Ɛsdrasi 10:1-44
10 Kɛ Ɛsdrasi srɛ́ Ɲanmiɛn+ m’ɔ́ kán sa tɛ nga be yoli’n i ndɛ klé i’n, m’ɔ́ sún’n, m’ɔ utuli i ɲin ase Ɲanmiɛn Kpli i sua’n i ɲrun lɛ’n, Izraɛlifuɛ kpanngban kpa, yasua nin bla nin ba kanngan mun be wa sin yiɛli i. Kpɛkun nvlefuɛ’m be kwlaa be sunnin kpa.
2 I sin’n, Zeyiɛli m’ɔ ti Elamun i osu’n nunfuɛ’n+ i wa* Sekania+ seli Ɛsdrasi kɛ: “E nin e Ɲanmiɛn’n y’a nantiman klanman, afin e jali nvle uflɛ nun bla.*+ Kannzɛ bɔbɔ ɔ ti sɔ’n, sanngɛ Izraɛlifuɛ’m be liɛ nin-a wieman mlɔnmlɔn.
3 Siɛn’n, maan e nin e Ɲanmiɛn’n e tra aenguɛ+ naan e kan bla sɔ mun, ɔ nin be mma nga be wuli be’n be kwlaa be bo, kɛ nga Zoova nin be nga be bu e Ɲanmiɛn’n i mmla’n i like dan’n*+ be kannin’n sa. Maan e nian nga Mmla’n kan’n su e yo.
4 Jaso, afin wɔ yɛ ɔ fata kɛ a siesie ndɛ sɔ’n niɔn, e jin ɔ sin. Jran kekle yɛ fa ajalɛ.”
5 Kɛ ɔ yoli sɔ’n, Ɛsdrasi jasoli, kpɛkun ɔ yoli maan Ɲanmiɛn ɲrun jranfuɛ’m be su kpɛn mun, nin Levifuɛ mun, ɔ nin Izraɛlifuɛ’m be kwlaa be tali nda kɛ bé nían ndɛ nga be kannin’n su bé yó.+ Ɔ maan be tali nda.
6 I sin’n, Ɛsdrasi jasoli Ɲanmiɛn Kpli i sua’n i ɲrun lɛ. Kpɛkun ɔ ɔli Eliasibu i wa Zoanan i sua ba’n nun lɔ.* Kannzɛ bɔbɔ ɔ ɔli lɔ’n, sanngɛ w’a diman like yɛ w’a nɔnman nzue, afin Izraɛlifuɛ nga be sali be sin’n be nin Ɲanmiɛn b’a nantiman klanman. I sɔ’n ti’n, ɔ trannin awlabɔɛ’n nun.+
7 I sin’n, be boli ndolo Zida nin Zerizalɛmun klɔ’n nun kɛ be kwlaa nga be sali be sin’n, maan be ti yia Zerizalɛmun lɔ.
8 Kɛ nga sran dandan mun nin kpɛnngbɛn’m be fa kannin’n sa’n, sran kwlaa nga kɛ cɛn nsan fá sín’n w’a baman’n, bé dé i sa nun ninnge’m be kwlaa, kpɛkun bé kɛ́n i bo be nga be sali be sin’n be nun.+
9 Ɔ maan cɛn nsan sɔ’m be nun’n, Zida yasua mun nin Bɛnzamɛn yasua’m be kwlaa be yiali Zerizalɛmun lɔ. Anglo ngwlan su’n i cɛn ba ablaɔn (20) su yɛ be yiali-ɔ. Nvlefuɛ’m be kwlaa be trantrannin Ɲanmiɛn Kpli i sua’n i awlo klun mun be nun kun nun. Sa sɔ’n ti’n, ɔ nin nzue m’ɔ tɔ dan ti’n, be usu sa kpɛkpɛkpɛ.
10 I sin’n, Ɛsdrasi m’ɔ ti Ɲanmiɛn ɲrun jranfuɛ’n jasoli, kpɛkun ɔ seli be kɛ: “Amun nin Ɲanmiɛn b’a nantiman klanman, afin amun jali nvle uflɛ nun bla mun.+ Ɔ maan amun a uka Izraɛlifuɛ’m be sa tɛ’n su.
11 Siɛn’n, maan amun kan sa tɛ nga amun yoli’n i ndɛ be kle Zoova m’ɔ ti amun nannan’m be Ɲanmiɛn’n, yɛ amun yo i klun sa’n. Maan amun yi amun wun nvle kun nga’m be nun, yɛ amun yaci nvle uflɛ nun bla mun.”+
12 Be kwlaa nga be yiali lɛ’n be mannin be nɛn’n su be tɛli i su kɛ: “Ɔ fata kɛ e nian nga a kannin’n su sɛsɛsɛ e yo.
13 Sanngɛ, sran’m be sɔnnin, yɛ kusu e o nzue blɛ nun. Ɔ maan e kwlá kaman gua su. Ndɛ’n kusu’n i siesielɛ’n su diman cɛn kun annzɛ cɛn nɲɔn cɛ, afin e nga e yoli ɲin kekle sɔ’n e sɔnnin.
