Didok nasida, nungnga dikirim akka Saksi di Vancouver taringot pangidoan ni si Warlito asa dijuppangi muse. Las situtu do roha ni si Warlito ala pajuppang dohot akka Saksi i, jala mandok mauliate do ibana ala marsitutu nasida manjuppangi ibana. Toktong do ibana marsiajar Bibel dohot akka Saksi di pelabuhan na asing.