Te o pe dé mfoto tchum yeng kam ŋwaʼgne djô ge Mkwithè Jéova kwa mdze pepoung te ne gô ne mtchouʼte map le? Nweke pye pe ning deng ne mdze mye pye kwa a poʼo?

Ne ha mkhouʼ bi Si. A be nyenyô ge Si te tchingne daʼ ne potse tsye pou de bètse djô a pe. (1 Samuel 16:7) Daʼge tchwe ye pye tchouʼte ne ghamte Si a, pye tchente tcheng ne ha mkouʼ mye, ba mye pô pye pye a pou tchouʼte a. Pe pe gô tchye dze taʼ gè fyèʼ shè, be pe gô tinte dze ye pe gô kwa a, dou ge é be taʼ mo gwye. Dendeng poʼo, tchwe ye pye tchye mtchouʼte môk a, mdze môk daʼte mkouʼ mye pye ha bi “Gè fyèʼ goung demtchaʼ awè,” Jéova Si, ba ne tsuʼ ye pye gamte é ne a.​—Genèse 18:25.

Ne ha mkhouʼ ne m ma mye a be pye ghe a. Bible ha kaktuô bi mkritè ge wap pe “kwa dze te ŋaʼ ne, neng ning deng ne.” (1 Timotio 2:9, 10) Ne kwa mdze “te ŋaʼ ne” be ne tchyete kwa mdze mye a gô ghe ge pou tu mnye ne pe a, mye a gô kamshè ke ba mye a gô ghe bawale tcheng ne ghôm nwe ne a le. Ne “neng ning deng” ne mdze mye pye kwa a, kwite wôk ne tchi mdze mye a twa a, be a ka khite, neng be khouʼ ne pye a. Daʼge mkhète meng thak jye bi bawale ne tchi mye ne tchitchi mdze mye a poung a. Pye kwa mdze pepoung, be pye fing ne ghe ge “mkouʼ tchye m ne pye be ne jiʼnwe Si Gèvôk wôk pe” bing ha “ghouʼte bi Si” pe te ghôm sômywe. (Tito 2:10; 1 Pètro 2:12) Poʼo, tchwe ye pye kwa mdze pepoung te ne gô ne mtchouʼte môk a, pye gre ge pou ning deng ne ghamte ye pye ha bi Jéova a.

Daʼge ka mdze mou kô paʼ o gô sôʼ ne mtchouʼte môk a! Mdze mye a be a khouʼgne, dô neng boung a, te be a mye a twa téʼ ke tchuô khap téʼ a pe.

• Tchi ne kwa dze be a ghe ya deng tchwe ye pou we gamte Si a?

• Ma mkhète kwite wôk ne tchi mdze mye pye gô kwa a?