Ɛsdrasi 1:1-11
1 Kɛ Sirisi+ kacili Pɛɛsi famiɛn’n i afuɛ klikli’n nun’n, kɛ ɔ ko yo naan Zoova i nuan ndɛ ng’ɔ sinnin Zeremin i lika kannin’n+ w’a kpɛn su’n ti’n, Zoova yoli maan Sirisi m’ɔ ti Pɛɛsi famiɛn’n boli ndɛ kun i ndolo i famiɛn diwlɛ’n kwlaa nun. Ɔ klɛli ndɛ sɔ’n.+ Ɔ klɛli i kɛ:
2 “Ndɛ nga Sirisi m’ɔ ti Pɛɛsi famiɛn’n kan’n yɛ: ‘Ɲanmiɛn Zoova m’ɔ sie ɲanmiɛn m’ɔ la nglo lɔ plaii’n, ɔ fali asiɛ’n su wa famiɛn diwlɛ’m be kwlaa wlali min sa nun,+ yɛ ɔ seli min kɛ n kplan sua kun n mɛn i Zerizalɛmun lɔ,+ Zida asa’n su lɔ.
3 Amun nun sran kwlaa ng’ɔ ti i nvle’n nunfuɛ’n, maan i Ɲanmiɛn’n jrɛn i sin, maan ɔ sɛ i sin Zerizalɛmun lɔ, Zida mɛn’n nun lɔ, yɛ maan ɔ kplan Zoova m’ɔ ti Izraɛli Ɲanmiɛn’n i sua m’ɔ o Zerizalɛmun lɔ laa’n* i uflɛ. I yɛ ɔ ti Ɲanmiɛn Kpli’n niɔn.
4 Sran kwlaa ng’ɔ ti aofuɛ’n,+ kan kwlaa ng’ɔ o’n, maan i mantanfuɛ mun* be ukɛ i. Maan be mɛn i sika nin sika ɔkwlɛ, nin ninnge wie mun ekun, nin nnɛn, ɔ nin be klunklo ninnge mun, be ti Ɲanmiɛn Kpli i sua+ m’ɔ o Zerizalɛmun lɔ’n i liɛ.’”
5 I sin’n, Zidafuɛ mun nin Bɛnzamɛnfuɛ’m be si’m be awlobo’m be su kpɛn mun, nin Ɲanmiɛn ɲrun jranfuɛ mun, nin Levifuɛ mun, be kwlaa nga Ɲanmiɛn Kpli i wawɛ’n suli be bo kɛ be fa ajalɛ’n, be buabuali be wun be ɔli kɛ bé kó kplán Zoova i sua m’ɔ o Zerizalɛmun lɔ’n i uflɛ.
6 Be mantanfuɛ’m be suannin be bo, be mannin be ninnge wie mɔ be fali sika annzɛ sika ɔkwlɛ be yoli’n, nin ninnge wie mun ekun, nin nnɛn, nin ninnge kpakpa wie mun, ɔ nin be klunklo ninnge mun.
7 Asa ekun’n, Zoova i sua’n nun lɔ ninnge nga Nebikadnezaa fali be Zerizalɛmun lɔ m’ɔ ko sieli be i ɲanmiɛn’n i sua’n nun lɔ’n, Famiɛn Sirisi fali be mannin.+
8 Sirisi m’ɔ ti Pɛɛsi famiɛn’n fali ninnge sɔ mun wlali Mitredati m’ɔ ti ninnge kpakpa’m be sunianfuɛ’n i sa nun. I kusu kali be, kpɛkun ɔ fa be mannin Sɛsibazaa*+ m’ɔ ti Zida mɛn’n i su kpɛn’n.
9 Ninnge sɔ mun yɛ: Sika ɔkwlɛ kpongbo ablasan (30), sika kpongbo akpi kun (1.000), ɔ nin kpongbo ablaɔn-nin-ngwlan (29) ekun,
10 sika ɔkwlɛ kpongbo ba kanngan ablasan (30), nin sika kpongbo ba kanngan ya nnan nin blu (410), nin ninnge uflɛ wie mun ekun, be ti akpi kun (1.000).
11 Ninnge nga be fali sika ɔkwlɛ nin sika be yoli’n be kwlaa be ti akpi nnun ya nnan (5.400). Kɛ be nga be trali be ɔli+ Babilɔnin’n bé sá be sin Zerizalɛmun’n, Sɛsibazaa fali ninnge sɔ’m be kwlaa ɔli.
Ja ngua lɔ ndɛ mun
^ Be kwla se ekun kɛ “m’ɔ o Zerizalɛmun lɔ’n.”
^ Ebr., “i lika’n nun sran mun.”
^ Atrɛkpa’n i yɛ be flɛ i Zorobabɛli Ɛsd 2:2 nin 3:8 be nun’n niɔn.
