Adong marpulu ribu halak Sinti dohot halak Roma na tading di Jerman. * Baru-baru on, dibahen Saksi Jahowa do akka risalah, brosur, dohot video mamakke bahasa ni nasida, i ma bahasa Romania. *

Saleleng adong kampanye khusus di bulan September dohot Oktober 2016, marsitutu do Saksi Jahowa mambagihon sijahaon na mamakke bahasa Romania tu halak Sinti dohot halak Roma di piga-piga kota na adong di Jerman, songon Berlin, Bremerhaven, Freiburg, Hamburg, dohot Heidelberg. Dibahen nasida do muse parpunguan na marbahasa Romania di Bale Harajaon.

Las situtu do roha ni halak Sinti dohot halak Roma ala dibagihon Saksi Jahowa akka sijahaon i tu nasida. Si Andre dohot si Ester, sada keluarga na dohot di kampanye i mandok, “Las do roha ni nasida ala ro hami manjuppangi nasida.” Tikki dibege jala dijaha nasida barita na uli di bahasa Romania, hona do barita i tu roha ni nasida. Adong sahalak borua na manonton video Boasa Ringkot Marsiajar Bibel? di bahasa Romania. Alani songgot ni rohana, sai didok ibana ma, “Oe tahe, bahasakku do on!”

Sahalak Saksi na margoar si Matthias, na dohot di kampanye di Hamburg, mandok, “Ahu dohot tungganeborungku rappon onom halak dongannami marbarita tu huta ni halak Sinti dohot halak Roma. Adong ma hira-hira 400 halak na tading disi. Sude na hujuppangi hami gabe mangido sijahaon.” Dung dijalo sijahaon i, pittor gogo do soara ni nasida manjahahon i, jala dipangido muse asa adong tu akka dongan ni nasida.

Godang do halak Sinti dohot halak Roma na manjalo gokkon asa ro tu parpunguan. Adong ma 94 halak na ro marpungu tu Hamburg. Godang do sian nasida na so hea dope ro tu Bale Harajaon. Di Reilingen, di jonok ni Heidelberg, adong 123 halak na ro tu parpunguan. Dung i, adong lima halak na marbahasa Romania mangido asa marsiajar Bibel.

Saleleng kampanye i, adong do hira-hira 3.000 risalah dohot brosur na dibagihon Saksi Jahowa. Adong lobi sian 360 halak Sinti dohot halak Roma na mangulas taringot isi ni Bibel rappon Saksi Jahowa, jala adong 19 halak na olo marsiajar Bibel. Piga-piga sian nasida mandok, “Las situtu roha mamboto, olo do hape Debata jonok tu hita.”