14 Ɔ maan, yaci, maan e su kpɛn’m be jran e kwlaa e nuan.+ Maan e klɔ’m be su be nga be jali nvle uflɛ nun bla mun’n be bla blɛ trele kun nun, maan be nin be klɔ’m be su kpɛnngbɛn mun nin jɔlɛ difuɛ mun be bla, naan e yo sɔ lele naan e Ɲanmiɛn’n i ya dan ng’ɔ fɛli i e wun sa sɔ’n ti’n ɔ kan ase.”
15 Sanngɛ Azaɛli i wa Zonatan, nin Tikva i wa Zazeia b’a kplinman ndɛ sɔ’n su. Kpɛkun Mesulamun nin Sabetai mɔ be ti Levifuɛ’n+ be jrannin be sin.
16 Sanngɛ be nga be sali be sin’n be yoli nga be nuan sɛli su’n. Ɛsdrasi m’ɔ ti Ɲanmiɛn ɲrun jranfuɛ’n, nin be si’m be awlobo kpɛn mun, mɔ be boboli be kwlaa be dunman’n, be ngunmin be yiali anglo blu su’n i cɛn ba klikli’n su naan bé síesíe ndɛ sɔ’n.
17 Ɔ maan anglo klikli’n i cɛn ba klikli’n su’n, be wieli be kwlaa nga be jali nvle uflɛ nun bla’n be ndɛ’n i siesie.
18 Kpɛkun be wunnin kɛ Ɲanmiɛn ɲrun jranfuɛ’m be mma wie mun be jali nvle uflɛ nun bla mun.+ Be yɛle Maazeya, Eliezɛɛ, Zaribu, yɛ Gedalia. Be fin Zozadaki i wa Zesua+ nin i niaan yasua mun be osu’n nun.
19 Be tali nda* kɛ bé kán be yi’m be bo. Sanngɛ kɛ mɔ be yoli sa tɛ’n ti’n, ɔ fata kɛ be fa bua ɲin kun be yi be sa tɛ’n i ti tɛ.+
20 Ananin nin Zebadia, be fin Imɛɛ i osu’n nun.+
21 Maazeya, Eli, Semaia, Zeyiɛli, yɛ Oziasi, be fin Arimun i osu’n nun.+
22 Elionai, Maazeya, Ismaɛli, Netanɛli, Zozabadi, yɛ Eleasa, be fin Pasii i osu’n nun.+
23 Zozabadi, Simei, Kelaya (yɛle kɛ Kelita), Petaya, Zida, yɛ Eliezɛɛ, be fin Levi i osu’n nun.
24 Eliasibu, ɔ fin jue tofuɛ’m be osu’n nun. Salɔmun, nin Telɛmun, yɛ Uri, be fin anuan sunianfuɛ’m be osu’n nun.
25 Izraɛlifuɛ’m be nun’n: Ramia, Izia, Malkia, Mizamin, Eleazaa, Malkia, yɛ Benaya, be fin Parɔsu i osu’n nun.+
26 Matania, Zakari, Zeyiɛli,+ Abdi, Zeremɔtu, yɛ Eli, be fin Elamun i osu’n nun.+
27 Elionai, Eliasibu, Matania, Zeremɔtu, Zabadi, yɛ Aziza, be fin Zatu i osu’n nun.+
28 Zoanan, Anania, Zabai, yɛ Atilai, be fin Bebai i osu’n nun.+
29 Mesulamun, Maluku, Adaya, Zasubu, Seali, yɛ Zeremɔtu, be fin Banin i osu’n nun.
30 Adna, Kelali, Benaya, Maazeya, Matania, Bezalɛli, Binii, yɛ Manase, be fin Paati-Moabu i osu’n nun.+
31 Be nga be fin Arimun i osu’n nun’n+ be yɛ: Eliezɛɛ, Isia, Malkia,+ Semaia, Simeɔn,
32 Bɛnzamɛn, Maluku, Semaria.
33 Be nga be fin Asumun i osu’n nun’n+ be yɛ: Matenai, Matata, Zabadi, Elifelɛti, Zeremai, Manase, yɛ Simei.
34 Be nga be fin Banin i osu’n nun’n be yɛ: Maadai, Amramun, Uɛli,
35 Benaya, Bedia, Kelii,
36 Vania, Meremɔti, Eliasibu,
37 Matania, Matenai, yɛ Zaasu.
38 Be nga be fin Binii i osu’n nun’n be yɛ: Simei,
39 Selamia, Natan, Adaya,
40 Maknadebai, Sasai, Sarai,
41 Azarɛli, Selemia. Semaria,
42 Salɔmun, Amaria, yɛ Zozɛfu.
43 Zeiɛli, Matitia, Zabadi, Zebina, Zadai, Zoɛli, yɛ Benaya, be fin Nebo i osu’n nun.
44 Be kwlaa ngalɛ’n be jali nvle uflɛ nun bla mun,+ yɛ be kannin be yi mun nin be mma’m be bo.+
Ja ngua lɔ ndɛ mun
^ Ndɛ tre nga nun’n kɛ be se kɛ “i wa’n” wie liɛ’n i osu nunfuɛ i ndɛ yɛ be kan-ɔn. Wie liɛ kusu’n be fa kan lika ng’ɔ fin’n i ndɛ.
^ Annzɛ “e fali be e bali e awlo’m be nun.”
^ Ebr., “be nga e Ɲanmiɛn’n i ndɛ’n ti’n be usu’n.”
^ Ebr., “kan be di like lɛ’n.”
^ Ebr., “Be fali be sa mun be mannin.”
